Read Alur Juebrania 2 Bible Online

Juebrania 2 - Alur bible

Juebrania 2

¹Ka kumeno maku waketh cwinywa ma sagu kum lembe m’uwinjre, kara wiwa kud uwil i kume.

²Kum tek lembe m’uyere ni kum malaika ubedo ku tego, man dubo ceke kubang’e kubang’e ku camuco de unwang’u giramia ma pwe mi sukulia:

³e wabiboth nenedi, tek wagalu kum thwo both ma rokeni ngi? ma Rwoth ular ukwong’o yero, ma ju m’uwinjo uketho ecungo iwa:

⁴Mungu bende ginyutho gikugi, ku giranyutha ku musana man udul tego de, man ku giramia mi Tipo Maleng’, calku yeny ma ie yenyo gire.

⁵Kum eketho ng’om ma bibino, ma wayero pire ubed wor ni malaika ngo.

⁶Ento ng’atu acel e m’utuco kamoko, ewacu kumae, Dhanu en e girang’o, ma ii pido pire e? Kadi wod dhanu de, ma nia iliewe e?

⁷Iketho edok piny nyanok ma sagu malaika; Iketho jamkermiwic mi dwong’ man yung i wie, Man ikethe wi tic mi cingi:

⁸Iketho gin ceke bed wor the tiende. Kum i kind ketho gin ceke wor ire, eweko gin moko ngo ma kubedo wor ire ngo. Ento kawono fodi waneno gin ceke jukuketho ubed wor ire ngo.

⁹Ento wanene ma judwoke piny nyanok ma sagu malaika, en e Yesu, ni kum sendri mi tho ma juketho jamkermiwic mi dwong’ man yung i wie, kara ni kum bero pa Mungu ebil tho pi dhanu ceke kubang’gi kubang’gi.

¹⁰Kum emake, ma gin ceke gi pire, ma gin ceke de wok ni kume, i kelo m’ekelo ko wot dupa i dwong’ ya eketh won both migi dok ndhu cu ni kum sendri.

¹¹Kum en m’edwoko jo leng’ man ju ma judwokogi leng’ ceke giai ba ng’atu acel: kum lembe nini lewic unege ngo nilwong’ogi umego,

¹²m’ewacu ko kumae, Abiewo nyingi ni juwada, I kind udul abiwero pak peri.

¹³Man kendo, Abiketho genogen para i ie. Man kendo, Nen, an ku nyithindho ma Mungu mio ira.

¹⁴Kum nwang’u nyithindho gr jurib ring’o ku rimo, en gire bende egamu maeno nino kumeca; kara ni kum tho ethir ng’atu ma jatego mi tho, ma en e wonabali;

¹⁵man kara egony dhanu ceke ma gi ng’eca ku ba rundi migi ceke ni kum lworo mi tho.

¹⁶Kum andha emio kony ni malaika ngo, ento emio kony ni kodhi Ibrahim.

¹⁷Kum kumeno emake ya juketh ebed calu utumin i gin ceke, kara edok ni jalam ma dit, ma won kisa mandha de i gin pa Mungu, kara eduny pi dubo mi dhanu.

¹⁸Kum nwang’u en gire esendre ma jubidhe, ecopo konyo ju ma jubidhogi.