Read Alur Juefeso 1 Bible Online

Juefeso 1 - Alur bible

Juefeso 1

¹Paolo, ma jakwenda pa Kristu Yesu ni kum yeny ma Mungu yenyo, ni jumaleng’ ma ni i Efeso, man jumandha i Kristu Yesu:

²Bero iwu man kwiocwiny m’uai ba Mungu ma Wegwa man Rwoth Yesu Kristu.

³Mugisa ni Mungu ma Won Rwoth mwa Yesu Kristu, m’umio mugisa iwa ku ba mugisa ceke mi tipo i ka mi polo i Kristu:

⁴cil calu yang’ elwong’owa i ie ka fodi theng’om kuthekre ngo, nia wabed leng’ ma poyo de mbe i wang’e i mer:

⁵nwang’u elar eketho wa ni dwok ma judwoko kowa ni wote ire gire ni kum Yesu Kristu, calku mutoro mi yeny ma ie yenyo,

⁶ni pak mi dwong’ mi berone, m’edhenyo bwom iwa i Jamer;

⁷ma wanwang’u war i ie ni kum rimbe, ni wek mi kier mwa, calku lonyo mi berone,

⁸m’eketho usagre i bang’wa i rieko ceke ku riu de,

⁹m’eketho wang’eyo giramung’a mi yeny m’eyenyo, calku mutoro ma ie wacu nik ebitimo i ie

¹⁰kara i nindo mi pong’ mi rundi, ecok kwai giki ceke i Kristu, giki m’i polo, ku giki ma wi ng’om bende; i ie, awacu,

¹¹ma i ie bende judwokowa ni camupacu, nwang’u elar ebedo aketha ku kwong’a calku yeny ma ie yenyo m’etimo gin ceke m’elubo ko lembapora mi yeny ma ie yenyo;

¹²kara wabed ni pak mi dwong’ pare, wan ma walar wageno i Kristu;

¹³i ie wun bende, ma wudaru winjo lembe mi lemandha, ma en e lembanyong’a mi both ma juboth ko, i ie, nwang’u wudaru yio bende, juketho ayi i kumwu ni kum Tipo Maleng’ mi lembang’ola,

¹⁴ma en e mukwatu mi camupacu mwa, ni war mi piny pare gire, ni pak mi dwong’ pare.

¹⁵Kum lembe nini an bende, m’adaru winjo pi yioyic ma ni i kindwu i Rwoth Yesu, man ke mer ma wunyutho yo ba jumaleng’ ceke,

¹⁶aweko ki ngo nifoyo foc piwu, m’ayero ko piwu i rwo para;

¹⁷kara Mungu pa Rwoth mwa Yesu Kristu, ma Wego mi dwong’, umi iwu tipo mi rieko ku nyuth mi ng’ec ma jung’eye ko;

¹⁸ma wang’ mir adunde mu bedo ma der ucare, kara wung’ei karamb genogen mi lwong’o pare, karamb lonyo mi dwong’ mi camupacu pare i jumaleng’,

¹⁹man karamb dwong’ ma apila mi tego pare yor i bang’wa ma wayio, calku timo maeno mi tego mi tek pare

²⁰m’etimo i Kristu, kan eting’e ku kind ju m’utho, man eketho ejany yo ku cinge ma yor acwic i ka mi polo,

²¹malu ngbir wi bimobim, ku ng’ol, man tego, ku kero, man wi nying’ ceke kubang’gi kubang’gi ma jucaku, i ng’om maeni kende ngo, ento i maeno ma bibino bende;

²²man eketho gin ceke bed wor the tiende, man emie ya ebed wie wi gin ceke ni kanisa,

²³ma en e kume, pong’ pare m’epong’o ceke i ceke.