Read Alur 2 Petro 3 Bible Online

2 Petro 3 - Alur bible

2 Petro 3

¹Jumer, maeni waraga mir arionde m’agoro iwu; i gin ario de ayau pidoiwu ma leng’ ku ketho wupoi;

²kara wupoi kum lembe ma jubila maleng’ ular uyero, ku lembang’ola pa Rwoth Jalar ni kum jukwenda mu:

³ma wung’eyo ko maeni, nia jucac gibibino ku cac i acokaceng’, ma gibelubo tok awanya migi ma rac,

⁴ma giwacu de kumae, Lembang’ola mi bino pare nikani? kum, ugambre i ceng’ ma kwaruwa gamu nindo i ie, gin ceke bedo calu ma yang’ ugambre i thangambere mi giracwia pa Mungu.

⁵Kum wigi wil kum lembe nini aka, nia polo nuti ugambre con, ng’om de moko yo ng’ei pi man i pi, ni kum lembe pa Mungu;

⁶ni kum maeno ng’om ma nwang’u nuti umwony ku pi, enyothre;

⁷ento polo ma nuti kawono, ku ng’om de, jukanugi ni mac ni kum lembe ma calacel, jugwoko ni ceng’ mi pokolembe man nyoth mi dhanu ma ayi Mungu mbe i kumgi.

⁸Ento, jumer, wiwu kud uwil kum lembe acel maeni, nia ku ba Rwoth ceng’ acel calu rundi rubanga, man rundi rubanga calu ceng’ acel.

⁹Rwoth galu ngo kum lembang’ola pare, calu jumoko kwanu galu; ento emwonyo lembe hai iwu, kum eyenyo ngo nia ng’atu moko rwiny, ento nia dhanu ceke gitund ba lokocwiny.

¹⁰Ento ceng’ pa Rwoth bibino calu jakwo; ceng’ nica polo bikadhu woko ku bamor ma dit, man giki m’i ie de biloi ni lietho mac ma wanga wanga, ng’om de ku tic ma ni ie biwang’ pet.

¹¹Kum giki maeni biloi ceke kumeni, maku wubed dhanu ma kothwu nenedi? ku bedo ceke ma leng’ man bedo ma ayi Mungu ni i kume,

¹²ma wuki kud ava ma dit bino mi ceng’ pa Mungu, ma ni kum maeno polo ma mac ubewang’e biloi, giki ma ni ie de biloi ku lietho mac ma wanga wanga?

¹³Ento, calku lembang’ola pare, wabekio polo ma nyen ku ng’om ma nyen, ma bedopwe bedo i ie.

¹⁴Kum kumeno, jumer, kum wukio gin maeni, tim kud amora kara jubin junwang’wu ma cwinywu kwio, ma poyo mbe lembe de mbe i wiwu i wang’e.

¹⁵Man wukwan nia mwonyolembe ma Rwoth mwa mwonyo hai en e both; cil calu umegwa ma jamer Paolo bende, calku rieko m’umire ire, ugoro iwu;

¹⁶calu i waraga pare ceke bende, m’ebeweco i igi pi giki maeni; ma gin moko de nuti i igi ma ng’eyo there tek, ma ju ma cobo ku ju m’ucungo tek ungo giloke tung’, calu giloko lembagora mange pa Mungu bende, ni nyoth migi gigi.

¹⁷Ka kumeno, jumer, wun ma wular wung’eyo gin maeni, wukuru, kara kier mi dubo kud uwingwu, wupodh de ku kum cungo tek mu.

¹⁸Ento wudong i bero ku ng’eyong’ec pa Rwoth mwa man Jalar Yesu Kristu. Dwong’ ubed ire kawono man rondo ku rondo. Amen.