Read Alur 2 Jukorinto 3 Bible Online

2 Jukorinto 3 - Alur bible

2 Jukorinto 3

¹Wan wamaku foira giwa kendo? kadi wayenyo waraga mi foc ma jufoyo ko jo, calu jumoko, ma wabin ko i beng’wu kadi ma waai ko i beng’wu?

²Wun wu waraga mwa, ma jugoro i adundewa, ma dhanu ceke ging’eyo gisomo de;

³ma juketho enyuthre ya wun wu waraga pa Kristu, ni kum tim ma watimo, ma jukugoro ku vino ngo, endre ku Tipo pa Mungu ma kwo; ku ban mi kidi ngo, ento i ban ma adunde mi ring’kum.

⁴Man wabedo ku genogen ma kumeni yo ba Mungu ni kum Kristu:

⁵ya wan waromo giwa wan ungo, ma nia wapor gin moko calu eai i bang’wa wan: endre rom mwa ma waromo kudo ai ba Mungu;

⁶en bende m’eketho waromo calu jutim mi lembariba ma nyen; mi nyiguta ngo, ento mi tipo re: kum nyiguta nego, endre tipo mio kwo.

⁷Ento tek timotim mi tho, ma i nyiguta, ma jutong’o i kidi, uwok ku dwong’, ketho ya nyithindho pa Israel gicopo neno wang’ Musa tel ungo ni dwong’ mi wang’e; ma dwong’ne bekadhu woko:

⁸timotim mi tipo dwo ng’ne bisagu hai ngo?

⁹Kum tek timotim mi pokolembe rac dwong’ne nuti, e timotim mi bedopwe dwong’ne sagu dit.

¹⁰Kum andha maeno m’unwang’u dwong’ k’enwang’u dwong’ kum gin maeni re ngo, ni kum dwong’ m’usagu asaga.

¹¹Kum tek maeno m’ubekadhu woko no bedo ku dwong’, m’udong’ no e m’ubedo i dwong’ ma sagu apila.

¹²Ka kumeno wan ma wabedo ku genogen ma kumeni, waweco ku tegocwiny ma dit,

¹³man wa calu Musa ngo, m’uumo bongu i wang’e, kara nyithindho pa Israel ku ginen kajik mi gino tel m’ubekadhu woko:

¹⁴endre pidoic migi bedo nwang’: kum cil i ceng’ maeni nini ku som ma jusomo ko lembariba ma con bongu nica fodubedo kakare, m’ebenyuthre igi ngo nia lembariba ma con ukabre woko ni kum Kristu.

¹⁵Ento cil i ceng’ maeni, kinde ma tek jusomo Musa, e bongune umo adundegi.

¹⁶Ento kinde ma tek ebilokre ni Rwoth, bongune kabre woko.

¹⁷Nie Rwoth en e Tipo maeni: man ka ma Tipo Rwoth ni i ie, e gony de nuti.

¹⁸Ento wan ceke, ma bongu mbe i wang’wa ma wabeneno dwong’ pa Rwoth calu i kieu, e walokra wadoko calu ayi maeni m’uai i dwong’ utundo de i dwong’, cil calu m’eai ba Rwoth ma Tipo.