Read Alur Juebrania 8 Bible Online

Juebrania 8 - Alur bible

Juebrania 8

¹Nie i gin ma wabeyero, lembe ma dwong’ e eni; Wabedo ku jalam ma dit ma wadi maeni, m’ejany yo ku ng’et komker ma yor acwic mi dwong’ i polo,

²m’e jatim mi kamaleng’, man mi hema mandha, ma Rwoth uguro re, dhanu ngo.

³Kum ku ba julam ma dongo ceke jukethogi kara giwodh giramia ku lam bende: kum kumeno dong’ jalam ma dit maeni bende ukoubed ku gin m’ethier be.

⁴Nie tek en e ma wi ng’om, kuno di k’ebedo jalam ki ngo, kum ju ma giwodho giramia calku cik ginuti;

⁵ma gitimo maeni ma en e ayi ku tipo mi gin m’i polo, cil calu ma Musa poi ko ni kum Mungu kinde m’eyenyo etim hema: kum, Nen, ewacu, nia itim gin ceke calkud ayi gin ma junyutho iri wi got.

⁶Ento kawono enwang’u timotim ma dwong’ hai ma sagu, calu en e jarib lembariba bende ma ber m’usagu, ma jung’ole wi lembang’ola ma ber m’usagu.

⁷Kum tek lembariba maeno ma kwong’a cungo ndhu cu, kuno di jukuyenyo kaka mir arionde ngo.

⁸Kum kan enwang’u erem, ewacu kumae, Nen, ceng’ bibino, Rwoth uwacu, M’abitimo ie lembariba ma nyen ku ot pa Israel man ku ot pa Yuda;

⁹Ma calku lembariba m’atimo ku weggi ngo I ceng’ m’amakugi ku cing’ apeyo kogi woko kud i ng’om Misiri; Kum gibedo asu ngo i lembariba para, Man aparu pigi ngo, Rwoth uwacu.

¹⁰Kum maeni lembariba m’abitimo ku ot pa Israel Yo ku ng’ei ceng’ maeno, Rwoth uwacu; Abiketho cik para i pidoigi, Man abigorogi wi adundegi bende: Man abibedo igi ni Mungu, Man gibibedo ira ni dhanu:

¹¹Man ku ba dhanu ceke ng’atu moko mbe ma biponjo wadi, Man ku ba dhanu ndri ng’atuman biwacu ngo ni umin kumae, Ng’ei Rwoth: Kum dhanu ceke bing’eya, Ugambre kum ma thindho m’i kindgi cil ku ma dongone de.

¹²Kum kisa binega kum camuco migi, Man abipoi pi dubo migi kendo ngo.

¹³Kum ewacu kumae, Lembariba ma nyen, eketho ma kwong’a ti. Ento maeno ma kare bekadhu man m’ubeti e ceng’ni kadhu woko.