Read Alur 1 Petro 1 Bible Online

1 Petro 1 - Alur bible

1 Petro 1

¹Petro, jakwenda pa Yesu Kristu, ni ju ma jugoyo nying’gi ma gi jubedo mi Jumulal mba ma gini i Ponto, ku Galatia, ku Kapadokia, kud Asia, man Bithunia,

²calku ng’eyong’ec ma Mungu ma Wego lar ung’eyo, i dwokrileng’ mi Tipo, ni woro ku kir mi rimo pa Yesu Kristu: Bero ku kwiocwiny umedre iwu.

³Mugisa ubed ni Mungu ma Won Rwoth mwa Yesu Kristu, m’enyolowa kendo calku kisa pare ma dit mi genogen i ma kwo ni kum cer pa Yesu Kristu ma i kind ju m’utho,

⁴ni camupacu ma nyothre ngo, ma cido de ngo, ma duny woko de ngo, ma jukanu iwu i polo,

⁵ma wu, bedo akura ku tego pa Mungu ni kum yioyic ni both m’ubedo ayika ma binyuthre i acoka nindo.

⁶Anyong’a negowu dit i gin maeni, kadok kawono mi nindo ma nyanok, tek ebedo kumeno, juketho can unegwu i abidhe ma kwonde tung’ tung’,

⁷kara mulo yioyic mu, ma pire tek ma sagu mola ma kwar ma nyothre kadok jumule ku mac, junwang’e ni pak ku dwong’ ku yung i nyuth pa Yesu Kristu:

⁸ma wumare, ma fodi wukunene ngo; ma kadok wunene ngo kawono, ento ma wuyie, anyong’a negowu dit kud anyong’a ma wecre ngo m’upong’ ku dwong’ de;

⁹ma wujolo ko kajik mi yioyic mu, ma en e both mi ng’eyong’ec mu.

¹⁰Pi both maeni jubila gisayu man giyenyo cu, ma giewo pi bero ma bibino i beng’wu:

¹¹ma giyenyo ko kanindo kadi karambnindo ma Tipo Kristu ma ni i igi nyutho pire, kan elar etuco pi sendri pa Kristu, ku dwong’ ma bilubo toke.

¹²M’unyuthre igi, nia igi gigi ngo, ento iwu, gitimo gin maeni, ma kawono uyere iwu ni kum ju ma giyero iwu lembanyong’a ma juboth ko ku Tipo Maleng’ ma juore kud i polo; ma malaika giyenyo ging’i i ginde.

¹³Kum kumeno ma wutwio ko thondh pier pidoiwu, wubed nger, wuketh genogen mu cu wi bero ma jubikelo iwu i nyuth pa Yesu Kristu;

¹⁴calu nyithindho mi woro, kud wuporu giwu kud awanya ma rac mu ma kwong’a mi cobo mu;

¹⁵ento calu ng’atu m’ulwong’owu e leng’, wun giwu bende wubed leng’ i kura ceke mi bedo mu;

¹⁶kum egore kumae, Wubibedo leng’; kum an a leng’.

¹⁷Man tek wulwong’e calu en e Wego, m’epoko lembe mi dhanu ng’atuman calku tic pare ma dhanu bedo ko tung’ tung’ ungo i wang’e, e wubed ku lworo i nindo mi bedo mu:

¹⁸ma wung’eyo ko nia juwaruwu, ku gin ma nyothre ngo, ku mola ma tar kadi mola ma kwar de ngo, kud i kura mi bedo mu ma kite mbe ma wunwang’u ba kwaruwu;

¹⁹ento ku rimo ma pire tek, calu pa nyathi rombo ma mulima kadi poyo de mbe i kume, en e rimb Kristu:

²⁰ma jular jung’eye andha ka fodi theng’om kucakre ngo, ento enyuthre i kajiknindo piwu,

²¹wun ma wu juyic i Mungu ni kume, m’eketho ecer kud i kind ju m’utho, emio ire dwong’ de; kara yioyic mu ku genogen mu bed i Mungu.

²²Kum wudaru dwoko adundewu leng’ i woro mu ma ba lemandha ni mer mir umego ma abombi mbe i ie, dong’ wumeru k’amora ku i adunde:

²³ma junyolowu kendo ku kodhi ma nyothre ngo, ento ku kodhi ma kunyothre, ni kum lem pa Mungu, ma kwo ma bedo de.

²⁴Kum, Kum ceke calu lum, Dwong’ne ceke de calu thiu lum. Lum ner, man thiwe de oi:

²⁵Ento lembe pa Rwoth bedo rondo ku rondo. Maeni lembe mi lembanyong’a ma juboth ko ma juyero iwu.