Read Alur 1 Jutesaloniki 3 Bible Online

1 Jutesaloniki 3 - Alur bible

1 Jutesaloniki 3

¹Kum kumeno ka wacopo twio cwinywa kendo ngo, iwa pido nia e ber y a wadong’ i Athene kendwa;

²e waoro Timoteo, m’umegwa man jatic pa Mungu i lembanyong’a ma juboth ko pa Kristu, kara eketh wucungi, man kara ejukwu kum yioyic mu;

³kara ng’atu moko cwinye kud uringi kum ruvwa maeni; kum wung’eyo giwu nia jukethowa pi maeni.

⁴Kum andha, kinde ma wanuti wakudu, walar wayero iwu nia wabisendra ku ruvwa; cil calu etimbre, e wun wung’eyo.

⁵Kum lembe nini an bende, kan acopo twio cwinya kendo ngo, aoro kara ang’ei yioyic mu, kara jabidhe kud ubidhwu ku yo moko, tic ma wamula kudo maru bedo mananu.

⁶Ento ka Timoteo dwogo i bang’a kawono m’eai ko i beng’wu, man ekelo iwa rwonglembe ma ber mi yioyic mu ku mer mu, ya poi mu ma thiri thiri piwa e dre, ma ava nenowa benegowu, cil calu ava nenowu benegowa;

⁷kum lembe nini, umego, wajukra piwu i mono mwa ku ruvwa mwa ni kum yioyic mu:

⁸kum kawono wa bedo, tek wucungo ki i Rwoth.

⁹Kum foyofoc ma nedi ma wacopo mio kendo ni Mungu piwu, kum anyong’a ceke m’unegowa piwu wang’ Mungu mwa;

¹⁰ma diewor ku dieceng’ de warwo apila kara wanen weng’wu, man kara waketh gin m’urem i yioyic mu dok ndhu cu?

¹¹Nie dong’ Mungu mwa man Wegwa en, ku Rwoth mwa Yesu, unyuth yo mwa i beng’wu:

¹²man Rwoth uketh mer mu unyai esagre de ng’atuman ni wadi man ni wadi, man ni dhanu ceke, cil calu wan bende iwu;

¹³kara eketh adundewu cung ma adote mbe i leng’cwiny wang’ Mungu mwa man Wegwa, i bino pa Rwoth Yesu mwa ku jupare maleng’ ceke.