Read Alur Juebrania 9 Bible Online

Juebrania 9 - Alur bible

Juebrania 9

¹Nie cil lembariba ma kwong’a bedo ku lembapoka mi kisoma pa Mungu, man kamaleng’ pare, kamaleng’ m’i ng’om maeni.

²Kum juyiko hema, ma kwong’ane, ma ie ju thethala, ku mesa, man kwen m’anyutha; m’elwongre Kamaleng’.

³Man yor i ng’ei kusika mi bongu mir arionde, hema m’ulwongre Leng’ mi Maleng’;

⁴ma ie ju pemblam mi mola ma kwar mi gin ma ng’wice ng’ar, ku sanduk mi lembariba ma jumwono mola ma kwar gbur i kume ma ie ju alibi mi mola ma kwar ma ie ju mana, man musonglo pa Harun m’uloth, man ban mi lembariba;

⁵jukerubi mi dwong’ gini i wie ma gibeumo kakisa ku tipo; ma wacopo yero pi ginduni ndri ngo kawono.

⁶Nie gin maeni ma juyiko kumern, julam gimondo i hema ma kwong’a thiri thiri, ma gitimo ko tic mi kisoma;

⁷ento jalam ma dit kende e ma mondo i mir arionde, wang’ acel pii i rundi acel, ma rimo mbe kude ngo, m’ewodho pire gire, man pi kier mi dhanu,

⁸e Tipo Maleng’ unyutho maeni, nia yo mi kamaleng’ fodunyuthre ngo, kinde ma hema ma kwong’a foducungo;

⁹ma en e lembapora mi nindo maeni; calku maeni juwodho giramia ku lam de ma copo dwoko jurwo cu ma ndhu ngo i gin mi pidocwiny,

¹⁰ma gi, (giracama man giramadha man giralwoka ma tung’ tung’) lembapoka mi kum, ma juketho cil i nindo mi yikolembe.

¹¹Ento Kristu m’udaru bino ni jalam ma dit mi gin ma ber ma bibino, ni kum hema ma dit ma bedo cu de m’usagu, ma jutimo ku cing’ ungo, thelembene kumae, mi giracwia maeni ngo,

¹²kadi ni kum rimb diegi ku nyithi dhiang’ de ngo, endre ni kum rimbe gire, m’emondo wang’ acel pii i kamaleng’, m’edaru nwang’u war ma rondo ku rondo.

¹³Kum tek rimb diegi ku thwoni dhiang’, man ke vuru mi rwaya m’ukire wi ju m’ucido dwoko leng’, cil ku dwoko kum leng’:

¹⁴e rimb Kristu, m’ewodhre gire ma mulima mbe ni Mungu kum Tipo Maleng’ ma nja, bilwoko pidocwinywu ni tic m’utho kara wutim ni Mungu ma kwo sagu dit apila ngo?

¹⁵Kum lembe nini en e jarib lembariba ma nyen, kara tho m’udaru timbre pi war mi dubo ma gini the lembariba ma kwong’a, ju ma julwong’ogi gijol lembang’ola mi camupacu mi nja.

¹⁶Kum ka ma lembariba mi camupacu ni i ie, nwang’u tho pa ng’atu m’utimo lembaribane de ukoubedo nuti be.

¹⁷Kum lembariba mi camupacu tegone bedo nuti nwang’u tho wok: kum tegone mbe tek ng’atu m’utime fodubedo kwo.

¹⁸Kum kumeno cil lembariba ma kwong’a de jutheke ngo m’umbe rimo.

¹⁹Kum kinde ma lembang’ola kubang’e kubang’e ceke yere ni kum Musa ni dhanu ceke calku cik, eting’o rimb nyathi dhiang’ ku mi diegi de, karacelo ku pi man yuk rombo ma kwar man alagi, man ekiro wi kitabu gire man kum dhanu ceke,

²⁰ewacu kumae, Maeni en e rimo mi lembariba ma Mungu ng’olo iwu.

²¹Man ke hema kud agulu mi timotim ceke ekiro kumeca ku rimo.

²²Man calku cik, avowaeu, ya gin ceke julwoko ku rimo, man tek rimo ku cwir ungo, nwang’u rucoruc umbe.

²³Kum kumeno ayi mi gin m’i polo ukoubed alwoka be ku maeni; endre gin m’i polo gigi ku lam ma ber ma sagu maeni.

²⁴Kum Kristu kumondo i kamaleng’ ma jutimo ku cing’ ungo, ma calu ayi mi mandha; endre i polo gire, kara ewok kawono i wang’ Mungu piwa:

²⁵kadi ma nia ewodhre gire wang’ udul ungo, calu jalam ma dit ma mondo i kamaleng’ ku ba rundi ku ba rundi ku rimo ma pare ngo:

²⁶tek ebedo kumeni ngo kuno di esendre wang’ udul m’ugambre i thek ma ng’om uthekre ko: ento kawono enyuthre wang’ acel pii i kajik rundi m’eketho ko dubo cen ni kum lam ma en gire.

²⁷Man kum ekethre ni dhanu ya githo wang’ acel pii, man yo ng’ei maeni pokolembe;

²⁸kumeno Kristu bende, ma juwodhe wang’ acel pii eyei dubo mi dhanu dupa, ebiwok wang’ arionde, nge ku dubo, ni ju m’ukure, ni both.