Read Alur Juebrania 4 Bible Online

Juebrania 4 - Alur bible

Juebrania 4

¹Ka kumeno, dong’ lworo negwa, tek lembang’ola mi mondo i yom pare nuti ku jubin junwang’ ng’atu moko m’i kindwu rem pire.

²Kum andha judaru yero lembanyong’a ma juboth ko iwa, cil calu gin bende: endre lembawinja kelo kuloka igi ngo, kum eribre ku yioyic ungo i ju m’uwinjo.

³Kum wan ma wayio wamondo i yom maeno; cil calu ewacre kumae, Calu akwong’o i kwinyo para, Gibimondo ngo i yom para: kadok tic udaru thum cil i kathek mi ng’om.

⁴Kum ewacu kamoko kumae pi ceng’ abirone, Man Mungu yom i ceng’ mir abirone ni tic pare ceke;

⁵man i ka maeni kendo kumae, Gibimondo ngo i yom para.

⁶Ka kumeno kum ebedo kakare ya jumoko bimondo i ie, man ju ma lembanyong’a ma juboth ko lar uyere igi gimondo ngo kum camuco migi,

⁷eng’olo nindo moko kendo kumae, Tinuni, m’ewacu ko i Daudi i nindo ma cen (cil calu elar ewacre), Tinuni tek wubiwinjo dwande, Kud wudwok adundewu nwang’.

⁸Kum tek Yocuwa mio igi yom, kuno di k’eyero pi nindo mange macen ungo.

⁹Ka kumeno yom mi sabatu bedo kakare pi dhanu pa Mungu.

¹⁰Kum ng’atu m’udaru mondo i yom pare eyom en gire bende ni tic pare, calu Mungu bende yom ni pare.

¹¹Ka kumeno dong’ waketh cwinywa kum mondo i yom maeno, kara ng’atu moko kud ukier kum camuco m’upore ku maeni.

¹²Kum lembe pa Mungu e kwo, man etimo, man e bith ma sagu palamularu moko ma lake kun ku kun, m’ecobo ko cil ku poko ng’eyong’ec ku tipo, man ujonj ku mio ma yor i ie bende, man e yot kum ng’io pidoic ku lembapora mir adunde.

¹³Man giracwia pa Mungu mbe ma kunyuthre ngo i wang’e: endre gin ceke gi muneru man gibedo ayaba ngbeng’ i wang’ ng’atu ma wabedo ku lembe wakugi.

¹⁴Ka kumeno wan ma wabedo ku jalam ma dit ma dwong’, m’ekadhu kud i polo, en e Yesu ma Wod Mungu, dong’ wamak lembatuca mwa ki.

¹⁵Kum wakubedo ku jalam ma dit ungo ma can kunege ngo kum ng’ic ma wa ng’ic ko; endre ng’atu ma jubidhe kum gin ceke ma calu jubidho kowa, ere ma dubo mbe.

¹⁶Ka kumeno dong’ wacoru ceng’ni kom mi bero ku tegocwiny, kara wajol kisa, man wanwang’ bero m’ukonywa i nindo ma can ni i kumwa