Read Alur Jupoklembe 16 Bible Online

Jupoklembe 16 - Alur bible

Jupoklembe 16

¹Man Samson ucidho Gaza, man eneno dhaku moko kuca ma won asara, man emondo i bang’e.

²Man juyero maeni ni Jugazi, juwacu kumae, Samson ubino keni. Man gitieke, e gikanu adhi ire soro ku diewor dhugang’ mir adhura, e gibedo ling’ diewor soro, giwacu kumae, Wakuru cil ma piny uru ko, e wabinege.

³Man Samson uvuto cil i diewor ma ling’, man eai malu i diewor ma ling’, man emaku dhugola mi dhugang’ mir adhurane, kud akara ario, man efudhogi, karacelo kud utwindine ceke, e ekethogi wi goke, man eterogi wi got ma ni i wang’ Hebron.

⁴Man etimbre yo ng’eye, nia emaru dhaku i poga m’i Sorek, ma nyinge Delila.

⁵Man rwodhi mi Jufilisti giidho malu ba dhakune, man giwacu ire kumae, Bidhe, man inen nia tego pare ma dit ni i ang’o, man nia wacopo sage ni kum ang’o, kara watwie wasende: e wabimio iri sente mi mola ma tar dak apar wi acel kubang’wa kubang’wa.

⁶Man Delila wacu ni Samson kumae, Akwei, wac ira tego peri ma dit ni i ang’o, man jucopo twii kud ang’o kara jusendi.

⁷Man Samson uwacu ire kumae, Tek gitwia ku thondh atum ma nyen abiro, e abidoko ng’ic, man abibedo calu ng’atu mange.

⁸E judongomawijo mi Jufilisti gilund gikelo thondh atum ma nyen abiro ma fodi juketho ethwo ngo, man etwie kugi.

⁹Nwang’u ebedo ku ju m’ukanu adhi i kusika ma yor i ie. Man ewacu ire kumae, Jufilisti gini i wii, Samson. Man erwadu thondh atum, calu thondh atutu kan emulo mac. Kum kumeno tego pare ng’eire ngo.

¹⁰Man Delila wacu ni Samson kumae, Nen, icaya, man iyero ira lem ndra: kawono yer ira, akwei, pi gin ma jucopo twii ko.

¹¹Man ewacu ire kumae, Ndhu tek gitwia ku uno ma nyen ma jutimo kudo tic moko ngo, abilund doko ng’ic, e abibedo calu ng’atu mange.

¹²Kum kumeno Delila gamu uno ma nyen, man etwie kudo, man ewacu ire kumae, Jufilisti ni wii, Samson. Man ju m’ukanu adhi ginuti i kusika yor i ie. Man erwadugi kud i bote calu thondh bongu.

¹³Man Delila wacu ni Samson kumae, Cil ku kawono icaya, man iyero ira lem ndra: yer ira pi gin ma jucopo twii ko. Man ewacu ire kumae, Tek icwio yuk wia m’akieda abiro ku jambcwic mi bongu.

¹⁴Man egure kum yen ku gute, man ewacu ire kumae, Jufilisti gini wii, Samson. E eceu ku wang’ nindo pare, man efudho gute kud i yen, ku jambcwic mi bongu.

¹⁵Man ewacu ire kumae, Icopo wacu nenedi kumae, Ameri, kan adundeni bedo tung’ kuda? icaya wang’ adek maeni, man iwacu ira ngo pi gin ma tego peri ma dit ni i ie.

¹⁶Man etimbre, kan ecege ceng’ ku ceng’ pi lembe pare, man ecung’e, nia cwinye ng’abre cil ni tho.

¹⁷Man eyero ire adundene ceke, man ewacu ire kumae, Riedi foduwok i wia ngo; kum abedo Janaziri ni Mungu ugambre kud i ma: tek jugwaru wia, e tego para biai kud i bang’a, man abidoko ng’ic, man abibedo calu dhanu mange.

¹⁸Man ka Delila neno nia eyero ire adundene ceke eoro elwong’o judongomawijo mi Jufilisti, ewacu kumae, Idh malu wang’ acel maeni, kum eyero ira adundene ceke. E judongomawijo mi Jufilisti gilund giidho malu i bang’e, man gikelo sente i cing’gi.

¹⁹Man eketho enindo wi bambe; e elwong’o ng’atu acel, ugwaru yuk wie m’akieda abiro kud i wie; man emaku sende, e tego pare ai woko kud i bang’e.

²⁰Man ewacu kumae, Jufilisti ni i wii, Samson. Man eceu ku wang’ nindo pare, man ewacu kumae, Abicidho woko calu nindo mange, man abigonjra gira. Ento eng’eyo ngo nia Yehova ai kud i bang’e.

²¹Man Jufilisti gimake, man giwodho wang’e woko; e gikele piny i Gaza, man gitwie ku jambtwic mi mola: man erego rego i otkol.

²²Ento yukwie maku twi kendo yo ng’ei ma jugwaru.

²³Man judongomawijo mi Jufilisti gicokri karacelo kara githier lam ma dit ni Dagon ma mungu migi, man kara anyong’a neggi; kum giwacu kumae, Mungu mwa ketho Samson ma jadegi mwa i cingwa.

²⁴Man ka dhanu nene, gipaku mungu migi; kum giwacu kumae, Mungu mwa ketho jadegi mwa i cingwa, man janyoth ng’om mwa, m’enego kindwa dupa.

²⁵Man etimbre, kinde m’anyong’a nego adundegi, nia giwacu kumae, Wulwong’ Samson, kara enyai lele iwa. Man gilwong’o Samson kud i otkol; man enyayu lele i wang’gi. Man gikethe i dier mbegi:

²⁶man Samson uwacu ni nyathi nyir m’umaku cinge kumae, Wek amak kum mbegi ma ot ubedo i wie, kara ajengra i kumgi.

²⁷Nwang’u ode pong’ ku dhanu jumaco ku jumamon; man judongomawijo ceke mi Jufilisti gini keca; man dhanu calu rubanga adek jumaco ku jumamon gini wi ode, ma gineno kinde ma Samson unyayu lele.

²⁸Man Samson ulwong’o Yehova, man ewacu kumae, E Rwoth Yehova, poi pira, akwei, man imi ira tego akwei, wang’ acel maeni kende, E Mungu, kara acul kwor kum Jufilisti pi wang’a ario.

²⁹Man Samson umaku mbegi ario m’i diere ma ot ubedo i wie, man etiele i kumgi, acel ku cinge ma yor acwic, acel ke ku cinge ma yor acam.

³⁰Man Samson uwacu kumae, Wek atho ku Jufilisti. Man eliere gire ku tego pare ceke; e ode podho wi judongomawijo, man wi dhanu ceke ma gini i ie. Kum kumeno ju m’utho m’enego i tho pare gisagu ju m’enego ma fodi ekwo.

³¹E utumin ku ot pa won ceke gilund giloro piny, man gigame, e gikele malu, man giyike i dier Zora ku Ectaol i ka ma juyiko ie dhanu pa Manoa ma won mire. Man epoko lembe i Israel rundi pier ario.