Read Alur Juebrania 1 Bible Online

Juebrania 1 - Alur bible

Juebrania 1

¹Mungu, ma yang’ ubeduyero kwond lembe ni wego ku yo ma tung’ tung’ de ni kum jubila,

²i dong’ nindo maeni eyero iwa i Wode, m’ekethe ni jacampacu mi gin ceke, piny bende ecwio ni kume;

³en m’e car m’ucare mi dwong’ pare, man en e ayi mi kit kume, man gin ceke thiere ni kum lembe mi tego pare, kan etimo lwok mi dubo, ejany piny yo ku cing’ ma yor acwic mi Dwong’ ka ma malu;

⁴m’edaru doko ber hai ma sagu malaika calu enwang’u nying’ ma cu ni kum camupacu ma sagu joca.

⁵Kum ni malaika makani m’eyero ire kumae, i nindo moko, In i Woda, I ceng’ maeni anyoli? man kendo, Abibedo ire ni Wego, Man ebibedo ira ni Wodo?

⁶Man kan ekelo kayu kendo i ng’om ewacu kumae, E dong’ malaika pa Mungu ceke girwo ire.

⁷Man pi malaika ewacu kumae, M’etimo malaika pare gidoko yamu, Man jutim pare ni lebmac;

⁸ento pi Wod re ewacu kumae, E Mungu, komker peri en e mi rondo ku rondo; Man uluth mi lembatira en e uluth mi ker peri.

⁹Imaru bedopwe, man idagu camuco; Ka kumeno Mungu, Mungu peri, ewiri ku mo Ku mo mir anyong’a ma sagu juwedu.

¹⁰Man, In, Rwoth, ku kwong’a itheko the ng’om, Man polo en e bodho mi cingi;

¹¹Gibinyothri; ento in idong’ asu: Man gin ceke gibiti calu bongu ti;

¹²Man ibidologi calu kendi ma yo wi wagi, Calu kendi, man gibilokri: Ento in re i calu acel, Man rundi peri bijik ungo.

¹³Ento malaika makani m’eyero pire nindo moko kumae, Jany yo ku cinga ma yor acwic, Maram aketh ko jukwoji dok ni kom mi tiendi.

¹⁴Gin ceke gi tipo mi timotim ungo, ma juorogi ya gitim tic pi ju ma bicamu pacu mi bothi?