Read Alur Jupoklembe 7 Bible Online

Jupoklembe 7 - Alur bible

Jupoklembe 7

¹Yerubal, ma en e Gideon, ku dhanu ceke ma gini karacelo kude, gilund giai malu pir, man gigonjo i ng’et kulo mi Harod: man gonjo mi Midian ni yor i ng’etgi ma yor ariwa ma malu, ceng’ni got More, i poga.

²Man Yehova wacu ni Gideon kumae, Dhanu ma gini karacelo kudi gi dit m’usagu ira ma nia ami ko Jumidiani i cing’gi, Israel umaru yungre gire i kuma, gimaru wacu kumae, Cinga gira bodha.

³Ka kumeno kawono yer i ith dhanu, wac kumae, Ng’atu ma tek lworo benege man kume bemiel, dong’ edoki man eai kud i got Gilead. Man kind dhanu m’udok gi rubanga pier ario wi ario; man rubanga apar udong’.

⁴Man Yehova wacu ni Gideon kumae, Fodi dhanu gi dit m’usagu; kelgi piny ba pi, man abimulo igi piri kuca: man ebitimbre, nia ng’atu m’abiwacu pire iri kumae, Maeni bicidho kudi, e ng’atuno bicidho karacelo kudi; man tek ng’atu ma tek abiyero iri pire kumae, Maeni bicidho kudi ngo, e ng’atuno bicidho ngo.

⁵Kum kumeno ekelo dhanu piny ba pi: man Yehova wacu ni Gideon kumae, Ku ba dhanu ceke ma ginang’u pi ku lebgi, calu gwok nang’u, ng’atuno ibikethe gire kende; e kumeno ku ba dhanu ceke m’urum wi cong’gi nimadhu de.

⁶Man wel ju m’unang’u anang’a, ma githoro pi ku cing’gi i dhoggi, gi dhanu dak adek: ento dong’ dhanu ceke girum piny wi cong’gi gimadhu ko pi.

⁷Man Yehova wacu ni Gideon kumae, Ku dhanu dak adek m’unang’u anang’a abibodhowu, man abiketho Jumidiani i cingi; man wek dhanu ceke gidoki ng’atuman i kakare man i kakare.

⁸Kum kumeno dhanu giting’o cam i cing’gi, kud agwara migi: man eoro dhanu ceke mir Israel gidok ng’atuman ba hema pare man ba hema pare, ento ecero dhanu dak adek: man gonjo mi Midian ni piny ire i poga.

⁹Man etimbre i diewor nica, nia Yehova wacu ire kumae, Ai malu, lor piny ba gonjo; kum akethe i cingi.

¹⁰Ento tek lworo negi nicidho, wucidh karacelo ku Pura ma jatic peri piny ba gonjo:

¹¹e ibiwinjo gin ma giwacu; man yo ng’eye cingi binwang’u tego m’ilor ko piny ba gonjone. Elund eloro piny ku Pura ma jatic pare ba kajik mi dhanu ma weg jamtho ma ni i gonjone.

¹²Man Jumidiani ku Juamaleki man nyithindho ceke ma yo nyangu givuto i poga calu bonyo ni udulgi; man ngamia migi gibedo ma welgi mbe, calu kwio ma dhu nam ni udulgi.

¹³Man ka Gideon uwok, nen, ng’atu moko nuti m’ubeyero lek ni jal wadi; man ewacu kumae, Nen, aleko lek; man, nen, lungu kwend nganu podho i gonjo mi Midian, man etundo ba hema, e egoye ketho epodho, man eloko wie piny, ketho hema vuto rec.

¹⁴Man jal wadi loko lembe man ewacu kumae, Maeni gin mange ngo ndhu palamularu pa Gideon ma wod Yoac, ma dhanu mir Israel: Mungu ketho Midian, kud udul dhanu ceke i cinge.

¹⁵Man ebedo kumeno, ka Gideon uwinjo lembe mi lek, ku there de, ya erwo; man edwogo ba gonjo mir Israel, man ewacu kumae, Wuai malu; kum Yehova ketho udul mi Midian i cingwu.

¹⁶Man epoko dhanu dak adek ni ungu adek, man eketho agwara i cing’gi ceke kubang’gi kubang’gi, man cupa ma ie nanu, kud udok sengi yor i cupane.

¹⁷Man ewacu igi kumae, Wunen i bang’a, man wutim kumeno: man, nen, kinde m’awok i kajik mi kagonjo, ebibedo nia, calu atimo, wun bende wutim kumeca.

¹⁸Kinde m’akudho agwara, an ku dhanu ceke ma ni karacelo kuda, e wun bende wukudh agwara i ng’et kagonjo ceke, man wuwac kumae, Pi Yehova man pi Gideon.

¹⁹Kum kumeno Gideon, ku dhanu dak acel ma ni karacelo kude, giwok i kajik mi kagonjo i thekri mi dier kur, ka gidaru wilo jukur: e gikudho agwara, man ginego cupa ma ni i cing’gi.

²⁰Man ungu dhanu adek gikudho agwara, man ginego cupa, man giting’o udok sengi i cing’gi ma yor acam, man agwara i cing’gi ma yor acwic ma gikudho kudo; man gikok kumae, Palamularu pa Yehova man pa Gideon.

²¹E gicungo ku ba dhanu ng’atuman i kakare gitieko ko kagonjo gbur; man udul ceke ringo; gikok de, giriemo kogi.

²²E gikudho agwara dak adek, man Yehova ketho palamularu pa ng’atuman ulokre kum wadi, man kum udul ceke; man udul uringo cil Beth-cita yo ba Zerera, man cik kum ng’om mir Abel-mehola, ma ceng’ni Tabath.

²³Man dhanu mir Israel gicokri karacelo kud i Naftali, man kud i Acer, man kud i Manase ceke, man giriemo Midian.

²⁴Man Gideon uoro jukwenda i ng’om gudi ceke ndri ndri pa Efraim, ewacu kumae, Wulor piny kum Midian, man wumak pi i wang’gi, agbele kum Beth-bara, cil Yordan. Kum kumeno dhanu ceke pa Efraim gicokri karacelo, man gimaku pi agbele kum Beth-bara, cil Yordan.

²⁵E gimaku judongomawijo mi Midian, en e Oreb giku Zeb; e ginego Oreb wi cana pa Oreb, man Zeb ginego kum pany mi pigulok pa Zeb, man giriemo Midian: man gikelo wi Oreb ku pa Zeb ba Gideon loka Yordan.