Read Alur 2 Jukorinto 11 Bible Online

2 Jukorinto 11 - Alur bible

2 Jukorinto 11

¹Wukowutwi cwinywu i kuma tundu kum wec ma nok ma kite mbe: ento wutwio cwinywu i kuma andha.

²Kum ngiri benega piwu en e ngiri ma ayi Mungu ni i kume: kum adhumowu ni nico acel, kara aterwu ni Kristu calu nyaku ma leng’ ma sumba.

³Ento alworo, kuno nyo ku yo moko, calu thwol uboinbo Eva ku rieko pare, e pidoiwu binyothre kud i bedo m’ebedo ma abombi mbe i ie man i leng’ m’e leng’ ko yo ba Kristu.

⁴Kum tek ng’atu m’ubino eyero Yesu mange, ma wayero pire ngo, kadi tek wujolo tipo ma tung’, ma fodi wukujolo ngo, kadi lembanyong’a ma juboth ko ma tung’, ma wujolo ngo, meca wutimo dre kum wutwio cwinywu i kume.

⁵Kum akwanu nia adong’ cen ng’ei jukwenda ma gisagu juwadi ceke ki ngo.

⁶Ento kadok acanyu wec acanya, endre ng’eyong’ec para re kumeno ngo; eyo, i yo ceke waketho maeni nyuthre iwu i gin ceke.

⁷Kadi atimo dubo kum ajwigra gira kara judodwu malu, kum ayero iwu lembanyong’a ma juboth ko pa Mungu mananu?

⁸Ayaku kanisa mange m’agamu ko sukulia i bang’gi kara atim ko iwu;

⁹man kinde ma ani i beng’wu ma can piny bende ni i kuma, abedo ter ni ng’atu moko ngo: kum umego, kinde ma giai i Makedoni, gin e ma gimio m’ukabu can piny ma ni i kuma; man i gin ceke akura gira kara kud abed ni ter iwu, man abigwokra gira kumeno,

¹⁰Calu lemandha pa Kristu ni i ia, ng’atu moko mbe ma bicera kum kulula maeni i ng’om mir Akaya.

¹¹Kum lembang’o? kum amaruwu ngo? Mungu ng’eyo.

¹²Ento gin m’atimo, maeno abitimo, kara acer kaka ni ju ma giyenyo kaka moko; kara i gin maeni ma giluli i ie, e jubinwang’u gin de ndhu calu wan.

¹³Kum wagi dhanu ma kumeno gi jukwenda mi ndra, jutic ma weg abombi, ma gibelokri gigi ni jukwenda pa Kristu.

¹⁴Man wang’uijo mbe; kum cil Jok loko kite gire, ni malaika mi der.

¹⁵Ka kumeno en e gin ma dit ungo tek jutic pare bende gilokri gigi ve jutic mi bedopwe, ma kajik migi bibedo calku tic migi.

¹⁶Ayero kendo, ng’atu moko ie kud uwac nia a jakasegu; ento tek iwu wacu kumeno, wujola asu ma kita mbe, kara an bende alula nyanok.

¹⁷Maeno m’ayero no, ayero m’uai ba Rwoth ungo, ento calu ma kite mbe i genogen maeni mi kulula.

¹⁸Kum nwang’u dupa giluli calku kum, an bende abilula.

¹⁹Kum wutwio cwinywu kum jukusegu ku mutoro, ma wun wu riek.

²⁰Kum wutwio cwinywu kum ng’atu moko, tek ekelowu ni ng’eca, tek ecamuwu, tek eyakuwu de, tek eyungre gire, tek epadu weng’wu de.

²¹Abeyero ma yung umbe i kume, calu y a wan wa ng’ic. Endre ka ma tek jumoko gibedo ie ku tegocwiny (ayero ku lembe ma kite mbe), abedo ku tegocwiny bende.

²²Gin gi Juebrania? an bende abedo kumeno. Gin gi Juisraeli? an bende abedo kumeno. Gin gi nyikwai Ibrahimu? an bende abedo kumeno.

²³Gin gi jutim pa Kristu? (Ayero calu abelu) an e m’asagu; i tic m’amula ko ma sagu dit, i kol ma sagu dit, ku wang’ goc ma kaporne mbe, i tho wang’ udul.

²⁴Ba Juyahudi wang’ abic amaku goc pier ang’wen udong’ acel.

²⁵Bang’ adek jugoya ku dul, wang’ acel ke jucanya ku kidi, wang’ adek ke asendra i combo m’ung’eny, diewor acel ku dieceng’ acel ani i nam;

²⁶i woth ma wang’ udul, ceng’ni tho mi kulo, ceng’ni tho ni weg ayeki, ceng’ni tho ni juthuwa, ceng’ni tho ni Thekdhanumange, ceng’ni tho i adhura de, ceng’ni tho i yamba, ceng’ni tho i nam de, ceng’ni tho i kind umego mi ndra;

²⁷i tic ma jumuli ko ku sendri, i kurokur wang’ udul, ku kec ku rieu de, ku kwirocam de wang’ udul, ku koyo ku muneru de.

²⁸M’umedre kum gin maeno ma yo woko, gin moko nuti m’unura ku ba rupiny, en e adieng’acwiny pi kanisa ceke.

²⁹Ng’a ma ng’ici, ma an a ng’ic ungo? ng’a ma juketho ekier, ma a kuwang’ ungo?

³⁰Tek emaku ya alula, abilula kum gin mi ng’ic para m’ang’ic ko.

³¹Mungu ma Won Rwoth Yesu, en m’e jamugisa rondo ku rondo eng’eyo ya ayero ndra ngo.

³²Dameski jabim ma the cing Areta m’ubimo ekuro adhura mi Judameski kara emaka:

³³man ku wang’ot julura piny ku wi gang’ ku i kukunju, e aboth ve kud i cinge.