Read Alur Yuda 1 Bible Online

Yuda 1 - Alur bible

Yuda 1

¹Yuda, jamiru pa Yesu Kristu, m’umin Yakobo ni ju ma julwong’ogi, ma gi jumer i Mungu ma Wego, ma jugwoko de pi Yesu Kristu:

²Kisa man kwiocwiny ku mer umedre iwu.

³Jumer, kinde m’abeponjo k’amora ya agor iwu pi both mwa ma wan ceke waribra i ie karacelo, e ia wacu ya akoagor iwu be m’abethoko kowu ya wuii aiia pi yioyic ma jumio wang’ acel pii ni jumaleng’.

⁴Kum jumoko nuti ma gimondo nyalwe, gi ju ma yang’ jular jugoro pigi ni gonj maeni ma jugonjo kojo, gi ju ma ayi Mungu mbe i kumgi, ma giloko bero pa Mungu mwa ni awanya ma rac, ma gikwero ko Jadit mwa ma acel kende ma Rwoth, Yesu Kristu.

⁵Nie ayenyo apoiwu, kadok wung’eyo gin ceke wang’ acel pii, ya Rwoth, kan edaru laru dhanu m’ewodho kogi k’i ng’om Misiri, yo ku ng’eye enyotho ju m’uyio ngo.

⁶Man ke malaika de ma gigwoko ka ker migi gigi ngo, ento giweko kakagi m’umakugi, egwoko i kol ma nja ku nja the mudho, cil i lembapoka mi ceng’ ma dwong’ nini.

⁷Cil calu Sodom ku Gomora, man adhura m’i vutgi, ma gimiri gigi ni tarwang’ calu joca bende timo ma gilubo tok kum ma tung’ de, e jukethogi ngbeng’ calu por, ma gibesendri ku masendi mi mac ma rondo ku rondo.

⁸E joni bende calu joca gicido kum i lek migi, gidwoko kero ni gin mananu, man gicayu weg dwong’.

⁹Ento Mikael ma en e malaika ma jadit, kinde ma gi-ii giku wonabau epiemo pi kum Musa, cwinye tek ungo m’ekelo ko lembapoka mi cac i wie, ento ewacu kumae, Dong’ Rwoth ujuki.

¹⁰Endre joni gicayu gin ma tek ging’eyo ngo: man gin ma ging’eyo ma ku kum ginyothri i ginde, calu yedi ma rieko mbe kugi.

¹¹Can i wigi! kum gikwanyu yo pa Kain, man gikonjri vur i kier pa Balam kara ginwang’ sukulia, e girwinyo i piem pa Kora.

¹²Joni gi kidi m’upandre i cemo mi mer mu kinde ma wucamu wukugi, gi jukwac ma kakri gigi ma lworo mbe kugi; gin afuru ma pi mbe i igi, ma yamu cidho kudo; gi yen mi oro ma nyinge mbe, m’utho wang’ ario, ma jufudho woko kud ulage;

¹³gi mukura m’i nam ma dhongo, ma gibedhuro lewic migi gigi; gi cero m’ubewire rr, ma mudho ma col bii kandre igi mi rondo ku rondo.

¹⁴Man Enok bende, ma ng’atu mir abirone yo ng’ei Adamu, eewo ni joni, ewacu kumae, Nen, Rwoth ubino ku jupare ma leng’ rubanga apar,

¹⁵nipoko lembe wi ceke, man nipoko lembe wi ju ma ayi Mungu mbe kugi ceke kum tic migi ceke ma ayi Mungu mbe i kume, ma gitimo ma ayi Mungu mbe ko, man pi gin ma tek ceke ma judubo ma ayi Mungu mbe i kumgi giyero pire.

¹⁶Joni gi jung’ur, gi jupir, ma gilubo tok awanya migi ma rac (ma dhoggi yero lembe ma dit ma yenyo) ma dhanu bedo tung’ tung’ i wang’gi ni kum kuloka.

¹⁷Ento wun, jumer, wupoi pi lembe ma yang’ alar ayero ni kum jukwenda pa Rwoth mwa ma Yesu Kristu;

¹⁸ya giwacu iwu kumae, I dong nindo jucac bibedo nuti ma gibewotho ku lubo tok awanya migi ma rac ma ayi Mungu mbe i ie.

¹⁹Joni gi ju ma ginyayu pok ma jupokri ko, gi dhanu ma gilubo kum, ma Tipo mbe kugi.

²⁰Ento wun, jumer, ma wugombru giwu wi yioyic mu ma leng’ kwe, ma wuberwo ko i Tipo Maleng’,

²¹wukuru giwu i mer pa Mungu, ma wubekio ko kisa pa Rwoth mwa Yesu Kristu ni kwo ma rondo ku rondo.

²²Man bed ku kisa kum jumoko ma cwinygi jiji;

²³man wular jumoko, ma wuyudh kogi kud i mac; man bed ku kisa ku lworo kum jumoko; ma wudag ko cil kendi ma kume cwinyo ni kum kum.

²⁴Nie ni ng’atu ma copo kurowu kara kud wukier, m’ecopo kethowu wang’ dwong’ pare ma lembe mbe i wiwu i mutoro ma dit,

²⁵ni Mungu m’e kende ma Jalar mwa, ni kum Yesu Kristu ma Rwoth mwa, ire yung, ku dwong’, ku kero man tego, m’ugambre por con, kawono de, man cil rondo ku rondo. Amen.