Read Alur Lembanyutha 1 Bible Online

Lembanyutha 1 - Alur bible

Lembanyutha 1

¹Lembanyutha pa Yesu Kristu, ma Mungu mio ire enyuth ni jumiru pare, cil gin ma fodi nyanok bikotimbre be: man eoro enyuthe ku malaika pare ni jatic pare Yohana;

²m’enyutho pi lembe pa Mungu, man pi lembatuca pa Yesu Kristu, cil gin ceke m’eneno.

³Mugisa ni ng’atu m’usomo, man ni ju m’uwinjo lembila maeni man ni ju m’uworo gin m’ugore i ie de: kum nindone dhingo ceng’ni.

⁴Yohana ni kanisa abiro ma tic i Asia: Bero iwu man kwiocwiny, m’uai ba ng’atu ma tic ma yang’ de etie m’ebibino de: m’uai de ba Tipo abiro ma gini nyim komker pare;

⁵m’uai de ba Yesu Kristu, ma en e jamulembe mandha, m’e kayu mi ju m’utho, man jabim mir ubimo m’i ng’om. Ire m’emaruwa, m’egonyowa kud i dubo mwa ku rimbe;

⁶man eketho wabed ni ker, julam ni Mungu pare man Won; dwong’ ku kero bed ire rondo ku rondo. Amen.

⁷Nen, ebino kud afuru; man ku ba wang’ ceke binene, ku ju m’ucobe de; man thek ceke m’i ng’om biywak ire. Cil kumeno. Amen.

⁸An a Alfa kud Omega, Rwoth Mungu wacu, ng’atu ma tic ma yang’ de etie m’ebibino bende, m’e Jategokpo.

⁹An a Yohana, m’umegwu man jarib wakudu i masendi ku ker ku twiocwiny ma gini i Yesu, nwang’u ani i cula ma julwong’o Patmo, kum lembe pa Mungu man kum lembatuca pa Yesu.

¹⁰Nwang’u ani i Tipo i ceng’ pa Rwoth, e awinjo dwal ma dit yor i ng’eya, calu mir agwara,

¹¹m’uwacu kumae, Gin m’ineno, gor i kitabu man iore ba kanisa abiro: bang’ Efeso, ba Smurna de, ba Pergamo de, ba Thuatera de, ba Sardi de, ba Filadelfia de, man ba Laodikia bende.

¹²Man alokra nineno dwal m’uweco kuda. E kan alokra aneno thethala mi mola ma kwar abiro;

¹³man i kind thethala ng’atu acel ma calu wod dhanu, m’eronyo bongu lot wi tiende, ma kore de bedo atwia ku foto mola ma kwar.

¹⁴Man wie ku yukwie de gi tar pu tar pami yuk rombo, tar calu pei; nying wang’e de va lebmac;

¹⁵tiende de calu mola m’urieny, calu ma tek juwang’u i uka; dwande de calu ba pi dupa.

¹⁶Man cero abiro ni i cinge ma yor acwic: man palamularu ma lake bith kun ku kun uwok kud i dhoge: wang’e de va ceng’ m’urieny i tego pare.

¹⁷E kan anene, apodho the tiende pami ng’atu m’utho. Man eketho cinge ma yor acwic i kuma, ewacu kumae, Lworo kud unegi; an a ma kwong’a ku ma cen de,

¹⁸man ng’atu ma Kwo; an ma nwang’u atho, man nen, abedo kwo mi rondo ku rondo, man abedo ku kifungula mi tho man mi Hadeya.

¹⁹Ka kumeno kieu gin m’ineno man gin ma tic, ku gin ma bitimbre macen;

²⁰giramung’a mi cero abiro m’ineno i cinga ma yor acwic, man mi thethala abiro mi mola ma kwar. Cero abirone gi malaika mi kanisa abiro: man thethala abirone gi kanisa abiro.