Read Alur 2 Jutesaloniki 2 Bible Online

2 Jutesaloniki 2 - Alur bible

2 Jutesaloniki 2

¹Nie w akwayuwu, umego, pi bino pa Rwoth mwa Yesu Kristu, man cokri mwa ma karacelo i bang’e;

²kara pidoiwu kud uring rr pio pio, kadok ang’aba de kud eng’abre, kadi ni kum tipo, kadi ni kum lembe, kadi ni kum waraga ma juwacu nyo ai i bang’wa, nia ceng’ pa Rwoth udhingo;

³kud wuyi ng’atu moko bombwu i yo moko ki: kum ceng’ nino biwok ungo, tek wingri kularuwok ungo, man ng’atu mi dubo de fokunyuthre ngo, ma en e wod nyoth,

⁴en m’ejai etingre gire kum gin ceke ma julwong’o ya Mungu kadi ma jurwo i bang’gi de; ketho ebedo i hekalu pa Mungu, m’ekethre gire ya en e Mungu.

⁵Wupoi ungo, nia, ma fodi wanuti wakudu, ayero iwu gin maeni?

⁶Man kawono wung’eyo maeno m’ucero, kara ebin enyuthre i nindo pare gire.

⁷Kum giramung’a mi camuco ubetimbre kawono: ento ng’atu acel nuti m’ubecero kawono, cil ma jubikabe woko kud i yo.

⁸E jaco nino bilund nyuthre, ma Rwoth Yesu binege ku lietho m’i dhoge, man ebidwoke mananu ku nyuth mi bino pare:

⁹en e ng’atuca, ma bino pare en e calku tim pa Jok ku tego ceke man giranyutha ku musana mi ndra,

¹⁰man i abombi ceke mi gondri ni ju m’urwinyo; kum gijolo mer mi lemandha ngo, kara gibothi.

¹¹Kum lembe nini Mungu oro igi tego mir awondi, kara giyi ndra:

¹²kara gin ceke jubin jupok lem migi gi ju m’uyio lemandha ngo, ento gibedo migi kud anyong’a i gondri.

¹³Ento maku wami foyofoc ni Mungu thiri thiri piwu be, umego ma jumer pa Rwoth, kum nia Mungu goyo wiwu ku kwong’a ni both i dwokrileng’ mi Tipo ku yioyic mi lemandha:

¹⁴elwong’owu ni maeni ni kum lembanyong’a mwa ma juboth ko, kara wunwang’ dwong’ pa Rwoth mwa Yesu Kristu.

¹⁵Kum kumeno, umego, wucung ki ki ki, wumok kum ponji ma juponjo kowu, kadok ku lembe, kadi ku waraga mwa.

¹⁶Nie Rwoth mwa ma Yesu Kristu en, man Mungu ma Wegwa m’emaruwa m’emio iwa juk mi nja ku genogen ma ber ni kum bero,

¹⁷ejuk adundewu man eketh ginyang’ i tic ceke ma ber kubang’gi kubang’gi ku lembe bende.