Read Alur Lembanyutha 16 Bible Online

Lembanyutha 16 - Alur bible

Lembanyutha 16

¹Man awinjo dwal ma dit uai kud i hekalu, uweco ni malaika abiro kumae, Wucidhi, wukonj tabu abiro mi kwinyo pa Mungu i ng’om.

²Man ma kwong’ane cidho, man ekonjo tabu pare i ng’om; man edoko ni vur ma rac ma remo dit wi dhanu ma weg kiedo pa yedi ma girwo ni ayine de.

³Man mir arionde konjo tabu pare i nam; e edoko ni rimo calu mir avu dhanu; man ku ba ng’eyong’ec ceke mi kwo githo, cil gin ma ni i nam.

⁴Man mir adege konjo tabu pare i kulo man wi pi ma dhenyni; man edoko ni rimo.

⁵Man awinjo malaika mi pi wacu kumae, In i pwe, in m’i nuti man yang’ de inuti, in m’i Ng’atu Maleng’, kum ipoko lembe kumeno:

⁶kum githwogo rimb jumaleng’ ku mi jubila de, imio igi rimo gimadhi: eromo kugi de.

⁷Man awinjo pemblam uwacu kumae, Eyo, E Rwoth Mungu, ma Jategokpo, lembapoka peri en e andha pwe de.

⁸Man mir ang’wende konjo tabu pare wi ceng’; man jumio ire ewang’ ko dhanu ku mac.

⁹E dhanu wang’ ku lietho ma dit: man gicido nying’ Mungu m’e won tego wi masendi maeni; man giloko cwinygi ngo nimie dwong’.

¹⁰Man mir abije konjo tabu pare wi komker pa yedi; e ker pare cido bii; man gikayu lebgi kum remokum,

¹¹man gicido Mungu m’i polo kum remokum migi ku vur migi; man giloko cwinygi de ngo kum tic migi.

¹²Man mir abusiende konjo tabu pare wi kulo ma dit, en e kulo Bufrate; e pige dwono kau, kara yo yikre ni ubimo m’uai yo nyangu.

¹³Man aneno tipo m’ucido adek ma calu ungwal uai kud i dhu ng’ec, man i dhu yedi, man i dhu jabila mi ndra:

¹⁴kum gi tipo pajogi, ma gibetimo giranyutha; ma gicidho woko bang’ ubimo m’i ng’om ngung’, nicokogi karacelo ni lwiny mi ceng’ ma dwong’ pa Mungu, ma Jategokpo.

¹⁵(Nen, abino va jakwo. Mugisa ni ng’atu m’ukio, m’ugwoko kendi pare de, kara kud ewoth muneru, man ginen lewic pare.)

¹⁶Man gicokogi karacelo i ka ma julwong’o ku dhu Juebrania Armagedon.

¹⁷Man mir abirone konjo tabu pare i lietho; e dwal ma dit uai i hekalu, kud i komker, uwacu kumae, Etimbre:

¹⁸e lukoth, ku dwal, ku morpolo ginuti; man digidi ma dit de yengre, yau digidi ma dit ma kumeno fodi uwok ungo i ng’om por ma dhanu gamu bedo ko i ng’om ngi, digidi ma tek kumeni ngi.

¹⁹Man adhura ma dwong’ upokre ni ng’ete adek, man adhura mi thek upodho; man Babeli ma dit jupoi pire i wang’ Mungu, ya jumi ire kikombe mi pigulok mi kwinyo mi kwiny pare.

²⁰Man ku ba cula ceke giringo woko, man gudi de nwangre kendo ngo.

²¹Man pei ma dit, ku ba pei ceke pekne va lelo, uai i polo loro piny wi dhanu: man dhanu gicido Mungu kum masendi mi pei; kum masendine e dit apila.