Read Alur Yakobo 1 Bible Online

Yakobo 1 - Alur bible

Yakobo 1

¹Yakobo, ma jamiru pa Mungu man pa Rwoth Yesu Kristu, ni dhanu apar wi ario mi Jumulal mba, moth iwu.

²Umego, tek wupodho i udul abidhe, wukwane ceke ni mutoro;

³ma wung’ei ko ya mulo yioyic mu nyayu twiocwiny,

⁴Man wek twiocwiny ubed ku tic pare ma ndhu cu, kara wubed ndhu cu man dho de, ma wurem i gin moko ngo.

⁵Ento tek ng’atu moko m’i kindwu rieko mbe kude, wek ekwai Mungu, ma mio ni dhanu ceke ku berocwinye, egamugi ku dhau de ngo; man ebimire ire.

⁶Ento wek ekwai i yioyic, cwinye kud ubed jiji: kum ng’atu ma cwinye jiji e calu mukura ma yamu leko ethore de.

⁷Kum ng’atuno ie kud upid nia nyo ebigamu gin moko ba Rwoth;

⁸ng’atu ma pidoie ario, m’ubelokre swa i yo pare ceke.

⁹Ento dong’ umego ma nyaswaswa de ulule kum yung ma juyunge ko:

¹⁰jalonyo bende, kum jujwige: kum ebikadhu woko pami thiuboko m’i lum.

¹¹Kum ceng’ dongo ku yamu ma lieth, man enero lum: e thiubokone podho, man ke bero mi kite nyothre: kumeno bende jalonyo birwinyo woko i woth pare.

¹²Ng’atu m’uciro abidhe mugisa kwanye; kum ka judaru mulo ie, ebinwang’u jamkermiwic mi kwo, ma Rwoth ung’olo ni ju m’umare.

¹³Ng’atu moko tek abidhe betime kud ewac kumae, Mungu bebidha en; kum dubo copo bidho Mungu ngo, en de ebidho ng’atu moko ngo:

¹⁴ento ku ba dhanu ceke ng’atuman abidhe time, nwang’u awanyane ma rac uting’e en, e abidhe bidhe.

¹⁵Awanyane ma rac, kan egamu ie, elund enyolo dubo: e dubone, kan eteng’ni, ekelo tho.

¹⁶Ku juwondwu, umego ma jumerna.

¹⁷Giramia ceke ma ber kubang’gi kubang’gi man giramia ceke ma ndhu cu kubang’gi kubang’gi, uai malu, uloro piny ku ba Wego mi der, ma lokri rr umbe kude, kadok tipopiny ma podho kum lokri rr.

¹⁸E enyolowa ku lembe mi lemandha, kara wabed ni landu mi mwoka mi ju m’ecwio.

¹⁹Umego ma jumerna, wung’eyo lembe maeni. Ento ku ba dhanu ceke wek ng’atuman ubed m’ewinj pio, ebed yo kum wec, kum kwinyo bende;

²⁰kum kwinyo mi dhanu timo bedopwe pa Mungu ngo.

²¹Kum kumeno wucor lemsasa ceke cen ku dubo m’udhir, man wujol lembe ma jupidho i iwu ku molcwinywu, ma copo bodho ng’eyong’ec mu.

²²Ento dong’ wubed jutim lembe, man juwinj awinja kende ngo, ma wubewondru ko giwu.

²³Kum tek ng’atu moko e jawinj lembe awinja man e jatim lembe ngo, en e va ng’atu m’ubeneno wang’e ma junyole ko i kieu:

²⁴kum ebenendre gire, ecidho woko de, e ndhu ndhu nica wie wil pir ayine maram ebedo ko.

²⁵Ento ng’atu m’ubeneno i cik ma ndhu cu, cik mi gony, m’ebetimo kumeno de asu, ma en e jawinj awinja kende ngo ma wie wil ento e jatim m’ubetimo, ng’atuni bibedo jamugisa kum tic m’etimo.

²⁶Tek ng’atu moko ie pido ya en e jakisoma, ma k’ecero lebe ngo enke ebewondo adundene, nwang’u kisoma pa ng’atuni en e mananu.

²⁷Kisoma m’alili ma cido de ngo i wang’ Mungu mwa ma Wegwa e ee, ya julieu kic ku mon ma coggi tho i can migi, man ke gwok ma jugwokri ko gijo ni ng’om ma jukuvukri ngo.