Read Alur Yocuwa 2 Bible Online

Yocuwa 2 - Alur bible

Yocuwa 2

¹Man Yocuwa ma wod Nun uoro dhanu ario kud i Citim ling’ ni julib, ewacu kumae, Wucidhi, wunen ng’ombe, ku Yeriko. Man gicidho, e gimondo i ot pa won asara ma nyinge Rahab, man givuto keca.

²E juyero ni ubimo m’i Yeriko, juwacu kumae, Nen, dhanu mi nyithindho mir Israel gibino keni ku diewor ma tin nilibo ng’om maeni.

³E ubimo m’i Yeriko oro kwenda ba Rahab, ewacu kumae, Wodh dhanu m’ubino i beng’i woko, m’umondo i ot peri; kum gibino nilibo ng’om maeni ceke.

⁴E dhakune gamu dhanu arione, e ekanugi; man ewacu kumae, Eyo, dhanune gibino i bang’a, ento ang’eyo ka ma giai i ie ngo:

⁵man etimbre calu i kinde ma juciko ie dhugang’, kinde ma piny ni br br, nia dhanune giwok woko; ka ma dhanune gicidho i ie re ang’eyo ngo: wulub tokgi mor mor; kum wubirubogi.

⁶Ento nwang’u eterogi malu wi ot, man ekanugi the tiend atutu, m’epedho jolo wi ot.

⁷E dhanu gilubo tokgi yo ba Yordan cil i ka ma jukadhu ku tielo: e kinde ma ju m’ulubo tokgi giai, giciko dhugang’.

⁸E ka fodi givuto piny ungo, ebino malu i bang’gi wi ot;

⁹man ewacu ni dhanune kumae, Ang’eyo nia Yehova mio ng’ombuni iwu, man nia lworo mu podho i wiwa, man nia dhanu ceke m’i ng’ombuni ging’oi i weng’wu.

¹⁰Kum wawinjo maram Yehova dwono ko pi m’i Nam Makwar i weng’wu, ka wuai i ng’om Misiri; man gin ma wutimo kum ubimo ario mi Juamori, ma gini loka Yordan, kum Sihon man kum Og, ma wunyothogi pet.

¹¹E kinde ma wawinjo maeni, adundewa ng’oyo ndiri, kadok tipo moko mbe m’udong’ i ng’atu moko, piwu: kum Yehova Mungu mu, en e Mungu m’i polo ma malu, man i ng’om ma piny.

¹²Ka kumeno kawono, akwayuwu, wukwong’ ira ku Yehova, kum atimo ber i beng’wu, nia wun bende wubitimo ber kum ot pa vwa, man wumi ira giranyutha mandha;

¹³man nia wubibodho vwa ma kwo, ku ma, man utumira, ku nyimira, ku gin ceke ma gibedo ko, man wubibodho kwo mwa ni tho.

¹⁴E dhanune giwacu ire kumae, Kwo mwa kaka kwo mu, tek wuyero pi tic mwa maeni ngo; man ebibedo, kinde ma Yehova mio iwa ng’ombe, nia wabitimo ber man mandha i beng’i.

¹⁵Elund elurogi piny ku thol ku wang’ ot: kum ot pare ni wi ng’et gang’kidi, man ebedo wi gang’kidi.

¹⁶Man ewacu igi kumae, Wucidh kum got, kara ju m’ulubo ng’eiwu kud unwang’wu; man wupond kuca ceng’ adek, cil ma ju m’ulubo ng’eiwu bidwogo ko: e yo ku ng’eye wucopo cidho i yo mu.

¹⁷E dhanune wacu ire kumae, Kwong’ peri m’iketho wakwong’o bibedo umbe i wiwa.

¹⁸Nen, ka wamondo i ng’ombe, ibitwio thol maeni ma kwar i wang’ot m’ilurowa kudo: man ibicoko i beng’i i ot wuru, ku meru, ku utumeru, ku juudi pa wuru ceke.

¹⁹Man ebibedo, nia ng’atu ma tek biwok woko kud i dhugola mi ot peri i gengi, rimbe bibedo i wie, e lembe bibedo umbe i wiwa: man ng’atu ma tek bibedo karacelo kudi i ot, rimbe bibedo i wiwa, tek cing’ moko bedo i wie.

²⁰Ento tek iyero pi tic mwa maeni, wabilund bedo ma lembe mbe i wiwa kum kwong’ peri m’iketho wakwong’o.

²¹Man ewacu kumae, Dong’ ebed calku lembe mu kumeno. E ecikogi, man giai: e etwio thol ma kwar i wang’ot.

²²E gicidho, man giwok kum got, e gibedo keca ceng’ adek, maram dhanu m’ulubo tokgi dwogo ko: man ju m’ulubo tokgi giyenyogi i yo ceke, ento ginwang’ugi ngo.

²³E dhanu arione gilund gidwogo, man giloro ku wi got, e gikadhu lokaca, man gibino ba Yocuwa ma wod Nun; e giyero ire gin ceke m’utimbre i kumgi.

²⁴Man giwacu ni Yocuwa kumae, Andha Yehova mio ng’ombe ceke i cingwa; mange ke dhanu ceke m’i ng’ombe ging’oi i wang’wa.