Read Alur 2 Petro 2 Bible Online

2 Petro 2 - Alur bible

2 Petro 2

¹Ento jubila mi ndra bende wok i kind dhanu, calu i kindwu bende juponji mi ndra bibedo nuti, ma gibikelo ponji mi ndra mi nyoth nyalwe, ma gikwero ko cil Rwoth m’ung’iewogi, ma gikelo ko nyoth pio i wigi gigi.

²Dhanu dupa de bilubo tok tim migi mi tarwang’; kum joni yo mi lemandha jubiyero pire rac.

³I kethocwiny ma giketho hai kum piny gibitimo i kumwu ku lembabombi kara ginwang’ kuloka: ma pokolembe migi gambre con ugalu ngo, nyoth migi de nindo ngo.

⁴Kum tek Mungu weko malaika m’udubo ngo, ento ebologi i gehena, man ekethogi i vur mi mudho, ma jugwoko kogi cil ni pokolembe;

⁵man eweko ng’om ma con de ngo, ento egwoko Noa, m’e jayer mi bedopwe ku juabiro mange, kan ekelo pi ma dit m’uumo ng’om wi ju ma ayi Mungu mbe i kumgi;

⁶man ku loko adhura Sodom ku Gomora ni vu ru, epoko lembe rac i wigi ku nyoth m’enyotho kogi, m’edwoko kogi ni por ni ju ma gibedo ma ayi Mungu mbe i kumgi;

⁷man ebodho Lot ma pwe, ma can unege dit kum bedo mi tarwang’ mi judubo

⁸(kum ng’atu maeni ma pwe m’ebedo i kindgi, i neno ku winjo de, esendo ng’eyong’ec pare ma pwe ceng’ ku ceng’ ku tic migi ma cik uyio ngo):

⁹Rwoth ung’eyo maram elar ko ju ma ayi Mungu ni i kumgi ku i abidhe, m’egwok ko weg gondri de the masendi mi cing’ pokolembe;

¹⁰ento ma sagu ju m’ulubo tok kum i awanya ma rac mir acidi, man m’ucayu kero. Ju ma wigi tek, m’udhuko, ma lworo cayu weg dwong’ negogi ngo:

¹¹ento malaika, kadok gi dwong’ ma sagu i tek ku tego, gikelo lembadote mi cac ungo i kumgi i wang’Rwoth.

¹²Ento joni calu giracwia pa Mungu ma rieko mbe kugi, ma junyolo gi yedi kende, ya jumak junyoth de, ma gicayu cac i lembe ma gikung’eyo there ngo, i nyoth migi gibinyothri andha,

¹³ma gisendri ko ku lem ma rac calu sukulia mi timorac; gi dhanu ma gikwanu cokri ku vul ma ku dieceng’ ni mutoro, gi gin m’ucwinyo man mulima, ma gimer amera kud abombi migi i cemo migi mi mer ka wucamu wukugi;

¹⁴ma gieri kwa e m’upong’o wang’gi, ma gikucop ceri ngo ni dubo; ma gibidho ng’eyong’ec m’ucungo tek ungo; ma adundegi pido ru pi kethocwiny kum piny kwa; nyithindho mi kwong’;

¹⁵ma giweko ko yo ma atira gikiewo, ma gikwanyu ko yo pa Balam wod Bosor, m’umaru sukulia mi timorac;

¹⁶ento jujuke kum dubo pare gire: kana m’ajuba weco ku dwand dhanu man ecero abelu pa jabila.

¹⁷Maeni kulo m’umbe pi, afuru m’uyerni ku wavuvu; ma jukanu igi col mi mudho.

¹⁸Kum, ma gibeweco thwo lembe m’uyenyo ma kite mbe, gibidho ju m’umaku ringo ju m’ubedo i kier kud awanya ma rac mi kum ni kum tarwang’;

¹⁹ma ging’olo ko igi gony, kinde ma gin gigi gi jumiru mi nyoth; kum tek lembe voyo ng’atu moko, ebedo ni jamiru i lembene bende.

²⁰Kum tek, yo ng’ei both ni gin m’ucido m’i ng’om ni kum ng’eyong’ec pa Rwoth ku Jalar Yesu Kristu, ka gigapri i ie kendo man juvoyogi, bedo migi macen doko rac ma sagu ma kwong’a.

²¹Kum e ber igi ma sagu tek fodi gikung’eyo yo mi bedopwe ngo, ma tek, yo ng’ei ng’eye gidok cen kum lembang’ola ma leng’ m’umire igi.

²²Etimbre igi calku lembabola mandha kumae, Gwok udok kendo ba ng’ok pare gire, min kul de m’ujom udok ninyambre i unzabu.