Read Alur Jupoklembe 13 Bible Online

Jupoklembe 13 - Alur bible

Jupoklembe 13

¹Man nyithindho mir Israel utimo gin ma rac kendo i wang’ Yehova, man Yehova kethogi i cing’ Jufilisti rundi pier ang’wen.

²Man ng’atu moko nuti m’i Zora, mi wat mi Judani, ma nyinge Manoa; man dhaku pare mugumba kwanye, man enyol ungo.

³Man malaika pa Yehova wok ba dhakune, man ewacu ire kumae, Nen kawono, mugumba kwenyi, man inyol ungo; ento ibigamu ii, man ibinyolo nyathin ma nico.

⁴Ka kumeno kawono gwokri giri, akwei, man kud imadh pigulok kadi giramadha ma lake tek, man kud icam gin moko m’ucido:

⁵kum, nen, ibigamu ii, man ibinyolo nyathin ma nico; man riedi bitundo i wie ki ngo; kum nyathinne bibedo Janaziri ni Mungu ugambre kud i ic: man ebimaku laru Israel kud i cing’ Jufilisti.

⁶Dhakune lund ubino eyero ni cware, ewacu kumae, Dhanu pa Mungu bino i bang’a, man wang’e bedo va wang’ malaika pa Mungu, m’ung’oi ndiri; man apenje ngo pi ka m’eai i ie, kadok nyinge de eyero ira ngo:

⁷ento ewacu ira kumae, Nen, ibigamu ii, man ibinyolo nyathin ma nico; e kawono kud imadh pigulok moko kadi giramadha ma lake tek, man kud icam gin moko m’ucido; kum nyathin bibedo Janaziri ni Mungu ugambre kud i ic cil i ceng’ mi tho pare.

⁸Manoa lund ukwayu Yehova, man ewacu kumae, A, Rwoth, akwei, wek dhanu pa Mungu m’ioro ubin kendo i bang’wa, man eponjwa maram wabitimo ko kum nyathin ma jubinyolo.

⁹Man Mungu winjo dwand Manoa; man malaika pa Mungu bino kendo ba dhaku nwang’u eni i podho: ento Manoa ma cware ni karacelo kude ngo.

¹⁰Man dhakune timo pio, man eringo, man eyero ni cware, ewacu ire kumae, Nen, ng’atuca wok i bang’a, en e ng’atu ma nyamaca bino i bang’a.

¹¹Man Manoa ai malu, man elubo tok dhaku pare, e ebino ba ng’atuca, man ewacu ire kumae, In i ng’atu m’uyero lembe ni dhaku? Man ewacu kumae, An a en.

¹²Man Manoa wacu kumae, Kawono wek lembe peri tjmbre kakare: nyathin maeni bibedo nenedi, man wabitimo ire nenedi?

¹³Man malaika pa Yehova wacu ni Manoa kumae, Gin ceke m’ayero pire ni dhaku wek egwokre gire.

¹⁴Kud ecam gin moko m’uai bang’ ulok, kadok pigulok kadi giramadha ma lake tek de kud emadhi, kadi kud ecam gin moko m’ucido; gin ceke m’ang’olo ire wek ekwire.

¹⁵Man Manoa wacu ni malaika pa Yehova kumae, Akwei, wek waceri, kara wayik nyathi diel iri.

¹⁶Man malaika pa Yehova wacu ni Manoa kumae, Kadok icera, abicamu kum kwen peri ngo; man tek ibiyiko lam m’awang’a, ibikothiere be ni Yehova. Kum Manoa ng’eyo ngo nia en e malaika pa Yehova.

¹⁷Man Manoa wacu ni malaika pa Yehova kumae, Nyingi ng’a, kara, ka lembe peri timbre kakare wayungi?

¹⁸Man malaika pa Yehova wacu ire kumae, Nedi ipenjo nyinga, kum en e nying’ mi wang’uici?

¹⁹Kum kumeno Manoa gamu nyathi diel karacelo ku lam mi mogo, man ethiere wi kidi ni Yehova: man malaika timo ma wang’u ijo; man Manoa ku dhaku pare gineno.

²⁰Kum etimbre, kinde ma lebmac uidho malu i polo ku ba pemblam, nia malaika pa Yehova idho kud i lebmac mi pemblam: man Manoa ku dhaku pare gineno; e gipodho arieba wang’gi i ng’om.

²¹Ento malaika pa Yehova wok kendo ngo ba Manoa kadi ba dhaku pare. E Manoa lund ung’eyo nia e malaika pa Yehova.

²²Man Manoa wacu ni dhaku pare kumae, Wabitho andha, kum waneno Mungu.

²³Ento dhaku pare wacu ire kumae, Tek Yehova yenyo enegwa, kuno di k’ejolo lam m’awang’a ku lam mi mogo de ngo kud i cingwa, kadok gin maeni ceke de kuno di k’enyutho iwa ngo, kadok wagi gin ma kumeni de kuno di k’eyero ngo i nindo maeni.

²⁴Man dhakune nyolo nyathin ma nico, man elwong’o nyinge Samson: man nyathin udongo, e Yehova mio mugisa ire.

²⁵Man Tipo pa Yehova maku ting’o cwinye i Mahanedan i kind Zora kud Ectaol.