Read Alur 1 Jutesaloniki 5 Bible Online

1 Jutesaloniki 5 - Alur bible

1 Jutesaloniki 5

¹Ento pi nindo ku oro, umego, can lembe moko ma nia jugor iwu negowu ngo.

²Kum wung’eyo giwu cu nia ceng’ pa Rwoth ubino kumeno calu jakwo ku diewor.

³Kinde ma gibewacu kumae, Kwiocwiny ku bedomoth, e nyoth ulund ubino i wigi ndhu ndhu nica, calu raoc ma goyo dhaku ma ie nuti; man gibiboth ki ngo.

⁴Ento wun, umego, wuni i mudho ngo, ma nia ceng’ nino unwang’wu calu jakwo:

⁵kum kewu ceke wu wot mi der, man wu wot mi ceng’: wan wa mi diewor ungo, kadi mi piny ma col de ngo;

⁶kum kumeno dong’ ku wanindu, calu dong dhanu, ento dong’ wakur wabed nger de.

⁷Kum ju m’unindo ginindo ku diewor; man ju ma gimer amera gimer ku diewor.

⁸Ento dong’ wan, kum wa mi ceng’, wabed nger, waroi asi mi yioyic ku mer bende; man ka sabu mir umbu, waketh genogen mi both.

⁹Kum Mungu ketho wa ngo ni kwinyo, ento kara wanwang’ both ni kum Rwoth mwa Yesu Kristu,

¹⁰m’utho piwa, kara, kadok wabedo neno kadi wanindo, wabed karacelo wakugi.

¹¹Kum kumeno dong’ wujukxu, man wutengru, cil calu wubetimo bende.

¹²Ento wakwayuwu, umego, ya wung’ei ju ma gimuli ku tic i kindwu, man gini i wiwu i Rwoth, man gijukowu;

¹³man wufoigi dit apila i mer kum tic migi. Wubed ku kwiocwiny i kindwu giwu.

¹⁴Man w akwayuwu, umego, wujuk ju ma gitimbri rac, wudwok cwiny ju ma cwinygi tek ungo, wujeng ju m’ubedo ng’ic, wubed ku mwonyolembe ma jumwonyo hai yo ba dhanu ceke.

¹⁵Nen nia ng’atu moko kud ucul gin ma rac ni wadi ka wang’ gin ma rac; ento elub pare tok gin ma ber thiri thiri, ng’atuman ni wadi man ni wadi, man ni dhanu ceke.

¹⁶Anyong’a negwu thiri thiri;

¹⁷wurwo areri;

¹⁸wumi foyofoc i gin ceke: kum maeni yeny ma Mungu yenyo i Kristu Yesu yor i beng’wu.

¹⁹Kud wucer Tipo;

²⁰kud wucai lembila;

²¹wuponj gin ceke; wuceru wi maeno m’e ber;

²²wuceru ni dubo ma mba mba ceke.

²³Man Mungu mi kwiocwiny en edwokwu leng’ njwa; man dong’ cwinywu ku kwo mu ku kumwu gibed kubang’gi: ma adote mbe i bino pa Rwoth mwa Yesu Kristu.

²⁴En e ng’atu mandha m’ebelwong’owu, m’ebitime bende.

²⁵Umego, wurwo i kumwa.

²⁶Wumoth umego ceke ku cwiocwic ma leng’.

²⁷Ang’olo iwu ku Rwoth ya jusom waraga nini ni umego ceke.

²⁸Dong’ bero pa Rwoth mwa Yesu Kristu bed kudu.