Read Alur Yocuwa 20 Bible Online

Yocuwa 20 - Alur bible

Yocuwa 20

¹Man Yehova yero ni Yocuwa, ewacu kumae,

²Yer ni nyithindho mir Israel, wac kumae, Wuwodh adhura mi ringo, m’ayero pire iwu ku dhu Musa,

³kara janek m’unego ng’atu moko aka ngo m’eng’eyo de ngo ecopo ringo keca: man gibibedo iwu ni kapiei ni jaculkwoj rimo.

⁴E ebiringo bang’ adhura acel ma kind maeno, man ebicungo i kamondo mi dhugang’ mir adhurane, man ebiyero lembe pare i ith judongo mir adhura maeno; e gibijole i adhura i bang’gi, man gibimio ire kakare, kara ebed i kindgi.

⁵Man tek jaculkwoj rimo lubo toke, e gibimio janek i cinge ngo; kum egoyo wadi m’eng’eyo ngo, man nwang’u edage ngo.

⁶E ebibedo i adhura maeno, maram ebicungo ko i wang’ cokri mi lembapoka, maram tho pa jalam ma dit ma bibedo nuti i ceng’ maeca biwok ko: e janek bilund dok, man ebicidho bang’ adhura pare ma dhe, man ba ot pare ma dhe, bang’ adhura m’eringo kud i ie.

⁷Man gikoyo Kedec i Galilaya i ng’om gudi pa Naftali, man Cekem ku ng’om gudi pa Efraim, man Kiriath-arba (ma en e Hebron) i ng’om gudi pa Yuda.

⁸Man loka kulo Yordan ba Yeriko yo nyangu, gikoyo Bezer i yamba i pambu mi suru pa Ruben, man Ramoth i Gilead kud i suru pa Gad, man Golan i Bacan i suru pa Manase.

⁹Maeni en e adhura ma jung’olo ni nyithindho mir Israel ceke, man ni jawirok m’ubedo ni umondo i kindgi, kara ng’atu ma tek unego ng’atu moko aka ngo ecopo ringo keca, man kud etho ku cing’ jaculkwoj rimo, ma fodi k’ecungo i wang’ cokri ngo.