Read Alur 2 Jukorinto 8 Bible Online

2 Jukorinto 8 - Alur bible

2 Jukorinto 8

¹Mange ke, umego, waketho wung’ei bero pa Mungu m’umire i kanisa ma Makedoni;

²maram ku muloic ma dit mi can e dit mi mutoro migi man can piny migi ma apila usagre ni lonyo mi miomic migi ma ku berocwinygi.

³Kum anyutho, nia calku tego migi, eyo ma kadhu tego migi de, gimio gigi kendgi,

⁴ma gibekwayuwa ku kwac ma dit pi bero maeni man ribri i timotim ma ni jumaleng’:

⁵man maeni, calu ma wageno de ngo, endre gilar gimiri gigi ni Rwoth, man iwa ni kum yeny ma Mungu yenyo.

⁶Kum kumeno wakwayu Tito, ya calu elar etheko, e kumeno dong’ edar bero maeni bende i iwu.

⁷Ento calu wusegru i gin ceke, i yioyic, man i wec, ku ng’eyong’ec de, man i morkum ceke, man i mer mu ma yor i bang’wa, wunen ya wusegru i bero maeni bende.

⁸Ayero ma nia amio ko lembang’ola ngo, endre calu amulo ko kit mer mu maeni bende ni kum amora mi jumange.

⁹Kum wung’eyo bero pa Rwoth mwa Yesu Kristu, nia kadok elony, ento edoko jacan piwu, kara wun wulony ni kum can pare.

¹⁰Man amio lembang’ola para i maeni: kum maeni en e ber iwu, wun ma wular wukwong’o timo kende ngo, ento ayenya bende wuyenyo i rundi acel m’ukadhu.

¹¹Ento kawono bende wuketh timne timbre; calu amorane nuti ma wuyenyo wutime kudo, e kumeno wuketh timne timbre kakare bende calu ma wucopo.

¹²Kum tek amorane nuti, eyire ni ng’atuca calu m’ebedo ko, calku m’ebedo ko ngo re ngo.

¹³Kum ayero eni ma nia jumange cwinygi kwi ko ngo wun re ma cwinywu dieng’;

¹⁴ento kara lembe bed rom rom: sagri mi piny mu ukoukei can m’i kumgi nindo maeni, kara sagri mi piny migi bende ubin ukei can m’i kumwu; kara lembe ubed rom rom;

¹⁵calu egore kumae, Ng’atu m’ucoko dit donge m’udong’ umbe; ng’atu m’ucoko nyanok de cande nege ngo.

¹⁶Endre foyofoc ni Mungu, m’eketho amora mi gwokogwok ma calacel i adunde Tito piwu.

¹⁷Kum ejolo dwandwa andha; endre m’ebedo kud amora ma sagu, ecidho i beng’wu gire kende,

¹⁸man waorogi gikud umego acel ma pak pare i lembanyong’a ma juboth ko urweire i kind kanisa ceke;

¹⁹man kumeno kende ngo, ento kanisa goyo nyinge bende ya wawoth wakugi ni bero maeni, m’umire ni kumwa ni dwong’ pa Rwoth, ninyutho amora mwa bende:

²⁰ma waura ko kum eni, ya ng’atu moko kud ucok lembe i wiwa kum jukupiny maeni m’umire ni kumwa:

²¹kum iwa pido kum gin m’u bedo alili i wang’ Rwoth kende ngo, endre i wang’ dhanu bende.

²²Man waoro umegwa gikugi, ma wamulo wang’ udul wanwang’u ebedo kud amora kum giki dupa, ento kawono kud amora ma sagu dit, ni kum genogen ma dit m’ebedo ko i kumwu.

²³Tek ng’atu moko penjo pi Tito, en e jaribna man jatic wada yor i beng’wu; kadi juwadwa de, gin gi jukwenda mi kanisa, gin gi dwong’ pa Kristu.

²⁴Ka kumeno wunyuth igi kit mer mu i wang’ kanisa, man ke kulula mwa ma i kumwu bende.