Read Alur Yocuwa 6 Bible Online

Yocuwa 6 - Alur bible

Yocuwa 6

¹Nwang’u adhura Yeriko twire ndhu ni kum nyithindho mir Israel: ng’atu moko mbe m’uwok woko, ng’atu moko mbe de m’umondo i ie.

²E Yehova wacu ni Yocuwa kumae, Nen, aketho Yeriko i cingi, kud ubimone de, ku dhanu ma tek ma jurukara.

³E wubitieko adhurane, dhanu ceke mir ali, wubitieko adhurane wang’ acel. Ibitimo kumeni ceng’ abusiel.

⁴Man julam abiro biting’o agwara abiro mi tung rombe i wang’ sanduk: e i ceng’ mir abirone wubitieko adhurane wang’ abiro, e julam gibikudho agwara.

⁵Man ebibedo, nia, ka gikudho tung rombo hai, man ka wuwinjo, bang’ agwara, dhanu ceke bikok ku dwal ma dit; e gang’kidi mir adhurane birwombre kpe i ng’om, man dhanu biidho malu kubang’gi kubang’gi ng’atuman atira i wang’e.

⁶E Yocuwa ma wod Nun ulwong’o julam, man ewacu igi kumae, Wuting’ sanduk mi lembariba, man dong’ julam abiro giting’ agwara abiro mi tung rombe gitel ko yo i wang’ sanduk pa Yehova.

⁷E giwacu ni dhanu kumae, Wukadh, man wutiek adhura, man dong’ weg jamtho gitel yo i wang’ sanduk pa Yehova.

⁸Man etimbre kumeno, nia, kinde ma Yocuwa daru yero ni dhanu, julam abiro m’uting’o agwara abiro mi tung rombe i wang’ Yehova gikadhu, man gikudho agwara: e sanduk mi lembariba pa Yehova lubo ng’eigi.

⁹Man dhanu ma weg jamtho gitelo yo i wang’ julam m’ukudho agwara, man ju m’udong’ cen gilubo tok sanduk, julam ke wotho ku kudho agwara.

¹⁰E Yocuwa ng’olo ni dhanu, ewacu kumae, Kud wukoki, kadi dwendu de kud uwinjre, kadi lembe de kud uai kud i dhogwu, cil i ceng’ m’abiwacu ie iwu nia wukoki; e wubilund kok.

¹¹Ka kumeno eketho sanduk pa Yehova lworo adhura, ma gitieke wang’ acel: e gidwogo i kagonjo, man gigonjo i kagonjo.

¹²Man Yocuwa ai malu pir kugweno, e julam giting’o sanduk pa Yehova.

¹³Man julam abiro giting’o agwara abiro mi tung rombe gitelo ko yo i wang’ sanduk pa Yehova gicikucidho, e giwotho ku kudho agwara: e ju ma weg jamtho gitelo yo i wang’gi; man ju m’udong’ cen gilubo ng’ei sanduk pa Yehova, ma julam ke wotho ku kudho agwara.

¹⁴I ceng’ mir arionde gilworo adhura wang’ acel, e gidok i kagonjo: man gitimo kumeca ceng’ abusiel.

¹⁵E etimbre i ceng’ mir abirone, nia giai ka mombwa mi rupiny uthumo, e gilworo adhurane kumeca wang’ abiro: ento i ceng’ maeca gilworo adhurane wang’ abiro.

¹⁶Man etimbre i wang’ mir abirone, ka julam gikudho agwara, Yocuwa wacu ni dhanu kumae, Wuwoi; kum Yehova mio adhurane iwu.

¹⁷Man adhurane bibedo ni gin m’akwong’a ni Yehova, en ku gin ceke ma ni i ie: ndhu Rahab kende ma won asara e ma bibedo kwo, en ku ju ma gini kugi i ot ceke, kum ekanu jukwenda ma waoro.

¹⁸Ento wun, ndhu wugwokru giwu ni gin m’akwong’a, kara ka wukwong’e, kud wugam kum gin m’akwong’a; wumaru ketho udul mir Israel ubed akwong’a, man wusende.

¹⁹Ento mola ma tar ceke, ku mola ma kwar, kud agulu mi mola man mi nyunyu, gileng’ ni Yehova: jubikelogi i kakanpiny pa Yehova.

²⁰Kum kumeno dhanu giwoi, man julam gikudho agwara: e etimbre, ka dhanu giwinjo bang’ agwara, nia dhanu giwoi ku dwal ma dit, e gang’kidi podho kpe i ng’om, ketho nia dhanu giidho malu i adhura, ku ba dhanu ku ba dhanu ng’atuman atira i wang’e, e gimaku adhurane.

²¹E ginyotho gin ceke ma ni i adhura kot, co ku mon bende, nyithindho ku judongo de, man dhiang’ ku rombe, ku kana ginegogi ceke ku lak palamularu.

²²Man Yocuwa wacu ni dhanu ario ma gilibo ng’ombe kumae, Wucidh i ot pa won asara, man wuwodh dhakune woko kud i ie, ku gin ceke m’ebedo ko, calu wukwong’o ire.

²³E awobi ma julib gimondo man giwodho Rahab woko, ku won mire, man min mire, ku utumin mire, ku gin ceke m’ebedo ko; wat pare ceke bende giwodho woko; e gikethogi cen ku kagonjo mir Israel.

²⁴Man giwang’u adhurane ku mac, ku gin ceke ma ni i ie; ndhu mola ma tar, ku mola ma kwar, man agulu mi mola ku mi nyunyu, e ma giketho i kakanpiny mi ot pa Yehova.

²⁵Ento Rahab ma won asara, ku juot pa won, ku gin ceke m’ebedo ko, Yocuwa bodho ma kwo; e ebedo i kind Israel cil i ceng’ ma tin, kum ekanu jukwenda, ma Yocuwa oro kara gilib Yeriko.

²⁶Man Yocuwa cimogi ku kwong’ i nindo maeca, ewacu kumae, I wang’ Yehova kwong’ ubed wi ng’atu m’uwodhre man m’ugomo adhura maeni ma Yeriko: ebitheko there ku rwinyo pa kayu pare, man ebiguro dhugang’ne ku rwinyo pa wode ma cogo.

²⁷Kum kumeno Yehova bedo karacelo ku Yocuwa; man pire yik i ng’ombe ceke.