Read Alur Jupoklembe 1 Bible Online

Jupoklembe 1 - Alur bible

Jupoklembe 1

¹Man etimbre yo ng’ei tho pa Yocuwa, nia nyithindho mir Israel gipenjo ba Yehova, giwacu kumae, Ng’a ma bilar idho malu piwa kum Jukanani, nikiedo kugi?

²Man Yehova wacu kumae, Yuda biidho malu: nen, aketho ng’ombe i cinge.

³Man Yuda wacu ni Simeon m’umin mire kumae, Waidh malu wakudi i makapiny para, kara wakied ku Jukanani; e an bende wabicidho wakudi i makapiny peri. Kum kumeno Simeon gicidho gikude.

⁴Man Yuda idho malu; man Yehova ketho Jukanani ku Juperizi i cing’gi: man gigoyo dhanu m’i kindgi i Bezek rubanga apar.

⁵Man ginwang’u Adoni-bezek i Bezek; e gikiedo kude, man gigoyo Jukanani ku Juperizi.

⁶Ento Adoni-bezek uringo; man gilubo toke, gimake de, man githumo dwong’ lwet cinge ku dwong’ lwet tiende de woko.

⁷Man Adoni-bezek uwacu kumae, Ubimo pier abiro, ma juthumo dwong’ lwet cing’gi ku dwong’ lwet tiendgi woko, gikwanyu cemo migi the mesa para: calu atimo, e Mungu timo i kuma kumeca. Man gikele i Yerusalem, e etho kuca.

⁸Man nyithindho pa Yuda gitimo ali kum Yerusalem, e gimake, man gigoye ku lak palamularu, gicwinyo adhura de ku mac.

⁹Man yo ku ng’eye nyithindho pa Yuda giloro piny kara gikied ku Jukanani m’ubedo i ng’om gudi, man i ng’om ma yor ariwa ma piny, man i poga.

¹⁰Man Yuda cidho kum Jukanani m’ubedo i Hebron (nwang’u nying’ Hebronne naka en e Kiriath-arba); man gigoyo Cecai, ku Ahiman, man Talmai.

¹¹Man ku keca ecidho kum ju m’ubedo i Debir. (Nwang’u nying’ Debir naka Kiriath-sefer.)

¹²Man Kaleb uwacu kumae, Ng’atu m’ugoyo Kiriath-sefer, emake de, abimio ire Aksa ma nyara ire ni dhaku.

¹³Man Othniel ma wod Kenaz, m’umin Kaleb ma nok, umake: e emio ire Aksa ma nyare ni dhaku.

¹⁴Man etimbre, kinde m’ebino i bang’e, nia ekwaye ya epenj won pi podho: man eloro ku wi kana pare: e Kaleb uwacu ire kumae, Iyenyo ang’o?

¹⁵Man ewacu ire kumae, Mi ira mugisa; kum iketha i ng’om ma yor ariwa ma piny, mi ira kulo mi pi bende. Man Kaleb umio ire kulo ma malu ku kulo ma piny.

¹⁶Man nyithindho pa Jakeni, ma Jalkwaru Musa, uidho malu ku i adhura mi thith karacelo ku nyithindho pa Yuda i yamba pa Yuda, ma en e yor ariwa ma piny ni Arad; e gicidho gibedo karacelo ku dhanu.

¹⁷Man Yuda cidho karacelo ku Simeon m’umin mire, e gigoyo Jukanani m’ubedo i Zefath, e ginyothe kot. Man nying adhurane julwong’o Horma.

¹⁸Yuda maku Gaza bende karacelo ku kieune, man Ackelon karacelo ku kieune, man Ekron ku kieune.

¹⁹Man Yehova ni karacelo ku Yuda; man eriemo ju m’ubedo i ng’om gudi woko; kum ecopo riemo ju m’ubedo i poga woko ngo, kum gibedo ku magali mi nyunyu.

²⁰Man gimio Hebron ni Kaleb, calu Musa yero: man eriemo wot Anak adek woko ku keca.

²¹Man nyithindho pa Benyamin giriemo Juyebusi m’ubedo i Yerusalem woko ngo; ento Juyebusi gibedo karacelo ku nyithindho pa Benyamin i Yerusalem cil i ceng’ maeni.

²²Man juot pa Yusuf bende, giidho malu kum Beth-el; e Yehova ni karacelo kugi.

²³Man juot pa Yusuf uoro juci julib Beth-el. (Nwang’u nying adhurane naka en e Luz.)

²⁴E julib gineno ng’atu moko ai ku i adhurane, man giwacu ire kumae, Wakwei, nyuth iwa kamondo mir adhurane, e wabitimi ber.

²⁵Man enyutho igi kamondo mir adhurane; e gigoyo adhurane ku lak palamularu; ento giweko ng’atuno cidho ku juode ceke.

²⁶E ng’atuno cidho i ng’om mi Juhiti, man egomo adhura, man elwong’o nyinge Luz, ma en e nyinge cil i ceng’ maeni.

²⁷Man Manase riemo ju m’ubedo i Beth-cean woko ngo ku pacune de, kadi mi Tanak ku pacune de ngo, kadi ju m’ubedo i Dor ku pacune de ngo, kadi ju m’ubedo i Ibleam ku pacune de ngo, kadi ju m’ubedo i Megido ku pacune de ngo; ento Jukanani giceri i ng’om maeno.

²⁸Man etimbre, kan Israel udoko tek, nia giketho Jukanani i tic ma jumuli ko, e giriemogi woko ndhu ngo.

²⁹Man Efraim uriemo Jukanani m’ubedo i Gezer woko ngo; ento Jukanani gibedo i Gezer i kindgi.

³⁰Zebulun uriemo ju m’ubedo i Kitron woko ngo, kadi ju m’ubedo i Nahalol de ngo; ento Jukanani gibedo i kindgi, man gidoko jutic mi tic ma jumuli ko.

³¹Acer uriemo ju m’ubedo i Ako woko ngo, kadi ju m’ubedo i Sidon de ngo, kadi mi Alab de ngo, kadi mi Akzib kadi mi Helba de ngo, kadi mi Afik de ngo, kadi mi Rehob de ngo;

³²ento Juaceri gibedo i kind Jukanani, ma gi ju m’ubedo i ng’ombe; kum giriemogi woko ngo.

³³Naftali riemo ju m’ubedo i Beth-cemec woko ngo, kadi ju m’ubedo i Beth-anath de ngo; ento ebedo i kind Jukanani, ma gi ju m’ubedo i ng’ombe: ento ju m’ubedo i Beth-cemec ku ju m’ubedo i Beth-anath gidoko jutic mi tic ma jumuli ko.

³⁴Man Juamori gicwalu nyithindho pa Dan i ng’om gudi; kum giyio ngo igi nia gilor piny i poga;

³⁵ento Juamori giceri i got Heres, man i Aijalon, man i Calbim: ento cing’ juot pa Yusuf uloyo, ketho nia gidoko jutic mi tic ma jumuli ko.

³⁶Man kieu mi Juamori uthekre i ka m’aidha mi Akrabim, ugambre ba cana, cik i wie.