Read Alur Jupoklembe 20 Bible Online

Jupoklembe 20 - Alur bible

Jupoklembe 20

¹Nyithindho mir Israel ceke gilund giwok woko, man udul dhanu cokri calu ng’atu acel, ugambre Dan cil Ber-ceba, karacelo ku ng’om Gilead, ba Yehova i Mizpa.

²Man rwodhi mi dhanu ceke, en e mi suru ceke mir Israel, ginyuthri gigi i cokri mi dhanu pa Mungu, dhanu m’uwotho ku tiendgi ma weg palamularu rubanga dak ang’wen.

³(Nie nyithindho pa Benyamin giwinjo nia nyithindho mir Israel giidho malu i Mizpa.) Man nyithindho mir Israel giwacu kumae, Wac iwa, dubo maeni timbre nenedi.

⁴E Jalawi, ma cwar dhaku ma junego, uloko lembe man ewacu kumae, Awok Gibeya ma en e pa Benyamin, an ku dhaku para m’araga, kara wagonj.

⁵E dhanu m’i Gibeya gicori i wia, man gitieko ot gbur i wia ku diewor; igi pido ya ginega, man dhaku para m’araga gitime rac, e etho.

⁶E agamu dhaku para m’araga, man athume ni wath ni wath, e aore i ng’om ceke mir aba mir Israel; kum gitimo dubo man kasegu i Israel.

⁷Nen, wu nyithindho mir Israel, wun ceke, wumi lembe m’i dhogwu man lembapora m’i dhogwu.

⁸E dhanu ceke giai malu calu ng’atu acel, giwacu kumae, Kindwa moko mbe ma bicidho ba hema pare, kadi kindwa moko mbe ma bilokre ba ot pare.

⁹Ento kawono maeni en e gin ma wabitimo kum Gibeya: wabiidho malu i kume ku gagi;

¹⁰man wabigamu dhanu apar ku kind dhanu dak acel i suru ceke mir Israel ngung’, man dak acel i kind rubanga, man rubanga i kind rubanga apar, kara gikel cam ni dhanu, kara gitim, kinde ma giwok Gibeya mi Benyamin, calku kasegu ceke ma gitimo i Israel.

¹¹Kum kumeno dhanu ceke mir Israel gicokri karacelo kum adhurane, ma giribri calu ng’atu acel.

¹²Man suru mir Israel gioro dhanu i kind suru mi Benyamin ceke, giwacu kumae, Dubo maeni ang’o m’utimbre i kindwu?

¹³Ka kumeno kawono wuwodh dhanu, ju ma rac maeno, ma gini i Gibeya, kara waneggi, man wakab dubo woko ku bang’ Israel. Ento Benyamin ukwero winjo dwand uturneggi ma nyithindho mir Israel.

¹⁴E nyithindho pa Benyamin gicokri gigi karacelo kud i adhura gicidho Gibeya, kara gicidh gikied ku nyithindho mir Israel.

¹⁵E nyithindho pa Benyamin gikwandri i ceng’ maeca ku i adhura dhanu rubanga pier ario wi abusiel ma weg palamularu, umedo dhanu m’ubedo i Gibeya, ma gikwandri dhanu ma jugoyo wigi dak abiro.

¹⁶I kind dhanu maeni ceke ma jugoyo wigi juracam dak abiro nuti; kubang’gi nzu ng’atuman copo canyu kidi atira ma calu nying yukwic acel, man ekier ungo.

¹⁷Man dhanu mir Israel, ma Benyamin umbe i kindgi, jukwanugi rubanga dak ang’wen ma weg palamularu: maeni ceke gi dhanu mir ali.

¹⁸E nyithindho mir Israel giai malu, man giidho i Beth-el, e gikwayu lembapora ba Mungu; man giwacu kumae, Ng’a ma bilar idho malu piwa nikiedo ku nyithindho pa Benyamini? E Yehova wacu kumae, Yuda bilar idho.

¹⁹E nyithindho mir Israel giai malu kugweno, man gigonjo kum Gibeya.

²⁰E nyithindho mir Israel giwok woko nikiedo ku Benyamin; man nyithindho mir Israel githero lwiny i kumgi i Gibeya.

²¹Man nyithindho pa Benyamin giwok woko ku i Gibeya, man i ceng’ maeca gigoyo dhanu mir Israel piny i ng’om rubanga pier ario wi ario.

²²Man dhanu, ma dhanu mir Israel, gidwoko cwinygi gigi tek, man githero lwiny kendo i ka ma githero i ie i ceng’ ma kwong’a.

²³E nyithindho mir Israel giidho malu man giywak i wang’ Yehova cil uthieno; man gipenjo Yehova, giwacu kumae, Abicoro ceng’ni kendo nikiedo ku nyithindho pa Benyamin m’umira? E Yehova wacu kumae, Idh malu ikied kude.

²⁴Man nyithindho mir Israel gibino ceng’ni kum nyithindho pa Benyamin i ceng’ mir arionde.

²⁵E Benyamin ucidho woko ku i Gibeya nikiedo kugi i ceng’ mir arionde, man ginyotho dhanu ma kind nyithindho mir Israel kendo piny i ng’om rubanga apar wi abora; maeni ceke gi weg palamularu.

²⁶Nyithindho mir Israel ceke, ku dhanu ceke, giidho malu, man gibino Beth-el, e giywak, man gibedo keca i wang’ Yehova, man giweko cam i ceng’ maeca cil uthieno; man githiero lam m’awang’a ku lam mi kwiocwiny i wang’ Yehova.

²⁷Man nyithindho mir Israel gipenjo Yehova (kum sanduk mi lembariba pa Mungu ni keca i ceng’ maeca,

²⁸man Finehaz, ma wod Eleazar, ma wod Harun, ucungo i wang’e i ceng’ maeca), ewacu kumae, Acidh kendo nikiedo ku nyithindho pa Benyamin m’umira, kadi aweki? Man Yehova wacu kumae, Idh malu; kum urwo abikethe i cingi.

²⁹Man Israel uketho weg adhi kum Gibeya utieke gbur.

³⁰Man nyithindho mir Israel giidho nikiedo kum nyithindho pa Benyamin i ceng’ mir adege, man githero gigi kum Gibeya, calu i nindo mange.

³¹Man nyithindho pa Benyamin giwok woko kum dhanu man juywayugi bor kud adhurane; e gimaku goyo ku nego kind dhanu, calu i nindo mange, ma yenyo romo dhanu mir Israel pier adek, i gengi, ma yoje acel idho Beth-el, mucelo ke Gibeya, i podho.

³²E nyithindho pa Benyamin giwacu kumae, Jubegoyogi i wang’wa, calu ma kwong’a. Ento nyithindho mir Israel giwacu kumae, Dong’ waringu, man wayweyugi woko ku kum adhurane i gengi.

³³E dhanu mir Israel ceke giai malu kud i kakagi, man githero gigi i Bal-tamar: man weg adhi mir Israel giai ku ka ma nwang’u gini i ie, cil kud i Maregeba.

³⁴Man dhanu rubanga apar ma jugoyo wigi kud i Israel ceke gibino kum Gibeya, e lwiny ubedo tek apila; ento ging’eyo ngo nia lem ma rac ni ceng’ni gi.

³⁵Man Yehova goyo Benyamin i wang’ Israel; man nyithindho mir Israel ginyotho dhanu pa Benyamin i ceng’ maeca rubanga pier ario wi abic ku dak acel: maeni ceke gi weg palamularu.

³⁶Kum kumeno nyithindho pa Benyamin gineno nia jugoyogi; kum dhanu mir Israel gimio kaka ni Benyamin, kum gigeno weg adhi ma giketho kum Gibeya.

³⁷E weg adhi gitimo pio, man gicori i wi Gibeya; man weg adhi giywairi gigi, man gigoyo adhura ceke ku lak palamularu.

³⁸Nie giranyutha ma juketho i kind dhanu mir Israel ku weg adhi e eni, nia gibiketho afuru ma dit mi yiro uthwogre malu kud i adhurane.

³⁹Man dhanu mir Israel gilokri i lwiny, man Benyamin umaku goyo enego de dhanu mir Israel ma yenyo romo pier adek; kum giwacu kumae, Andha jugoyogi piny i wang’wa, calu i lwiny ma kwong’a.

⁴⁰Ento kan afuru maku thwogre malu kud i adhurane calu mbegi mi yiro, Jubenyamini gineno i ng’eigi; man, nen adhura dho idho malu i yiro i polo.

⁴¹Man dhanu mir Israel gilokri, e dhanu pa Benyamin cwinygi ng’abre; kum gineno lembe ma rac uwok i wigi.

⁴²Ka kumeno giloko ng’eigi i wang’ dhanu mir Israel i yo m’i yamba; ento lwiny ulubo tokgi areri; man ju m’uai kud i adhura dupa ginyothogi i kind adhurane.

⁴³Gitieko Jubenyamini gbur, man giriemogi, man ginyonogi i kayom migi, cik kum Gibeya yo ku ma ceng’ wok i ie.

⁴⁴Man dhanu pa Benyamin upodho rubanga apar wi abora; maeni ceke gi dhanu ma ratego.

⁴⁵E gilokri giringo yo ba yamba cil kum cana mi Rimon: man gibeko dong’ dhanu m’i kindgi i gengi dhanu rubanga abic, man gilubo tokgi areri cil kum Gidom, man gigoyo dhanu m’i kindgi rubanga ario.

⁴⁶Kum kumeno dhanu ceke m’upodho i ceng’ maeca pa Benyamin gi dhanu rubanga pier ario wi abic ma gi weg palamularu; maeni ceke gi dhanu ma ratego.

⁴⁷Ento dhanu dak abusiel gilokri giringo yo ba yamba ba cana mi Rimon, man gibedo i cana Rimon dwi ang’wen.

⁴⁸Man nyithindho mir Israel gilokri kendo wi nyithindho pa Benyamin, man gigoyogi ku lak palamularu, adhura bo, ku lim de, man gin ceke ma ginwang’u: umedo maeni adhura ceke ma ginwang’u gicwinyo ku mac.