Read Alur 2 Petro 1 Bible Online

2 Petro 1 - Alur bible

2 Petro 1

¹Simon Petro, jamiru man jakwenda pa Yesu Kristu, ni ju ma ginwang’u yioyic ma calacel ma pire tek karacelo kudwa i bedopwe pa Mungu mwa man Jalar Yesu Kristu:

²Bero iwu man kwiocwiny umedre iwu i ng’eyong’ec pa Mungu man pa Yesu Rwoth mwa.

³Kum tego pare mi Rucwic umio iwa gin ceke ma mi kwo ku bedo ma ayi Mungu ni kume, ni kum ng’eyong’ec pa Mungu m’ulwong’owa ni kum dwong’ pare gire man bero;

⁴kum maeni emio iwa lembang’ola pare ma pire tek ma dwong’ apila de; kara ni kum maeni wudok jurib mi kura Rucwic, ma wudaru both ni nyoth ma ni i ng’om ni kum awanya ma rac.

⁵Eyo, kum lembe maeni nini ma wumedo ko yor i beng’wu amora ceke, i yioyic mu wumed bero; man i bero mu ng’eyong’ec;

⁶i ng’eyong’ec mu ke kwerigijo; i kwerigijo mu ke twiocwiny; i twiocwiny mu ke bedo ma ayi Mungu ni i kume;

⁷i bedo ma ayi Mungu ni kume mu ke mer mi juwadijo; man i mer mu mi juwadijo ke mer.

⁸Kum tek gin maeni gi mu man gisagri, gibidwokowu ni nyap ungo kadi ma nia wukucego nyingwu ngo i ng’eyong’ec pa Rwoth mwa Yesu Kristu.

⁹Kum ng’atu ma gin maeni mbe kude en e abinga, m’eneno ko gin ma ceng’ni kende, ma wie wil kum lwok mi dubo pare ma con.

¹⁰Kum kumeno, umego, wutim kud amora m’usagu kara wuketh lwong’o mu ku goyo nyingwu cung tek: kum tek wutimo gin maeni, wubikier ki ngo:

¹¹kum kumeno jubimio iwu thwo mondo m’i ker ma nja pa Rwoth mwa ma Jalar Yesu Kristu.

¹²Kum kumeno abibedo ayika thiri thiri kara apoiwu pi gin maeni, kadok wung’eyogi, wucungo de i lemandha ma wubedo ko.

¹³Man ebedo ber ira, ma fodi ani i hema maeni, ya ayau kumwu apoi kowu;

¹⁴m’ang’eyo ko wanyu hema para bebino fodi nyanok, cil calu Rwoth mwa Yesu Kristu nyutho ira.

¹⁵Eyo, abitimo kud amora kara ku ba nindo ceke wucopo poi kum gin maeni yo ng’ei tho para.

¹⁶Kum wakulubo lembuda ngo ma jutheko ku rieko, ka waketho wung’ei tego ku bino pa Rwoth mwa Yesu Kristu, ento wan wa jumulembe ma ku wang’ mi dwong’ pare.

¹⁷Kum egamu ba Mungu ma Wego yung ku dwong’, ka dwal ma kumeni wok i bang’e m’uai i Dwong’ Madit kumae, Maeni Woda ma jamerna, ma mutoro nega i kume:

¹⁸man dwal maeni wan de wawinjo m’eai i polo, nwang’u wani kugi wi got ma leng’.

¹⁹Man wabedo ku lembila ma judwoko tek ma sagu; ka kumeno wutimo dre kum wuketho cwinywu kum lembene, calu ni thala m’uberieny i ka ma col, rama piny ru ko, man cerojobi wok i adundewu:

²⁰ma wular wung’eyo ko lembe maeni, nia lembila mi lembagora pa Mungu moko mbe ma copo loko calu ng’atu moko yenyo en gire.

²¹Kum lembila moko mbe ma fodubino ku yeny ma dhanu yenyo: ento dhanu yero lembe m’uai ba Mungu, ma Tipo Maleng’ ucung’o kogi en.