Read Alur Filemon 1 Bible Online

Filemon 1 - Alur bible

Filemon 1

¹Paolo, ma jakol pa Yesu Kristu, man Timoteo m’umegwa, ni Filemon ma jamer mwa ma wa jutic wakugi,

²man ni Apfia ma nyamegwa, man ni Arkipo ma asikari wadwa, man ni kanisa m’i ot peri:

³Bero iwu ku kwiocwiny m’uai ba Mungu ma Wegwa man Rwoth Yesu Kristu.

⁴Afoyo Mungu para thiri thiri, m’ayero ko piri i rwo para m’arwo,

⁵m’abewinjo ko pi mer peri, man pi yioyic m’ibedo ko yo ba Rwoth Yesu, man yo ba jumaleng’ ceke;

⁶kara ripocwiny mi yioyic peri tim tic i ng’eyong’ec mi gin ceke ma ber kubang’gi kubang’gi ma ni i iwu, ni Kristu.

⁷Kum mutoro nega dit ku jukojuk de i mer peri, kum adunde jumaleng’ uyepo ni kumi, umira.

⁸Kum kumeno, kadok a won tegocwiny kpo ni kum Kristu m’ang’ol ko iri lembe ma maku ang’ol,

⁹ento ni kum mer adong’ akwei, kum abedo calu an a Paolo m’uti, man kawono a jakol bende pa Kristu Yesu:

¹⁰akwei kum nyathin para, ma Onesimo, m’anyolo nwang’u ani i kol,

¹¹ma yang’ kuloka pare mbe iri, endre kawono dong’ kuloka pare nuti iwa wakudi bende:

¹²m’adwoke i beng’i dho ku kume, lembene kumae, ya en nini en e adundena ku kite:

¹³m’ayenyo dit acere wabed wakude, kara etim ira kakeri i kol mi lembanyong’a ma juboth kudo:

¹⁴ento kan ambe ku lembe ma ii pido ayenyo ngo atim gin moko; kara bero peri kud ubed mir adhula, ento calu iyenyo.

¹⁵Kum kuno nyo wupokru kude nindo moko, kara wubed kude nja;

¹⁶calu jamiru kendo ngo, ento ma sagu jamiru, umego ma jamer, m’usagu dit ira, endre m’ulund usagu dit apila re iri, i kum man i Rwoth bende.

¹⁷Kum kumeno tek ikwana ya wa jutic wakudi, e dong’ ijole calu an ku kita.

¹⁸Ento tek etimo rac iri kum gin moko, kadi tek ecamu banja peri moko, dwok banjane ba wel para;

¹⁹an a Paolo agoro gira ku cinga, abiculo wang’e: kum ayenyo ngo nik ayer iri re ya banja para ni i beng’i ma en e in ku kiti bende.

²⁰Eyo, umira, wek anyong’a nega i kumi i Rwoth: yep adundena i Kristu.

²¹Kum ageno woro peri ketho agoro iri, m’ang’eyo ko nia ibitimo ma sagu m’ayero iri.

²²Ento karacelo ku maeni dong’ iyik kabedo ira bende: kum ageno ya ni kum rwo mu e jubidwoka i beng’wu.

²³Epafra, ma jakol wada i Kristu Yesu, umothi;

²⁴man Marko, Aristarko, man Dema giku Luka bende, ma wa jutic wakugi.

²⁵Bero pa Rwoth mwa ma Yesu Kristu bed ku cwinywu. Amen.