Read Alur Juebrania 6 Bible Online

Juebrania 6 - Alur bible

Juebrania 6

¹Kum kumeno wan ma waweko ponji ma kwong’a pa Kristu dong’ waewala ni dokocu ma ndhu; ma watheko ko the lokocwiny ma waweko ko tic m’utho kendo ngo, ku mi yioyic ma yo ba Mungu de,

²mi ponji mi baputisi, man mi ketho cing’, man mi cer mi ju m’utho, man mi lembapoka ma nja.

³E maeni wabitimo, tek Mungu yio.

⁴Kum pi ju ma jumio igi der wang’ acel, man m’ubilo giramia maeni m’i polo, man juketho gibed jugam mi Tipo Maleng’,

⁵man m’ubilo lembe ma ber pa Mungu, ku tego mi rundi ma biwok,

⁶e macen gilokri, e dwokogi nyen kendo ni lokocwiny copre ngo; kum giguro Wod Mungu kendo igi gigi, man gikethe ni lewic ma ngbeng’.

⁷Kum ng’om m’umadhu koth m’ucwi i wie wang’ udul, man etwio dek ma romo ju ma jufure pigi, ejolo mugisa ba Mungu:

⁸ento tek etwio ukudho kud ucok, e jukwere man e ceng’ni ku kwong’; ma kajikne juwang’e ku mac.

⁹Ento, jumer, kadok wayero kumeno bende, wageno gin ma ber m’usagu maeno piwu, man gin m’ubedo karacelo ku both:

¹⁰kum Mungu en e won gondri ngo ma nia wie wil kum tic mu man mer ma wunyutho kum nyinge, kum wutimo ni jumaleng’, man wubetimo asu.

¹¹Man wayenyo ya ku ba dhanu m’i kindwu ng’atuman unyuth morkume ma calcal mi pong’ mi genogen cil i kajikne:

¹²kara kud wubed ku molkum, endre wubed jupor mi jucampacu mi lembang’ola ni kum yioyic ku twiocwiny.

¹³Kum kinde ma Mungu mio lembang’ola ni Ibrahim, kum ng’atu moko mbe m’usage m’ekwong’ i kume, edong’ ekwongre i kume gire,

¹⁴ewacu kumae, Andha mugisa abimio iri mugisa, ameda de abimedi.

¹⁵Man kumeno, kan edaru ciro ku twiocwinye, enwang’u lembang’olane.

¹⁶Kum dhanu kwong’o kwong’ ku gin ma dwong’ ma sagu: man i piem migi ma gipiemo ndri kubang’e kwong’ en e kajik lembe ma ketho tegone.

¹⁷I lembe maeni Mungu, m’uyenyo enyuth ni jucampacu mi lembang’ola karamb lokringo mi lembapora pare eketho kwong’ i diere;

¹⁸kara ni kum gin ario ma lokre ngo, ma i maeni cwayu ndra copre ngo ni Mungu, wabed ku juk ma tek, wan ma waringo wayenyo ko kaboth kara wamak genogen ma juketho i wang’wa;

¹⁹ma wabedo ko calu mangru mi ng’eyong’ec, ma en e genogen mandha ma mi tego de, man ma mondo i maeno ma ni i kusika mi bongu;

²⁰ma Yesu mondo keca piwa calu jawipiro mwa, m’edaru doko jalam ma dit ma nja ma wadi pa Melkizedek.