Read Alur Jupoklembe 8 Bible Online

Jupoklembe 8 - Alur bible

Jupoklembe 8

¹Man dhanu pa Efraim giwacu ire kumae, Nedi itimo kumeni i bang’wa, m’ilwong’owa ngo e, kan icikiedo ku Midiani? Man giloko dhoggi kugi kle kle.

²Man ewacu igi kumae, Atimo ang’o kawono m’apora ko wakudu? Pono nyingulok pa Efraim esagu cekne ma dit pa Abiezer ungo?

³Mungu ketho judongomawijo mi Midian, ma gin Oreb giku Zeb, i cingwu: man acopo timo ang’o m’apora ko wakudu? E lak kwinyo migi tho i kume, kan ewacu maeno.

⁴Man Gideon uwok Yordan, man ekadhu lokaca, en, ku dhanu dak adek ma gini karacelo kude, nwang’u givoc, ento giriemogi asu.

⁵Man ewacu ni dhanu mi Sukoth kumae, Akwayuwu, wumi lungu kwen ni dhanu m’uluba; kum givoc, man aberiemo Zeba giku Zalmuna, ma gin ubimo mi Midian.

⁶Man judongomawijo mi Sukoth giwacu kumae, Cing’ Zeba ku Zalmuna gini i cingi kawono, ma nia wami kwen ni njuru asikari peri e?

⁷Man Gideon uwacu kumae, Ka kumeno ka Yehova daru ketho Zeba giku Zalmuna i cinga, abilund yeco ringkumwu kud ukudho mi yamba man ku mathangaru.

⁸Man eidho ku keca ba Penuel, man eyero igi kumeca; man dhanu mi Penuel de giloko ire calu dhanu mi Sukoth giloko.

⁹Man eyero bende ni dhanu mi Penuel, ewacu kumae, Kan abino kendo i kwiocwiny, abirwombo ot ma tek maeni.

¹⁰Nwang’u Zeba giku Zalmuna gini i Karkor, karacelo kud udul migi, ma yenyo romo dhanu rubanga apar wi abic, ma dong udul mi nyithindho ma yo nyangu m’udong’; kum dhanu ma weg palamularu m’upodho gi rubanga dak acel ku pier ario.

¹¹Man Gideon uidho malu ku yo ba ju m’ubedo i hema yo nyangu ni Noba ku Yogbeha, man egoyo udulne; kum udulne gibedo ma cwiny gi kwio.

¹²Man Zeba ku Zalmuna giringo; man elubo tokgi; e emaku ju m’ubimo ario mi Midian, en e Zeba giku Zalmuna, man eng’abu cwiny udul kpo.

¹³Man Gideon ma wod Yoac udwogo m’eai ba lwiny kud i ka m’aidha pa Herez.

¹⁴Man emaku jalawobi acel i kind dhanu mi Sukoth, man epenjo i bang’e: man eyero ire pi judongomawijo mi Sukoth, ku judongone, dhanu pier abiro wi abiro.

¹⁵Man ebino ba dhanu mi Sukoth, man ewacu kumae, Wunen Zeba ku Zalmuna, ma wucaya pigi, wuwacu kumae, Cing’ Zeba ku Zalmuna ni i cingi kawono, ma nia wami kwen ni dhanu peri m’uol e?

¹⁶E egamu judongo mir adhura maeno, kud ukudho m’i yamba man mathangaru, man eponjo dhanu mi Sukoth ku maeno.

¹⁷Man erwombo ot ma tek ma wiu mi Penuel, man enego dhanu mir adhurane.

¹⁸Elund ewacu ni Zeba ku Zalmuna kumae, Dhanu ma wunego i Tabor gi dhanu ma kumani? Man giloko lembe kumae, Calu ibedo, gibedo kumeno; kubang’gi kubang’gi gi calu nyithindho mir ubimo.

¹⁹Man ewacu kumae, Gi utumira, wot ma: calu Yehova bedo kwo, tek nwang’u ibodhogi ma kwo, kuno di anegowu ngo.

²⁰Man ewacu ni Yether ma wode ma kayu kumae, Ai malu, ineggi. Ento jalawobine wodho palamularu pare ngo; kum lworo nege, kum fodi en e aradu.

²¹E Zeba ku Zalmuna gilund giwacu kumae, Ai in, ipodh i wiwa; kum calu dhanu bedo, tego pare bedo kumeca. Man Gideon uai malu, man enego Zeba ku Zalmuna, man egamu jambyung ma va lakdwi m’i ng’ut ngamia migi.

²²E dhanu mir Israel ulund uwacu ni Gideon kumae, Bim wiwa, in, ku wodi, ku wod wodi bende; kum ilaruwa kud i cing’ Midian.

²³Man Gideon uwacu igi kumae, Abibimo wiwu ngo, kadok woda de bibimo wiwu ngo: Yehova bibimo wiwu.

²⁴Man Gideon uwacu igi kumae, Ayenyo akwai gin moko i beng’wu, nia kubeng’wu kubeng’wu ng’atuman umi ira gwilo m’i ith mir ayeki pare. (Kum gibedo ku gwilo m’i ith mi mola ma kwar, kum gi Juicmaeli.)

²⁵Man giloko lembe kumae, Wabimiogi ku berocwinywa. E gipedho bongu, man gibolo i ie gwilo m’i ith mir ayeki ng’atuman pare ng’atuman pare.

²⁶Man pek mi gwilo mi mola ma kwar m’ekwayu en e cekel mi mola ma kwar rubanga acel ku dak abiro; m’umedo maeno jambyung ma va lakdwi, ku jambyung mange, ku kendi mir uluga ma naka ni i kum ju m’ubimo mi Midian, m’umedo maeno kendo nyoro m’i ng’ut ngamia migi.

²⁷Man Gideon ucwio maeno ni ugoke, man ekethe i adhura pare, en e i Ofra; man Israel kpo giketho cwinygi hai i kume keca; man edoko ni uwic ni Gideon, man ni ot pare.

²⁸Kum kumeno jusagu Midian i wang’ nyithindho mir Israel, e giting’o wigi malu kendo ngo. Man ng’om ukwio rundi pier ang’wen i nindo pa Gideon.

²⁹Man Yerubal ma wod Yoac ucidh ubedo i ot pare gire.

³⁰Man Gideon ubedo ku wote pier abiro m’enyolo en; kum ebedo ku mon dupa.

³¹Man dhaku pare m’araga ma ni i Cekem, unyolo ire wode, man ecaku nyinge Abimelek.

³²E Gideon ma wod Yoac utho i rundi ma ber mi tio, man juyike i odliel pa Yoac ma won, i Ofra mi Juabiezri.

³³Man etimbre, nia ndhu ndh uka Gideon utho, nia nyithindho mir Israel gilokri kendo, man gitimo asara tok Balim, man giketho Bal-berith ni mungu migi.

³⁴Man nyithindho mir Israel gipoi kum Yehova Mungu migi ngo, m’ubodhogi kud i cing’ judegi migi ceke i ng’etgi kun ku kun;

³⁵kadok bero de ginyutho ngo ni ot pa Yerubal, ma en e Gideon, calku bero ceke m’enyutho ni Israel.