Read Alur Lembanyutha 15 Bible Online

Lembanyutha 15 - Alur bible

Lembanyutha 15

¹Man aneno giranyutha mange i polo, ma dit ku ma wang’u ijo, malaika abiro ma weg masendi abiro, m’udong’ cen, kum i igi kwinyo pa Mungu thum.

²Man aneno gin ma calu nam mi kieu m’ujebre ku mac: ku ju m’uloyo kum lembe mi yedi, man kum ayi pare, man kum wel nyinge, gicungo dhu nam mi kieu, man gi weg adungu pa Mungu.

³Man giwero wer pa Musa ma jamiru pa Mungu, ku wer pa Nyathi Rombo, giwacu kumae, Tic peri gi dwong’ ma wang’u ijo de, E Rwoth Mungu, ma Jategokpo; yo peri bedopwe man andha de, in Ubimo mi nja.

⁴Ng’a ma lworo binege ngo, E Rwoth, ma k’ebiyungo nyingi de ngo? kum in i kendi e m’i leng’; kum thek ceke bibino man gibirwo i weng’i; kum tic peri mi bedopwe udaru nyuthre.

⁵E yo ng’ei gin maeni aneno, man hekalu mi hema mi lebatuca mi polo yabre:

⁶e malaika abiro ma gibedo ku masendi abiro giwok kud i hekalu, ma gironyo kidi ma pire tek, ma leng’ m’uriang’ni de, ma korgi bedo atwia ku foto mi mola ma kwar.

⁷Man ng’atu acel ma kind yedi ang’wen ma kwo umio ni malaika abiro tabu abiro mi mola ma kwar ma kwinyo pa Mungu pong’ i igi, en m’e kwo rondo ku rondo.

⁸Man hekalu pong’ ku yiro m’uai ba dwong’ pa Mungu, man ba tego pare; man ng’atu moko mbe ma copo mondo i hekalu, ma fodi masendi abiro mi malaika abiro ku thum ungo.