Read Alur 1 Timoteo 1 Bible Online

1 Timoteo 1 - Alur bible

1 Timoteo 1

¹Paolo, ma jakwenda pa Kristu Yesu calku lembang’ola pa Mungu ma Jalar mwa, man Kristu Yesu ma en e genogen mwa;

²ni Timoteo, ma nyathin para mandha i yioyic: Bero, ku kisa, man kwiocwiny m’uai ba Mungu ma Wego man Kristu Yesu ma Rwoth mwa.

³Calu ayero iri ikoibed i Efeso, kinde ma fodi abecidho i Makedoni, kara ing’ol lembe ya jumoko kud uponj ponji ma tung’,

⁴kadi ku giwinj lembuda man kathekdhanu ma thum ungo, ma nyayu penji mi piem re, ma sagu kuro lembe pa Mungu ma jukuro i yioyic.

⁵Ento kajik mi lembang’ola en e mer ma ai yo i adunde ma njwa, ku pidocwiny ma ber, man yioyic ma abombi mbe i ie:

⁶jumoko giweko gini gidong’ gikier kum lembe ma kite mbe;

⁷ayenya giyenyo gibed juponji mi cik, enke ging’eyo ngo gin ma giyero, kadok gin ma giyio bende.

⁸Ento wang’eyo nia cik en e ber, tek ng’atu moko time kakare,

⁹ma wang’eyo ko lembe nini, ya cik juciko ni ng’atu ma pwe ngo, ento ni ju ma juco, ku ju ma giwor ungo, man ni ju ma ayi Mungu mbe i kumgi, ku judubo bende, ni ju ma leng’ ungo, ku ju ma yero lembacidi, man ni ju ma nego wego, ku ju ma nego mego, ni ju ma nego nek,

¹⁰man ke ni ju ma timo tarwang’, ni ju ma gitimo sasa ku co wagi, ku ju ma kwalu dhanu, ku jundra, ku ju ma kwong’o kwong’ mi ndra, man ke ni gin mange ceke ma tek ukier kum lem ponji m’alili bende;

¹¹calku lembanyong’a ma juboth ko mi dwong’ pa Mungu ma Jamugisa, ma juketho i kora.

¹²Afoye m’emio ira tego, en e Kristu Yesu Rwoth mwa, kum ekwana ya an a ng’atu mandha m’egoyo wia eketha ko kum tic pare;

¹³ma naka an a jayer lembacidi, man jaragedo, man jarop bende: ento anwang’u kisa, kum atime cobo ma yioyic umbe;

¹⁴e bero Rwoth mwa usagre dit apila ku yioyic man mer ma ni i Kristu Yesu.

¹⁵Maeni lemandha, ma maku dhanu ceke giyi, nia Kristu Yesu bino i ng’om kara elar judubo; ma an a jaditne:

¹⁶endre kum lembe maeni anwang’u kisa, kara Yesu Kristu nyuth mwonyolembe pare ceke m’emwonyo hai i kuma, ma an a jaditne, ni lembapora ni ju ma bidong’ yie cen, cil i kwo ma rondo ku rondo.

¹⁷Nie dong’ yung ku dwong’ bende ubed ni Ubimo rondo ku rondo, m’etho ngo, m’enen ungo, m’e Mungu e kende, rondo ku rondo. Amen.

¹⁸Lembang’ola maeni ajengo i kori, nyathin para Timoteo, calku bila m’uyero piri, kara ikied lwiny ma ber kum lembe maeni;

¹⁹m’ibeceri wi yic m’iyio, ku pidocwiny ma cu; lembene jumoko giweko ketho yioyic migi nyothre:

²⁰Humenayo giku Iskander gini i kind joca; man amiogi ni Jok, kara juponjgi ya ku giyer lembacidi.