Read Alur Jugalatia 4 Bible Online

Jugalatia 4 - Alur bible

Jugalatia 4

¹Ento awacu nia cil ma jacampacu fodi nyathin, ebedo tung’ ungo ku jamiru kadok en e rwoth mi ceke;

²ento eni the cing’ jugwokne ku jukurpiny bende cil i nindo ma won ung’olo.

³Wan bende kumeno, ma fodi wa nyithindho, wakowabedo ng’eca the cik ma kwong’a mi ng’om:

⁴ento ka nindo m’uromo wok, Mungu oro Wode, ma nyaku nyolo, ma junyolo the cik,

⁵kara ewar ju ma gini the cik, kara wanwang’ dwok ma judwoko kowa ni wote.

⁶Man kum wubedo wote, Mungu oro Tipo pa Wode i adundewa, m’uywak kumae, Abba, Vwa.

⁷Ka kumeno in i jamiru kendo ngo, ento i wode re: man tek i wode, meca in i jacampacu ni kum Mungu.

⁸Ento i rundi maeca, ma fodi wung’eyo Mungu ngo, wu ng’eca igi ma ku koth kum gi mungu ngo;

⁹ento kawono ma wudaru ng’eyo Mungu kadi ma sagu Mungu daru ng’eyowu, Wulokru kendo nedi wudok kum cik ma kwong’a ma ng’ic mi can de, ma wuyenyo wubed ng’eca i ie kendo?

¹⁰Wukwiro ceng’, ku dwi, ku nindo, ku rundi de.

¹¹Abelworowu, kuno nyo amula iwu ku tic mananu.

¹²Abekwayuwu, umego, ya wubed calu an, kum an bende adoko calu wun. Wutima rac ungo i gin moko:

¹³ento wung’eyo nia kum mulima m’i kuma ayero lembanyong’a ma juboth ko iwu ku kwong’a:

¹⁴e maeno ma en e abidhe iwu i kunia wucayu ngo, kadi wukwero de ngo; ento wujola calu malaika pa Mungu, cil calu Kristu Yesu.

¹⁵Ka kumeno kulula mu lund ubedo kani? kum ayero piwu, nia, tek ecopre, kuno di wuwodho weng’wu woko wudong’ wumiogi ira.

¹⁶Ka kumeno adoko jadegi mu kum ayero iwu lemandha?

¹⁷Githokowu kud avane ku yo ma ber ungo; eyo, giyenyo gigeng’wu, kara wuyenygi.

¹⁸Ento e ber tek juthokowu kud avane kum lembe ma ber i nindo ceke, ere kinde m’ani i beng’wu kende ngo.

¹⁹Nyithindho para ma thindho, m’abesendra i kumwu ku masendi ma junyol ko cil maram Kristu bidongo ko i iwu,

²⁰ento nwang’u ayenyo nia wabed wakudu kawono, man alok dwanda; kum cwinya bedo jiji i kumwu.

²¹Wuwac ira, wun ma wuyenyo wubed the cik, wuwinjo cik ungo:

²²Kum egore, nia Ibrahim wote nuti ario, acel m’enyolo ku nyaku ma nyalwak, acel ke ku nyaku manyoma.

²³Ento wod nyalwak junyolo ni kum kum; ento wod nyaku m’anyoma re ni kum lembang’ola.

²⁴Gin maeni lembabola ni i igi: kum mon maeni gi lembariba ario; acel m’uai wi got Sinai, m’unyolo nyithindho ni ng’eca, ma en e Hagar.

²⁵Nie Hagar maeni en e got Sinai i Arabia, man jupore ku Yerusalem ma kawono: kum en eni i ng’eca ku nyithindho pare.

²⁶Ento Yerusalem ma malu bedo agonya, ma en e megwa.

²⁷Kum egore kumae, Anyong’a negi, in i jamugumba m’inyol ungo; Goi dhogi man ikok akoka, in m’isendri ngo ku nyolo nyodo: Kum nyithindho pa ng’atu m’ubedo kende sagu pa ng’atu ma ju cware.

²⁸Nie wan, umego, calu Isak ubedo, wabedo nyithindho mi lembang’ola.

²⁹Ento calu ng’atu ma yang’ junyolo ni kum kum unyayu ragedo kum ng’atu ma junyolo ni kum Tipo, e ebedo kumeno kawono bende.

³⁰Ento lembagora pa Mungu wacu nik ang’o? Riem nyalwak woko giku wode: kum wod nyalwak bicamu pacu ngo giku wod nyaku m’anyoma.

³¹Kum kumeno, umego, wan wa nyithindho pa nyalwak ungo, ento pa nyaku m’anyoma.