Read Alur 1 Yohana 2 Bible Online

1 Yohana 2 - Alur bible

1 Yohana 2

¹Nyithindho para ma thindho, agoro iwu lembe maeni kara kud wudubi. Man tek ng’atu moko dubo, wabedo ku Jakwai ba Wego, Yesu Kristu ma won bedopwe:

²man en e lam mi dubo mwa: mi mwa kende ngo, ento mi ng’om ngung’ bende.

³Man kum maeni wang’eyo nia wang’eye, tek waworo cik pare.

⁴Ng’atu m’uwacu kumae, Ang’eye, enke eworo cik pare ngo, en e jandra, man lemandha mbe i ie:

⁵ento ng’atu m’u woro lem pare, mer pa Mungu doko ndhu cu i ie andha. Ku maeni wang’eyo nia wani i ie:

⁶ng’atu m’uwacu nia ebedo i ie maku en gire bende ewoth cil calu en de ewotho.

⁷Jumer, agoro iwu cik ma nyen ungo, ento cik ma con ma wubedo ko ugambre ku kwong’a: cik ma con en e lembe ma wuwinjo.

⁸Kendo, agoro iwu cik ma nyen, ma ginde andha i ie man i iwu; kum mudho bekadhu woko, der mandha de berieny kawono.

⁹Ng’atu m’uwacu nia eni i der enke edagu umin, nwang’u eni i mudho cil ku kawono de.

¹⁰Ng’atu m’umaru umin bedo i der, lembe moko de mbe i ie ma ketho jukier.

¹¹Ento ng’atu m’udagu umin eni i mudho, ewotho de i mudho, eng’eyo de ngo ka m’ecidho i ie, kum mudho cido wang’e.

¹²Agoro iwu, nyithindho para ma thindho, kum dubo mu wekre iwu kum nyinge.

¹³Agoro iwu, wego, kum wung’eyo ng’atu ma nuti ugambre ku kwong’a. Agoro iwu, awobi, kum wuloyo ng’atu ma rac. Agoro iwu, nyithindho ma thindho, kum wung’eyo Wego.

¹⁴Agoro iwu, wego, kum wung’eyo ng’atu ma nuti ugambre ku kwong’a. Agoro iwu, awobi, kum wubedo tek, lembe pa Mungu de bedo i iwu, man wuloyo ng’atu ma rac.

¹⁵Kud wumar ng’om, kadok gin ma ni i ng’om. Tek ng’atu moko maru ng’om, nwang’u mer pa Mungu mbe i ie.

¹⁶Kum ceke ma ni i ng’om, awanya ma rac mi kum kud awanya ma rac mi wang’ kud ayunga mi kwo maeni, en e pa Wego ngo, ento en e mi ng’om.

¹⁷Man ng’om ubekadhu woko kud awanya ma racne de: ento ng’atu m’utimo yeny ma Mungu yenyo bedo rondo ku rondo.

¹⁸Nyithindho ma thindho, maeni en e acoka saa: man calu wuwinjo nia japiem Kristu bebino, e kawono jupiem Kristu dupa daru wok; kum maeni wang’eyo nia en e acoka saa.

¹⁹Giai i kindwa, ento gi mwa ngo; kum tek gi mwa, kuno di gidong’ i bang’wa: ento giai, kara ginyuthri nia gi mwa ceke ngo.

²⁰Man wubedo ku wir m’uai ba Ng’atu Maleng’, e wung’eyo gin ceke.

²¹Agoro iwu ngo nia kum wung’eyo lemandha ngo ento kum wung’eyo, man kum ndra mbe i lemandha.

²²Ng’a ma jandra ndhu ng’atu m’ukwero nia Yesu en e Kristu ngo ngo? Maeni en e japiem Kristu, ng’atu m’ukwero Wego ku Wod.

²³Ng’atu ma tek ukwero Wod ng’atuca bedo ku Wego ngo: ng’atu m’utuco Wod, ebedo ku Wego bende.

²⁴Ento wun re, wuwek maeno ma wuwinjo ugambre ku kwong’a bed i iwu. Tek maeno ma wuwinjo ugambre ku kwong’a bedo i iwu, wun bende wubibedo i Wod, man i Wego.

²⁵Maeni lembang’ola m’eng’olo iwa, cil kwo ma rondo ku rondo.

²⁶Gin maeni agoro iwu pi ju m’uyenyo gitel wiwu ariri swa.

²⁷Ento wun re, wir ma wujolo i bang’e bedo i iwu, man can ponji ma nia ng’atu moko ponj kowu negowu ngo; ento calu wir pare ponjowu pi gin ceke, man en e andha, en e ndra de ngo, man cil calu eponjowu, wubed i ie.

²⁸Kawono, nyithindho para ma thindho, wubed i ie; kara, tek ebinyuthre, wabed ku tegocwiny, man lewic kud unegwa i wang’e i bino pare.

²⁹Tek wung’eyo nia ebedo pwe, wung’eyo nia ku ba dhanu bende m’utimo bedopwe enyologi en.