Read Alur Yocuwa 9 Bible Online

Yocuwa 9 - Alur bible

Yocuwa 9

¹Man etimbre, kinde ma ubimo ceke ma gini loka Yordan, i ng’om gudi, man i poga, man ma ni dhu wath ceke mi nam ma dit i nyim Lebanon, en e Jahiti, ku Jaamori, man Jakanani, ku Japerizi, man Jahivi, ku Jayebusi, giwinjo pi maeni;

²nia gicokri gigi karacelo, kara gikied ku Yocuwa man ku Israel, ku cwinygi m’ucungo acel.

³Ento ka dhanu m’ubedo i Gibeon giwinjo gin ma Yocuwa timo kum Yeriko man kum Ai,

⁴gin bende gitimo kud awondi, man gicidho gitimo de calu gi judhulembe, man gigamu gonia m’uti wi kana migi, kud usau pigulok, m’uti m’uyec de ma juthubo wang’e athuba,

⁵man wara m’uti ma juthubo wang’e athuba i tiendgi, man kendi m’uti i kumgi; man kwen ceke mi cemo migi utal ufur de.

⁶Man gicidho ba Yocuwa i kagonjo i Gilgal, man giwacu ire, man ku dhanu mir Israel kumae, Waai i ng’om ma bor: ka kumeno kawono wutim lembariba kudwa.

⁷Man dhanu mir Israel giwacu ni Juhivi kumae, Kuno nyo wubibedo i kindwa; e wabitimo lembariba wakudu nenedi?

⁸Man giwacu ni Yocuwa kumae, Wan wa jutic peri, E Yocuwa wacu igi kumae, Wu jukani? man wuai kani?

⁹Man giwacu ire kumae, Jutic peri giai kud i ng’om ma bor ngbir kum nying’ Yehova Mungu peri: kum wawinjo rwonglembe pare, ku gin ceke m’etimo i Misiri,

¹⁰man gin ceke m’etimo kum ubimo ario mi Juamori, ma gini loka Yordan, kum Sihon m’ubimo mi Hecbon, man kum Og m’ubimo mi Bacan, m’ubedo Actaroth.

¹¹Man judongo mwa ku dhanu ceke m’ubedo i ng’om mwa giweco i bang’wa, giwacu kumae, Wuting’ giracama i cingwu mi woth, man wuci wuromb kugi, man wuwac igi kumae, Wan wa jutic mu: man kawono wutim lembariba kudwa.

¹²Maeni kwen mwa ma wating’o m’e lieth ni giracama mwa kud i udi mwa i ceng’ ma watugo woth i ie ma wabino ko i beng’wu; ento kawono, nen, etal, man efur:

¹³man usaupigulok maeni, ma wapong’o, m’e nyen; man nen, giyec: man kendi mwa maeni ku wara mwa giti kum woth ma bor hai.

¹⁴E dhanu gigamu kum giracama migi, man gipenjo lembapora dhu Yehova ngo.

¹⁵E Yocuwa timo kwiocwiny kugi, man etimo lembariba kugi, kara ewekgi gibed kwo: man judongomawijo mir udul gikwong’o igi.

¹⁶Man ka ceng’ adek ukadhu yo ng’ei lembariba ma gitimo kugi, ya giwinjo nia gi judhugola migi, man nia gibedo i kindgi.

¹⁷E nyithindho mir Israel gitugo woth, man gitundo kum adhura migi i ceng’ mir adege. Nwang’u adhura migi en e Gibeon, ku Kifira, ku Beroth, man Kiriath-jearim.

¹⁸Man nyithindho mir Israel gigoyogi ngo, kum judongomawijo mir udul gikwong’o igi ku Yehova, Mungu mir Israel. Man udul ceke ging’ur kum judongomawijo.

¹⁹Ento judongomawijo ceke giwacu ni udul ceke kumae, Wakwong’o igi ku Yehova, Mungu mir Israel: ka kumeno kawono wacopo mulo kumgi ngo.

²⁰Wabitimo meni i kumgi, man wabiwekogi gibed kwo; kwinyo maru bedo i wiwa, kum kwong’ ma wakwong’o igi.

²¹Man judongomawijo giwacu igi kumae, Wek gibed kwo: kum kumeno gidoko jutong’ yen man jutwom pi ni udul ceke, calu judongomawijo yero igi.

²²E Yocuwa lwong’ogi, man eyero igi, ewacu kumae, Pirang’o wubombowa, wuwacu kumae, Wan wa bor hai kudu; ma wun ke wubedo i kindwa?

²³Ka kumeno kawono wubedo akwong’a, man kindwu moko biolo bedo jumiru dhara, jutong’ yen man jutwom pi mi ot pa Mungu para.

²⁴Man gidwoko lembe ni Yocuwa, giwacu de kumae, Kum eyere andha ni jutic peri, maram Yehova Mungu peri ng’olo ko ni jatic pare Musa ya emi ng’om maeni ceke iwu man enyoth dhanu ceke m’ubedo i ng’om maeno kud i weng’wu; ka kumeno lworo negowa dit pi kwo mwa ni kumwu, man watimo gin maeni.

²⁵Man kawono, nen, wani i cingi: calu ebedo ber man atira iri ya itim i kumwa, dong’ itim.

²⁶E etimo kumeca i kumgi, man ebodhogi kud i cing’ nyithindho mir Israel, kara ku gineggi.

²⁷E Yocuwa dwokogi i ceng’ maeca ni jutong’ yen man jutwom pi mir udul, man mi pemblam pa Yehova, cil i ceng’ maeni, i ka m’ebifoyo.