Read Alur Tito 2 Bible Online

Tito 2 - Alur bible

Tito 2

¹Ento dong’ iyer lembe m’umaku ponji m’ulil:

²ya co m’uti gidhir wi ava gin ceke, gibed umbe lele, gibed ku pidoic ma nger, ku yioyic m’ulil, ku mari, ku twiocwiny:

³ya mon m’uti bende ku meno bedo migi bed m’umaku piny, ku gigob agobe, ku gibed andrej pigulok, gibed juponji mi gin ma ber;

⁴kara giponj mon ma thindho ku maru coggi, ku nyithindhgi bende,

⁵ya gibed ku pidoigi ma nger, gibed leng’, gibed jutic i udigi, gibed ber ku dhanu, ma gibed ko wor ni coggi ma dhe, kara lembe pa Mungu kud ucidre;

⁶awobi bende kumeno jukgi y a gibed ku pidoigi ma nger;

⁷nyuthri giri i gin ceke ni japor mi tic ma ber, i ponji peri nyuth ma nyothre ngo, ma lele mbe i ie,

⁸ma wecne de lil, ma jucopo poko lembe ma rac i wie ngo; kara lewic umak ng’atu ma lem pare tung’, kum lembe moko ma rac m’eyer piwa mbe kude.

⁹Ponj jumiru ya gibed wor ni judongo m’i wigi ma dhe, ya ginyai mutoro i igi i gin ceke; ku gidwok lembe;

¹⁰ku gibed ma cing’gi boco, ento ginyuth mandha ma ber ceke; kara giruk lemponji pa Mungu ma Jalar mwa i gin ceke.

¹¹Kum bero pa Mungu wok, m’ukelo both ni dhanu ceke,

¹²m’ubeponjowa, kara wakwer gin ma ayi Mungu mbe i kume kud awanya ma rac m’i ng’om, wabed nger man pwe man kud ayi Mungu i kumwa i ng’om ma kawono;

¹³ma wabekio ko genogen mi mugisa man nyuth mi dwong’ pa Mungu ma dit ma Jalar mwa Yesu Kristu;

¹⁴m’emire gire piwa, kara ewarwa kud i camuco ceke, man elony dhanu ire gire ni piny pare ma dhe, m’ubedo kud ava tic ma ber.

¹⁵Yer lembe maeni, thok thok de, man juk juk ku ng’ol ceke. Ng’atu moko kud uvoni.