Read Alur Yocuwa 1 Bible Online

Yocuwa 1 - Alur bible

Yocuwa 1

¹Nie etimbre yo ng’ei tho pa Musa ma jatic pa Yehova, nia Yehova weco ku Yocuwa ma wod Nun, ma jatic pa Musa, ewacu kumae,

²Musa ma jatic para tho; ka kumeno kawono ai malu, kadh loka Yordan maeni, in, ku dhanu maeni ceke, ba ng’om m’amio igi, en e ni nyithindho mir Israel.

³Ka ceke ma die tiendwu binyono, amie iwu, calu ayero ni Musa.

⁴Ugambre i langa, ku ng’om maeni Lebanon, cil kum kulo ma dit, en e kulo Frati, ng’om ceke mi Juhiti, man ba nam ma dit yo ku mwonyceng’, bibedo kieu mu.

⁵Ng’atu moko mbe ma bicopo cungo i weng’i i nindo ceke m’ibedo ie kwo: calu abedo ku Musa, abibedo kudi de kumeca; abirem iri ngo, kadi abikuni de ngo.

⁶Bed tek man ku tegocwiny ma ber; kum ibiketho dhanu maeni gicam pacu mi ng’om m’akwong’o ni kwaru gi nia abimio igi.

⁷Ento bed tek man ku tegocwiny ma dit, kara ikur itim de calku cik kpo, ma Musa ma jatic para ng’olo iri: kud ilokri kud i bang’e yo ku cingi ma yor acwic kadi ma yor acam, kara ibed ku mierolembe ka ceke ma tek icidho i ie.

⁸Kitabu maeni mi cik biai kud i dhogi ngo, ento ibipido pire dieceng’ ku diewor, kara ibed ku weng’i m’itim ko calku gin ceke m’ugore i ie: kum tek kumeno ibiketho yo peri bed miero, man ibilund timo ku rieko.

⁹Ang’olo iri ngo? Bed tek man ku tegocwiny ma ber; lworo kud unegi, kadok cwinyi de kud ung’abre: kum Yehova Mungu peri ni i beng’i i ka ceke ma tek icidho i ie.

¹⁰Yocuwa lund ung’olo ni jego mi dhanu, ewacu kumae,

¹¹Wukadh ku kind gonjo, man wung’ol ni dhanu, wuwac kumae, Wuyik cemo iwu; kum ka fodi ceng’ adek kukadhu ngo wubikadhu loka Yordan maeni, kara wumond wumwony ng’ombe, ma Yehova Mungu mu mio iwu kara wumwonye.

¹²Man Yocuwa wacu ni Jurubeni, man ni Jugadi, man ni ng’et suru pa Manase, ewacu kumae,

¹³Wupoi kum lembe ma Musa ma jatic pa Yehova ng’olo iwu, m’ewacu kumae, Yehova Mungu mu mio iwu yom, man ebimio ng’om maeni iwu.

¹⁴Mon mu, ku nyithindho mu ma thindho, ku lim mu, gibibedo i ng’om ma Musa mio iwu loka Yordan; ento wubikadhu lokaca i wang’ juwedu ku jamtho, dhanu ceke ma tek gi jurukara, man wubikonyogi;

¹⁵cil ma Yehova mio ko yom ni juwedu, calu emio iwu, man gin bende gimwonyo ng’om ma Yehova Mungu mu mio igi: ka wubilund dwogo i ng’om ma piny mu, e wubimwonye, ma Musa ma jatic pa Yehova mio iwu loka Yordan yo ku wokceng’.

¹⁶E giloko lembe ni Yocuwa, giwacu kumae, Gin ceke m’ing’olo iwa wabitimo, man ka ceke ma tek iorowa wabicidho.

¹⁷Calu wawinjo ba Musa i gin ceke, wabiwinjo i beng’i kumeca: ento Yehova Mungu peri re bed kudi, calu naka ebedo ku Musa.

¹⁸Ng’atu ma tek bijai kum lembang’ola peri, man ebiwinjo lembe peri ngo i gin ceke m’ing’olo ire, jubinege: ento ibed tek man ku tegocwiny ma ber.