Read Alur Yocuwa 18 Bible Online

Yocuwa 18 - Alur bible

Yocuwa 18

¹Man udul bo mi nyithindho mir Israel gicokri gigi karacelo i Cilo, man giguro hema mi cokri keca: e ng’om umondo igi i wang’gi.

²Man suru abiro dong’ kind nyithindho mir Israel, ma fodi jukupoko aba migi ngo.

³Man Yocuwa wacu ni nyithindho mir Israel kumae, Wugalu rokani ma fodi wukumwonyo ng’ombe ngo e, ma Yehova, Mungu pa wegwu, mio iwu?

⁴Wugoi iwu wi dhanu adek ku ba suru mu: e abiorogi, man gibiai, e gibiwotho kud i ng’ombe, man gibipore calkud aba migi; man gibidwogo i bang’a.

⁵E gibipoke i ng’ete abiro: Yuda bibedo i kieu pare yor ariwa ma piny, man ot pa Yusuf bibedo i kieu migi yor ariwa ma malu.

⁶Man wubiporo ng’ombe i ng’ete abiro, man wubikelo lembene keni i bang’a; e abigoyo gagi iwu keni i wang’ Yehova Mungu mwa.

⁷Kum Julawi gibedo ku makapiny migi ngo i kindwu; kum lamulam pa Yehova en e aba migi: man Gad ku Ruben ku ng’et suru pa Manase gidaru maku aba migi loka Yordan yo nyangu, ma Musa ma jatic pa Yehova mio igi.

⁸E dhanune giai man gicidho: man Yocuwa ng’olo igi gi ju ma gicidho niporo ng’om, ewacu kumae, Wuciwuwoth kud i ng’ombe, man wupore, man wudwog kendo i bang’a; e abigoyo gagi iwu keni i wang’ Yehova i Cilo.

⁹Man dhanune gicidho gikadhu kud i ng’ombe, man gipore ni kum adhura ni ng’ete abiro i kitabu; man gidwogo ba Yocuwa i kagonjo i Cilo.

¹⁰E Yocuwa goyo gagi igi i Cilo i wang’ Yehova: E Yocuwa poko ng’ombe keca ni nyithindho mir Israel calku makapiny migi.

¹¹Man gagi mi suru mi nyithindho pa Benyamin uwodhre calku wat migi: man kieu mi gagi migi wodhre i kind nyithindho pa Yuda ku nyithindho pa Yusuf.

¹²Man kieu migi mi ng’et ng’om ma yor ariwa ma malu gambre kum Yordan e kieu migi idho malu kum ng’et Yeriko, man eidho malu i kind ng’om gudi yo reto; e kawokne en e yamba mi Beth-aven.

¹³E kieu uai ku kuca ukadhu ba Luz, i ng’et Luz (ma en e Beth-el), yor ariwa ma piny; e kieu loro piny kum Ataroth-adar, kum got ma ni yor ariwa ma piny ni Beth-horon ma piny.

¹⁴Man kieu ai keca, man edhokre yo reto kum ng’et ng’om yor ariwa ma piny, ku ba got ma ni i wang’ Beth-horon yor ariwa ma piny; man kawokne en e kum Kiriath-bal (ma en e Kiriath-jearim), ma adhura mi nyithindho pa Yuda: maeni ng’et ng’om ma yo reto.

¹⁵Man ng’et ng’om ma yor ariwa ma piny ugambre kum kajik mi Kiriath-jearim; e kieu cidho yo reto, man kawokne en e kum wi kulo mi pi mi Neftoa;

¹⁶E kieu loro cil kum kajik mi got ma ni i wang’ poga pa wod Hinom, ma ni i poga mi Refaim yor ariwa ma malu: man eloro piny ba poga pa Hinom, ba ng’et Jayebusi yor ariwa ma piny, man eloro piny kum En-rogel;

¹⁷man ecidho yor ariwa ma malu, e kawokne en e En-cemec, man ecidho kum Geliloth, ma en e yo ba ka m’aidha mir Adumim; man eloro ba kidi pa Bohan ma wod Ruben;

¹⁸man ekadhu i ng’et yo kum Araba yor ariwa ma malu, man eloro cil kum Araba;

¹⁹man kieu kadhu i ng’et Beth-hogla yor ariwa ma malu; man kawok mi kieu en e kum pi m’uroire yor ariwa ma malu mi Nam Kadu, i kajik mi Yordan ma yor ariwa ma piny: maeni en e kieu ma yor ariwa ma piny.

²⁰Man Yordan en e kieune i ng’et ng’om ma yo nyangu. Maeni en e aba mi nyithindho pa Benyamin, ni kum kieune m’udhoke gbur, calku wat migi.

²¹Nie adhura mi suru mi nyithindho pa Benyamin calku wat migi en e Yeriko, man Beth-hogla, man Emek-keziz,

²²man Beth-araba, man Zemaraim, ku Beth-el,

²³man Avim, man Para, man Ofra,

²⁴man Kefaramoni, man Ofni, ku Geba; adhura apar wi ario ku pacune:

²⁵Gibeon, man Rama, man Beroth,

²⁶ku Mizpa, man Kefira, ku Moza,

²⁷man Rekem, man Irpel, ku Tarala,

²⁸man Zela ku Elef, man Jayebusi (ma en e Yerusalem), man Gibeath, ku Kiriath; adhura apar wi ang’wen ku pacune. Maeni en e aba mi nyithindho pa Benyamin calku wat migi.