Read Alur 2 Jukorinto 2 Bible Online

2 Jukorinto 2 - Alur bible

2 Jukorinto 2

¹Ento akeco mae ira gira, ya kud abin i beng’wu ku can kendo.

²Kum tek anyayu can i iwu, ka ng’a ke ma lund nyayu mutoro i ia ndhu ng’atu m’anyayu can i ie?

³Man agoro gin maeni nini, kara, kinde m’awok, kud anwang’ can ba ju ma maku anwang’ mutoro re; m’ageno ko wun ceke, nia mutoro para en e mutoro mu ceke.

⁴Kum agoro iwu ku piwang’ dupa kud i can ma dit ku ndiba mir adunde de; kara ya anyai can i iwu ngo, ento kara wung’ei mer para ma dit m’usagre yor i beng’wu.

⁵Ento tek ng’atu moko nyayu can, meca enyayu can, ira ngo, ento kume moko iwu ceke (kara kud anurwu ma sagu).

⁶Masendi maeni ma ju ma dupa giketho i wie eromo wagi ng’atu ma kumeni;

⁷kum kumeno ma tung’ ku eni maku wuwek lembe pare woko man wujuke, kara ng’atu ma wagi maeni kud umwonjre ku yo moko ni kum can pare m’usagu.

⁸Kum kumeno akwayuwu ma tek ya wunyuth ire mer mu ma wumare ko.

⁹Kum lembe nini bende ketho agoro iwu, kara ang’ei mulo piwu ma jumulo, tek wuwor i gin ceke.

¹⁰Ento ni ng’atu ma wuweko ire gin moko woko, an bende aweko woko: kum gin ma tek an bende adaru weko woko, tek adaru weko gin moko, meca aweke ni kum lembe mu i wang’ Kristu;

¹¹kara Jok kud unwang’ kuloka i wiwa: kum wan wacobo ngo kum pidoic pare.

¹²Nie kinde m’abino Troa pi lembanyong’a pa Kristu ma juboth ko, man kinde ma dhugola yabre ira i Rwoth,

¹³cwinya kwio ngo, kum anwang’u Tito m’umira ngo: ento kan aweko gi, acidho i Makedoni.

¹⁴Ento foyofoc ni Mungu, m’etelo wiwa thiri thiri i sag ma jusagu ko ni kum Kristu, man eketho mido mi ng’eyong’ec pare nyuthre i kaka ceke ni kumwa.

¹⁵Kum wan wa mido ma ng’ar pa Kristu ni Mungu, i ju ma giboth, man i ju ma girwinyo;

¹⁶ni acel mido m’uai ba tho tundo de ba tho; ni mange ke mido m’uai i kwo tundo de i kwo. Ng’a ke m’uromo ni gin maeni?

¹⁷Kum wan wa calu dupa ngo, ma gibenyotho lem pa Mungu: ento wayero mwa i Kristu, endre calu ma abombi mbe i cwinywa, ento calu pa Mungu i wang’ Mungu.