Read Alur Jupoklembe 10 Bible Online

Jupoklembe 10 - Alur bible

Jupoklembe 10

¹Man yo ng’ei Abimelek Tola ma wod Pua, ma wod Dodo, dhanu pa Isakar uai nibodho Israel; man ebedo i Camir i ng’om gudi pa Efraim.

²Man epoko lembe i Israel rundi pier ario wi adek, man etho, e juyike i Camir.

³Man yo ng’eye Yair, ma Jagileadi uai; man epoko lembe i Israel rundi pier ario wi ario.

⁴Man ebedo ku wote pier adek, ma giwotho ku wi nyithi kana pier adek e gibedo kud adhura pier adek, ma julwong’o Havoth-yair cil i ceng’ maeni, ma gini i ng’om Gilead.

⁵Man Yair utho, man juyike i Kamon.

⁶E nyithindho mir Israel utimo gin ma rac kendo i wang’ Yehova, man gitimo ni Balim, ku Actaroth, man mungu mi Cami, man mungu mi Sidon, ku mungu mi Moab, man mungu mi nyithindho mir Amon, man mungu mi Jufilisti; e giweko Yehova, man gitimo ire ngo.

⁷E ng’ecwiny pa Yehova opo kum Israel, man eng’iewogi i cing’ Jufilisti, man i cing’ nyithindho mir Amon.

⁸Man gisendo man ging’abu cwiny nyithindho mir Israel i rundi maeca: gisendo nyithindho mir Israel ceke ma gini loka Yordan i ng’om mi Juamori ma en e i Gilead, oro apar wi abora.

⁹Man nyithindho mir Amon gikadhu loka Yordan kara gikied ku Yuda, man kum Benyamin bende, man kum ot pa Efraim; ketho nia Israel ubedo i can ma dit.

¹⁰Man nyithindho mir Israel ulwong’o Yehova, giwacu kumae, Wadubo iri, kum waweko Mungu mwa, man watimo ni Balim.

¹¹Man Yehova wacu ni nyithindho mir Israel kumae, Alaruwu ngo ni Jumisiri, man ni Juamori, man ni nyithindho mir Amon, man ni Jufilisti?

¹²Jusidoni bende, man Juamaleki, ku Jumaoni, gisendowu; e wulwong’a, man abodhowu kud i cing’gi.

¹³Ento wuweka, man wutimo ni mungu mange: kum kumeno abibodhowu kendo ngo.

¹⁴Wucidh wulwong’ mungu ma wufoyo: wek gibodhwu i nindo mi can mu.

¹⁵E nyithindho mir Israel giwacu ni Yehova kumae, Wadubo: tim iwa gin ma tek ubedo ber iri; ento larwa, wakwei, ceng’ maeni.

¹⁶E gikabu mungu ma juwirok woko kud i kindgi, man gitimo ni Yehova; e cwinye dieng’ kum can mir Israel.

¹⁷Nyithindho mir Amon gilund gicokri karacelo, man gigonjo i Gilead. Man nyithindho mir Israel gicokri gigi karacelo, man gigonjo i Mizpa.

¹⁸Man dhanu, ma judongomawijo mi Gilead, giwecri gigi kumae, Ng’atu ma kani ma bilar kwong’o kiedo ku nyithindho mir Amoni? ebibedo wie mi dhanu ceke m’ubedo i Gilead.