Read Alur 1 Jutesaloniki 4 Bible Online

1 Jutesaloniki 4 - Alur bible

1 Jutesaloniki 4

¹Aha a, umego, wakwayuwu man wajukowu i Rwoth Yesu, nia, calu wujolo i bang’wa maram maku wuwoth ko wunyai ko mutoro i Mungu, cil calu wubewotho, kara wusegru kendo kendo.

²Kum wung’eyo maram lembang’ola ma wamio iwu ni kum Rwoth Yesu bedo ko.

³Kum maeni en e yeny ma Mungu yenyo, ndhu dwokrileng’ mu, nia wuceru ni tarwang’;

⁴nia ku ba dhanu nzu m’i kindwu ng’atuman ung’ei bimo kume gire i dwokrileng’ man i yung,

⁵i ayiri mir awanya ma rac ungo, cil calu Thekdhanumange ma kung’eyo Mungu ngo;

⁶ng’atu moko kud ukadh kieu, etim rac de bang’ umin i lembe nini: kum Rwoth en e jacul kwor kum gin maeni ceke, calu wan bende walar wapoyowu man watuco.

⁷Kum Mungu lwong’owa pi sasa ngo, endre i dwokrileng’.

⁸Ka kumeno ng’atu m’ukwero, meca ekwero dhanu ngo, ento Mungu, m’emio Tipo Maleng’ pare iwu.

⁹Ento pi mer mi utumego can lembe ma nia ng’atu moko gor iwu negowu ngo: kum Mungu ponjowu giwu ya wumeru;

¹⁰kum wutime andha ni umego ceke ma gini i Makedoni ngung’. Ento wajukowu, umego, kara wusegru asaga;

¹¹man iwu pid ya wubed yo, y a wutim tic ma mu bende, ya wutim tic ku cingwu, cil calu wang’olo iwu;

¹²kara wuwoth calu m’umaku piny ni ju ma woko, man kara can gin moko kud unegwu.

¹³Ento wayenyo kud wubed cobo pi ju m’unindo, umego; kara can kud unegwu, cil calu dong dhanu, ma genogen umbe kugi.

¹⁴Kum tek wayio nia Yesu tho man ecer kendo, kumeno ju ma ginindo i Yesu bende Mungu bikelogi gikugi.

¹⁵Kum wawacu maeni iwu ku lembe pa Rwoth, nia wan ma wabedo kwo, ma wadong’ ni bino pa Rwoth, wabitelo yo ki ngo ni ju ma ginindo.

¹⁶Kum Rwoth ku kite biai i polo biloro piny, ku kok ma dit, ku dwand malaika ma dit de, man kud agwara pa Mungu bende: e ju m’utho i Kristu gibilar cer;

¹⁷e ka wan ma wabedo kwo, ma wadong’, jubilund ting’owa malu wakugi i afuru, nirombo ku Rwoth i lietho; e kumeno wabidong’ bedo nja ku Rwoth.

¹⁸Kum kumeno dong’ wujukru ku lembe maeni.