Read Alur Jufilipi 4 Bible Online

Jufilipi 4 - Alur bible

Jufilipi 4

¹Kum kumeno, umego ma jumer ma avawu benega, ma mutoro para man jamkermiwic, wucung ki ki ki kumeno i Rwoth, jumerna.

²Ajuko Euodia, man ajuko Suntuke, ya gibed ku pidoic acel i Rwoth.

³Eyo, akwei ma tek bende, jatic ma ku mberembere andha, kony mon maeni, kum wamula ku tic wakugi i lembanyong’a ma juboth ko, ku Klement bende, man jutic wada m’udong’ de, ma nying’gi ni i kitabu mi kwo.

⁴Anyong’a negwu thiri thiri i Rwoth: awacu kendo, Anyong’a negwu.

⁵Wek mwonyolembe mu ung’eire ni dhanu ceke. Rwoth ni ceng’ni.

⁶Cwinywu kud uring kum gin moko ki; ento i gin ceke ku rwo man kwayukwac ku foyofoc wuwek penji mu ung’eire ni Mungu.

⁷Man kwiocwiny pa Mungu, ma sagu ng’eyong’ec ceke, bikuro adundewu ku pidoiwu i Kristu Yesu.

⁸Aha a, umego, gin ma tek gin andha, gin ma tek gi mi yung, gin ma tek gi pwe, gin ma tek gi leng’, gin ma tek gi mi mer, gin ma tek gi rwonglembe ma ber; tek bero moko ni i kume, tek pak moko ni i kume, e iwu pid kum giki maeni.

⁹Gin ma wugamu ng’eyo con, man wujolo man wuwinjo man wuneno i ia de, wutim gin maeni: e Mungu mi kwiocwiny bibedo kudu. Foc pi Giramia mi Jufilipi

¹⁰Ento anyong’a nega dit i Rwoth, kum kawono dong’ pidoic mu ma kum lembe para yepo; i maeni iwu pido andha, ento fodi wunwang’u nindo ma kakare ngo.

¹¹Ayero kum canpiny m’unega ngo: kum agamu ng’eyo con, i bedo ma tek abedo ko, e cwinya bedo m’ecungo i ie.

¹²Ang’eyo maram jujwigri ko, ang’eyo maram jusagri ko bende: i gin ceke man i gin ceke kubang’gi kubang’gi agamu ng’eyo lembamung’a nini con, ku bedo ku yeng’o man ku kec bende, ku sagri ku bedo ku canpiny bende.

¹³Acopo timo gin ceke ni kume m’emio ira tego.

¹⁴Ento wutimo dre ya waribra wakudu i can para.

¹⁵E wun bende wung’eyo giwu, wu Jufilipi, nia i thekri mi lembanyong’a ma juboth ko, kinde m’aai i Makedoni, kanisa moko mbe ma waribra wakugi i lembe mi mio ku gamu de ndhu wun wu kendwu;

¹⁶kum cil i Tesaloniki wuoro wang’ acel man kendo kum lembe mi canpiny m’unega.

¹⁷En e kum giramia ma nia ayenyo ngo; ento ayenyo nyingwu e m’ucikusagu asaga ni wel mu.

¹⁸Ento abedo ku gin ceke, man asagra: ayeng’, kum adaru gamu giki m’uai i beng’wu bang’ Epafrodito, en e ng’wic gin ma ng’wi ng’ar, en e lam ma yire, ma nyayu mutoro i Mungu.

¹⁹Man Mungu para bimio iwu gin ceke ma cande ni i kumwu calku lonyo pare i dwong’ ni kum Kristu Yesu.

²⁰Nie dwong’ ma rondo ku rondo ubed ni Mungu mwa man Wegwa. Amen.

²¹Wumoth jumaleng’ ceke kubang’gi kubang’gi ma gini i Kristu Yesu. Umego ma wabedo wakugi de gimothowu.

²²Jumaleng’ ceke gimothowu, ma sagu dit ju ma gi juot pa Kaisari.

²³Bero pa Rwoth Yesu Kristu bed ku cwinywu.