Read Alur Lembanyutha 10 Bible Online

Lembanyutha 10 - Alur bible

Lembanyutha 10

¹Man aneno malaika mange ma tek uloro kud i polo, m’eronjre kud afuru; man dhanyu ni i wie, wang’e de calu ceng’, man tiende va mbegi mi mac;

²man emaku nyathi kitabu m’ubedo ayaba i cinge: man eketho tiende ma yor acwic wi nam, ma yor acam ke wi ng’om;

³man ekok ku dwal ma dit, calu umvor m’ubeywak: man kan ekok, e morpolo abiro weco ku dwandgi.

⁴Man ka morpolo abiro weco ku dwandgi, ayenyo nik agor: man awinjo dwal uai i polo wacu kumae, Mwon ayi kum lembe ma morpolo abiro wacu, kud igorgi agora.

⁵Man malaika m’aneno cungo wi nam ku wi ng’om de ting’o cinge ma yor acwic malu yor i polo,

⁶man ekwong’o kwong’ ku ng’atu ma bedo rondo ku rondo, m’ecwio polo ku giki m’i ie, ku ng’om man giki m’i ie, ku nam de man giki m’i ie, ya galu bidong’ bedo nuti kendo ngo:

⁷ento i ceng’ mi dwand malaika mir abirone, kinde m’eyenyo ekudh agwara, e giramung’a pa Mungu lund uthum, calku lembanyong’a m’eyero ni jumiru pare ma jubila.

⁸Man dwal m’awinjo ai i polo, awinje kendo m’ebeweco kuda, man ewacu kumae, Cidhi, ting’ kitabu m’ubedo ayaba i cing’ malaika m’ucungo wi nam ku wi ng’om de.

⁹Man acidho ba malaika, awacu ire nia emi ira nyathi kitabu. Man ewacu ira kumae, Ting’e, came; man ebidwoko ii kec, mana i dhogi re ebibedo lim lim va kic.

¹⁰Man agamu nyathi kitabu kud i cing’ malaika, man acame; man ebedo lim lim i dhoga va kic: e kan adaru came ci, ia doko kec.

¹¹Man giwacu ira kumae, Ibikoewo kendo be wi kodhidhanu dupa ku thek man dhok man ju m’ubimo.