Read Alur 1 Timoteo 6 Bible Online

1 Timoteo 6 - Alur bible

1 Timoteo 6

¹Wek ju ma gini the mberembere ma gi jumiru gikwan judongo m’i wigi ya uromo ku yung ceke, kara nying Mungu ku ponjine de kud ucidre.

²Ju ma judongo m’i wigi de gi juyic, ku gicaigi, kum gi utumego; endre ma sagu wek gitim igi, kum gi juyic ku jumer bende ma ginwang’u kuloka ku timo ber. Ponj gin maeni man ijuk juk de.

³Tek ng’atu moko ponjo ponji ma tung’, ma k’eyio lembe ma alili de ngo, ma en e lembe pa Rwoth mwa Yesu Kristu, ku ponji de ma k’e calku bedo ma ayi Mungu ni kume ngo;

⁴meca etingre, m’eng’eyo gin moko de ngo, endre ebedo kud awanya va ng’atu ma kume lith kum penji ku piem mi lembe, kumira ai i maeni, ku por, ku cayucac, ku cwiny ma dieng’ kum lembe ma jukung’eyo there ngo,

⁵ku dhau mi dhanu ma rieko migi nyothre ma gimbe ku lemandha, ma giwacu nyo bedo ma ayi Mungu ni kume en e yoj kuloka.

⁶Ento bedo ma ayi Mungu ni i kume ku cwinyjo m’ucungo ti en e kuloka ma dit:

⁷kum wakelo gin moko i ng’om ungo, kadi wacopo ai ku gin moko de ngo;

⁸ento ka cemo ku kendi de nuti kudwa cwinywa bicungo kum gino.

⁹Endre ju ma giyenyo gibed julonyo gipodho i abidhe ku i uwic de man i kasegu ku i awanya ma rac ma akeca, wagi gin ma mwonyo dhanu i rwinyo ma jurwinyo man i kanyoth ma junyothri i ie bende.

¹⁰Kum mer ma jumaru ko sente en e ulag kwond dubo ceke: ma jumoko ma ava piny sagugi gikier kum yioyic, man gidhuiri gigi ku can ma dupa.

¹¹Ento in re, in i dhanu pa Mungu, ring gini; man ilub peri tok bedopwe, ku bedo ma ayi Mungu ni kume, ku yioyic, ku mer, ku twiocwiny, ku molcwiny.

¹²Kied lwiny ma ber mi yioyic, mok kum kwo ma rondo ku rondo, kum eni ma yang’ julwong’i i kume, man ituco lembatuca peri ma ber de i wang’ jumulembe dupa.

¹³Ang’olo lembe maeni iri i wang’ Mungu, m’umio kwo ni gin ceke, man i wang’ Kristu Yesu, m’unyutho lembatuca pare ma ber i wang’ Pontio Pilato;

¹⁴ya igwok lembang’olane, ma k’ecido ngo, ma cacne mbe, cil i nyuth pa Rwoth mwa Yesu Kristu:

¹⁵m’ebinyutho i rundi pare gire, ng’atu ma Acwic ma Jamugisa e kende, Ubimo ma wi ju m’ubimo bim, Rwoth mi rwodhi; kende

¹⁶m’e won kwo ma rondo ku rondo, m’ebedo i der ma jukucoptundo i vute ngo; ma ng’atu moko foduneno ngo, kadi m’ecopo nendre de ngo: yung ubed ire ku tego rondo ku rondo. Amen.

¹⁷Ng’ol ni ju ma gi julonyo i ng’om maeni ma kawono, kara pidoigi kud ubed dit, kadi ku giketh genogen migi kum lonyo ma kare kadhu, ento kum Mungu re, m’emio iwa gin ceke ku berocwinye ni mutoro mwa;

¹⁸kara gitim ber, kara gilony i tic ma ber, kara gibed ayika mi miomic, gibed jungisi de;

¹⁹ma gikanu ko ther ukungu lembe ma ber gigi pi rundi ma bibino, kara ginwang’ kwo ma en e kwo mandha.

²⁰E Timoteo, gwok maeno ma juketho i kori no, m’uoko ko ng’ei kum wec mananu mir acidi ku piem mi ng’eyong’ec ma en e ng’eyong’ec mi ndra;

²¹ma jumoko gituco e gikier kum yioyic. Dong’ bero bed i beng’i.