Read Alur Yocuwa 24 Bible Online

Yocuwa 24 - Alur bible

Yocuwa 24

¹Man Yocuwa coko suru ceke mir Israel i Cekem, man elwong’o judongo mir Israel, man juwigi, ku jupoklembe migi, man jego migi; e githieri gigi i wang’ Mungu.

²Man Yocuwa wacu ni dhanune ceke kumae, Yehova, Mungu mir Israel, uwacu kumae, Yang’ kwaruwu bedo loka Kulo, en e Tera, ma won Ibrahim, man won Nahor; e gitimo ni mungu mange.

³Man agamu kwaruwu ma Ibrahim ku loka Kulo, man atelo wie i ng’om Kanan ceke, man anyayu nyikwaye, man amio ire Isak.

⁴Man amio Yakobo kud Esau, ni Isak: man amio got Seir ni Esau, kara emwonye; man Yakobo giku nyithindho pare giloro piny i Misiri.

⁵Man aoro Musa giku Harun, man agoyo Misiri, calku maeno m’atimo i kinde: man yo ku ng’eye awodhowu woko.

⁶Man awodho kwaruwu woko kud i Misiri: e wuwok dhu nam; man Jumisiri gilubo tok kwaruwu ku magali man ku weg riuni cil kum Nam Makwar.

⁷E kinde ma gilwong’o Yehova, eketho mudho i kindwu wuku Jumisiri, man ekelo nam i wigi, e eumogi; man weng’wu neno gin m’atimo i Misiri: e wubedo i yamba ceng’ dupa.

⁸Man akelowu i ng’om mi Juamori, m’ubedo loka Yordan: e gikiedo kudu; man amiogi i cingwu, man wumwonyo ng’om migi: man anyothogi kud i weng’wu.

⁹Balak ma wod Zipor, m’ubimo mi Moab, elund eai man ekiedo kum Israel: man eoro elwong’o Balam ma wod Beor kara ekwong’wu;

¹⁰ento ayio ngo awinj Balam; ka kumeno emio mugisa iwu asu: kum kumeno abodhowu kud i cinge.

¹¹E wucidho loka Yordan; man wuwok kum Yeriko; man dhanu m’i Yeriko gikiedo kudu, gi Jaamori, man Japerizi, ku Jakanani, man Jahiti, ku Jagirgaci, man Jahivi, man Jayebusi; man amiogi i cingwu.

¹²Man aoro pino i weng’wu, m’uriemogi woko kud i weng’wu, gin ubimo ario mi Juamori; ku palamularu peri ngo, kadi kud atum peri de ngo.

¹³Man amio iwu ng’om ma wumulu ku tic ungo i wie, man adhura ma wugomo wun ungo, e wubedo i ie; man wucamu kum podho ulok man podho ulam ma wupidho wun ungo.

¹⁴Ka kumeno kawono wulwor Yehova, man wutim ire umbe abombi man i lemandha; man wukab mungu ma kwaruwu timo igi loka Kulo, man i Misiri cen; man wutim ni Yehova.

¹⁵E tek ebedo rac iwu ya wutim ni Yehova, wufoi tinuni ng’atu ma wubitimo ire; tek ni mungu ma kwaruwu timo igi loka Kulo, kadi ni mungu mi Juamori, ma wubedo i ng’om migi: ento an ku ot para, wabitimo ni Yehova.

¹⁶Man dhanu giloko lembe giwacu kumae, Dong’ ebed bor i kumwa nia wawek Yehova, kara watim ni mungu mange;

¹⁷kum Yehova Mungu mwa en e en m’ukelo wa ku kwaruwa malu kud i ng’om Misiri, kud i ot mi ng’eca, man m’utimo giranyutha maeno ma dit i wang’wa, man m’ugwokowa i yo ceke ma wacidho i ie, man i kind dhanu ceke ma wakadhu kud i kindgi;

¹⁸man Yehova riemo kodhidhanu ceke woko kud i wang’wa, en e Juamori m’ubedo i ng’ombe: ka kumeno wan bende wabitimo ni Yehova; kum en e Mungu mwa.

¹⁹Man Yocuwa wacu ni dhanune kumae, Wucopo timo ni Yehova ngo; kum en e Mungu ma leng’; en e Mungu ma janyeko; ebiweko woko kier mu kadi dubo mu de ngo.

²⁰E tek wuweko Yehova, man wutimo ni mungu ma juwirok, ebilund lokre man ebitimowu rac, ebinyothowu de, yo ng’ei ber m’etimo iwu.

²¹E dhanune giwacu ni Yocuwa kumae, Ungo; ento wabitimo ni Yehova.

²²E Yocuwa wacu ni dhanune kumae, Wun wu jumulembe i kumwu giwu nia wufoyo Yehova, ya wutim ire. Man giwacu kumae, Wan wa jumulembe.

²³Ka kumeno kawono dong’ wucor mungu ma juwirok cen ma gini i kindwu, man wulok adundewu ba Yehova, Mungu mir Israel.

²⁴E dhanune wacu ni Yocuwa kumae, Wabitimo ni Yehova Mungu mwa, man wabiwinjo dwande.

²⁵Kum kumeno Yocuwa timo lembariba ku dhanune i ceng’ maeca, man eketho igi cik ku lembapoka i Cekem.

²⁶Man Yocuwa goro lembe maeni i kitabu mi cik pa Mungu; man egamu kidi ma dit, man egure keca the bongu ma ni ceng’ni kamaleng’ pa Yehova.

²⁷E Yocuwa wacu ni dhanune ceke kumae, Nen, kidi maeni bibedo ni lembanyutha i kumwa; kum ewinjo lembe ceke pa Yehova m’eyero iwa ka kumeno ebibedo jamulembe i kumwu, kara kud wukwer Mungu mu.

²⁸Kum kumeno Yocuwa oro dhanune gicidho, ng’atuman bang’ aba pare man bang’ aba pare.

²⁹Man etimbre yo ng’ei gin maeni, nia Yocuwa ma wod Nun, ma jatic pa Yehova, utho, ma rundi pare doko dak acel kud apar.

³⁰Man giyike i kieu mir aba pare i Timnath-sera, ma ni i ng’om gudi pa Efraim, yor ariwa ma malu ni got mi Gac.

³¹E Israel utimo ni Yehova i nindo ceke pa Yocuwa, man i nindo ceke mi judongo m’ubedo kwo yo ng’ei Yocuwa, man m’ung’eyo tic ceke pa Yehova, m’etimo ni Israel.

³²Man cogo pa Yusuf, ma nyithindho mir Israel gikelo malu kud i Misiri, giyiko i Cekem, i ng’et ng’om ma Yakobo ng’iewo ba wot Hamor ma won Cekem ku ng’et mola ma tar dak acel: e gidoko ni aba ni nyithindho pa Yusuf.

³³Man Eleazar ma wod Harun utho; man giyike i ungulu got pa Finehaz ma wode, ma jumio ire i ng’om gudi pa Efraim.