Read Alur 1 Yohana 5 Bible Online

1 Yohana 5 - Alur bible

1 Yohana 5

¹Ng’atu ma tek uyio nia Yesu en e Kristu nwang’u Mungu nyole: man ng’atu ma tek umaru janyodo nwang’u emaru ng’atu m’enyolo bende.

²Kum maeni wang’eyo nia wamaru nyithindho pa Mungu, ka wamaru Mungu watimo cik pare de.

³Kum maeni en e mer pa Mungu, nia wawor cik pare: man cik pare gi pek ungo.

⁴Kum gin ma tek Mungu nyolo eloyo ng’om: man maeni en e aloci m’uloyo ng’om, en e yioyic mwa.

⁵En e ng’a m’uloyo ng’om, ndhu ng’atu m’uyio nia Yesu en e Wod Mungu ngo?

⁶Maeni ng’atu m’ubino ku pi man rimo, ndhu Yesu Kristu; ku pi kende ngo, ento ku pi ku rimo de.

⁷Man en e Tipo ma nyutho lembe, kum Tipo en e lemandha.

⁸Kum juadek nuti ma ginyutho lembe, en e Tipo, man pi, man rimo: man adek maeni giribri i acel.

⁹Tek wajolo lembanyutha mi dhanu, lembanyutha pa Mungu dit m’usagu: kum lembanyutha pa Mungu e eni, nia enyutho lembe pi Wode.

¹⁰Ng’atu m’uyio ni Wod Mungu ebedo ku lembanyutha i ie: ng’atu m’uyio Mungu ngo eketho ebedo jandra; kum eyio lembanyutha ngo ma Mungu nyutho pi Wode.

¹¹Man lembanyutha e eni, nia Mungu mio kwo ma rondo ku rondo iwa, kwo maeni de ni i Wode.

¹²Ng’atu m’ubedo ku Wod ebedo ku kwo; ng’atu m’ubedo ku Wod Mungu ngo nwang’u kwo mbe kude.

¹³Agoro iwu gin maeni, kara wung’ei nia wubedo ku kwo ma rondo ku rondo, wu ju ma wuyio nying Wod Mungu.

¹⁴Man maeni tegocwiny ma wabedo ko yor i bang’e, nia, tek wakwayu gin moko calku yeny ma ie yenyo, ewinjowa:

¹⁵man tek wang’eyo nia ewinjowa pi gin ma tek wakwayu, wang’eyo nia wabedo ku kwac ma wakwayu i bang’e.

¹⁶Tek ng’atu moko neno umin ubedubo dubo ma mi tho ngo, ebikwayu, man Mungu bimio ire kwo pi ju m’udubo ma mi tho ngo. Dubo nuti ma mi tho: awacu ngo nia ekwai pi maeni.

¹⁷Gondri ceke ci en e dubo: dubo nuti ma mi tho ngo.

¹⁸Wang’eyo nia ng’atu ma tek Mungu nyole dubo ngo; ento ng’atu ma Mungu nyole gwokre gire, e ng’atu ma rac mulo kume de ngo.

¹⁹Wang’eyo nia wa pa Mungu, man ng’om ngung’ de vuto i ng’atu ma rac.

²⁰Wang’eyo de nia Wod Mungu bino, emio iwa ng’eyong’ec de, kara wang’ei ng’atu ma en e mandha, wabedo de i ng’atu ma en e mandha, ndhu i Wode Yesu Kristu. Maeni Mungu mandha, ku kwo ma rondo ku rondo.

²¹Nyithindho para ma thindho, wugwokru giwu ni ayi gin m’acwia.