Read Alur 2 Jukorinto 10 Bible Online

2 Jukorinto 10 - Alur bible

2 Jukorinto 10

¹Nie an a Paolo ku kita abekwayuwu ku molcwiny ku bedoyo de pa Kristu, an ma kan ani i vutwu abedo ming’ i kindwu endre kan ambe abedo ku tegocwiny yor i beng’wu:

²eyo, abekwayuwu ma tek, kara kan anuti kud anyuth tegocwiny ku genogen maeno m’akwanu ya abedo kudo kum jumoko, m’ukwanu piwa calu ma tek wan de wawotho calku kum.

³Kum kadok wawotho ku kum, watimo lwiny calku kum ungo

⁴kum jamtho mwa mi lwiny gi mi kum ungo, endre gi tek apila i wang’ Mungu ma giredho ko gin ma tek piny;

⁵ma gjjedho ko pidoic m’udhunjo piny, man ku gin ma tingre kum ng’eyong’ec pa Mungu, ma kelo pidoic ceke kubang’gi ni kol m’edoko ko wor ni Kristu;

⁶m’ebedo ko ayika niculo kwor kum camuco ceke, kinde ma woro mu uromo kakare.

⁷Wuneno gin ma ni i weng’wu. Tek ng’atu moko begendre gire ya en e pa Kristu, dong’ ie pid maeni kendo gire, nia, cil calu en e pa Kristu, wan bende wabedo kumeno.

⁸Kum kadok alula moko ma dit pi ng’ol mwa (ma Rwoth umio ya ugomwu agoma, m’ubamwu abama re ngo), e lewic binega ngo:

⁹kara kud i weng’wu kud abed calu ma nia ang’oyo ndiri i iwu ku waraga para.

¹⁰Kum, giwacu kumae, Waraga pare gi pek gi tek de; ento ku kume e ng’ic, wec pare de en e mananu.

¹¹Dong’ ng’atu ma wagi maeni ie pid kumeni, nia calu wabedo i lembe ku waraga ka wambe, wabedo kumeno bende i tic kinde ma wanuti.

¹²Kum wa weg tegocwiny ungo ma wakwandra ko giwa kadi ma wapora ko giwa ku jumoko m’i kindgi ma grfoiri gigi: endre gin gigi, ma gibepori gigi, ma gibenyuthri gigi de gibedo ma ng’eyong’ec umbe kugi.

¹³Endre wabilula giwa ngo ma sagu kapor mwa, endre calu kapor maeni mi jampor ma Mungu poko iwa calu kapor, m’etundo ko cil i beng’wu bende.

¹⁴Kum wan giwa wakukadhu jampor mwa giwa ngo, calu wakutundo i beng’wu ngo: kum wabino agbele i beng’wu i lembanyong’a ma juboth ko pa Kristu:

¹⁵ma wakulula ko ngo ma sagu kapor mwa, i tic ma jumange gimuli ko; endre ma wabedo ku genogen nia, calu yioyic mu bedongo, e wabidoko dit ni kumwu calku jampor mwa ni sag ma jusagri ko,

¹⁶kara wayer lembanyong’a ma juboth ko cil i ng’et ng’om m’ukadhuwu, man kud alula i jampor pa ng’atu mange pi gin maeni m’ubedo ayika i cingwa.

¹⁷Ento ng’atu m’ulule, dong’ eliue i Rwoth.

¹⁸Kum juyio ng’atu ma foire gire ngo, ento ng’atu ma Rwoth foyo re.