Read Alur Jugalatia 2 Bible Online

Jugalatia 2 - Alur bible

Jugalatia 2

¹Ka nindo mi rundi apar wi ang’wen ukadhu alund aidho Yerusalem kendo waku Barnaba, m’agamu ko Tito bende wacidho wakugi.

²E aidho ni kum nyuth ma Mungu nyutho; man apedho lembanyong’a ma juboth ko m’ayero i kind Thekdhanumange i wang’gi ento nyalwe i wang’ ju ma pigi yik, tek kuno nyo aberingo, kadi adaru ringo, mananu.

³Ento cil Tito ma wabedo wakude, ma Jayunani, jucung’e ngo ya jutim yaa i kume:

⁴ento en e kum umego mi ndra ma jukelo i ie nyalwe, ma gimondo nyalwe nilibo gony mwa ma wabedo ko i Kristu Yesu, kara gidwokwa ni ng’eca:

⁵e waweko igi kamoko ngo ma nia wawor kogi, ungo, kadok saa acel de ngo; kara lemandha mi lembanyong’a ma juboth ko bed kudu asu.

⁶Ento ju ma pigi yik ya gi dit (bedo ma naka gibedo ko, en e gin moko ngo ira: Mungu jolo kit dhanu ngo) joni, awacu, gi ju ma pigi yik nini gimedo lembe moko ira ngo:

⁷ento ma tung’ ku eni: kinde ma gineno nia juketho lembanyong’a ma yaa mbe i ie i kora, calu juketho lembanyong’a ma ie ju yaa i kor Petro

⁸(kum ng’atu m’utimo ni Petro nica eketho ebedo jakwenda mi yaa etimo ira bende ni Thekdhanumange);

⁹e ka ging’eyo bero m’umire ira, Yakobo giku Kefa man Yohana, ju ma pigi yik nia gi mbegi, gimio cing’gi ma yor acwic mi ribri iwa waku Barnaba, ya waci ba Thekdhanumange, gin ke gici migi ba weg yaa;

¹⁰mae kende ma giyenyo nia wapoi kum jucan; e eni ma an bende ayenyo dit atim.

¹¹Ento kinde ma Kefa bino Antiokia, ajai ire i wang’e, kum lembe ni i wie.

¹²Kum ka fodi dhanu m’uai ba Yakobo foduwok ungo, ecamu ku Thekdhanumange; ento ka giwok, ecoro cen man ekoire gire, m’elworo ko ju ma weg yaa.

¹³Juyahudi m’udong’ de gipali kumeno gikugi; ketho cil Barnaba de wingre woko ku pali migi.

¹⁴Ento kan aneno nia giwotho atira ngo calku lemandha mi lembanyong’a ma juboth ko, awacu ni Kefa i wang’gi ceke kumae, Tek in, m’i Jayahudi, ikwanyu koth lembe mi Thekdhanumange, ma k’ikwanyu koth lembe mi Juyahudi ngo, idong’ icung’o Thekdhanumange ya gikwany koth lembe mi Juyahudi nedi?

¹⁵Wan ma wa Juyahudi ku koth kum, man wa weg dubo ngo mi Thekdhanumange,

¹⁶ento wang’eyo nia ng’atu moko mbe ma lembe m’i wie gonjre ku tic mi cik, ndhu ku yic ma juyio ko Yesu Kristu re, e cil wan de wayio Kristu Yesu, kara lembe m’i wiwa gonjre ku yic ma wayio ko Kristu, ni kum tic mi cik re ngo: kum ng’atu moko mbe ma lembe m’i wie bigonjre ku tic mi cik.

¹⁷Ento tek, kinde ma wabeyenyo lembe m’i wiwa gonjre ni kum Kristu, wan nini bende junwang’uwa wa judubo, Kristu en e jatic mi lem dubo? Awene.

¹⁸Kum tek agomo gin maeno kendo m’anyotho, meca anyuthra gira nia a jadubo.

¹⁹Kum an ni lembe mi cik atho ni cik, kara abed kwo ni Mungu.

²⁰An judaru gura waku Kristu; man en e an kendo ngo m’ukwo ento Kristu e m’ubedo i ia; man kwo maeno m’abedo ko i kum akwo i yioyic, yioyic ma ni i Wod Mungu, m’umara, m’umire gire pira.

²¹Adwoko bero pa Mungu mananu ngo: kum tek bedopwe ubino ni kum ciki, meca Kristu tho mananu.