Read Alur Lembanyutha 2 Bible Online

Lembanyutha 2 - Alur bible

Lembanyutha 2

¹Ni malaika mi kanisa ma ni i Efeso kieu kumae: Ng’atu m’umaku cero abiro i cinge ma yor acwic, en e ng’atu m’uwotho i kind thethala abiro mi mola ma kwar ewacu gin maeni kumae:

²Ang’eyo tic peri, ku tic m’imuli kudo man twiocwiny peri, man nia bedo ku dhanu ma rac copre iri ngo, man imulo i ju ma gilwongri gigi jukwenda, enke gi kumeno ngo, man inwang’u nia gi jundra;

³man twiocwiny nuti i beng’i man iciro cir pi nyinga, man iol ungo.

⁴Endre lembe ni i ia i kumi, nia iweko mer peri ma kwong’a.

⁵Ka kumeno poi pi ka m’iai i ie kan ipodho, man ilok cwinyi itim tic ma kwong’a de; tek kumeno ngo abino i beng’i, man abikabu thethala peri woko kud i kakare, tek iloko cwinyi ngo.

⁶Ento lembe mae ni i beng’i, ya idagu tic mi Junikolai, ma an bende adagu.

⁷Ng’atu ma ithe nuti, dong’ ewinj lembe ma Tipo yero ni kanisa. Ni ng’atu m’uloyo, abimie ecam kum yen mi kwo, ma ni i Paradis pa Mungu.

⁸Man ni malaika mi kanisa ma ni i Smurna kieu kumae: Ng’atu ma en e ma kwong’a ku ma cen de, m’etho, man ebedo kwo kendo ewacu gin maeni kumae:

⁹Ang’eyo masendi peri, ku canpiny m’unegi (ento ilony), ku lembacidi mi ju m’uwacu ya gi Juyahudi, man gi kumeno ngo, endre gi cokri pa Jok.

¹⁰Lworo kud unegi kum gin ma fodi nyanok ibisendri kudo: nen, wonabali ni ceng’ni bayu kindwu moko i odkol, kara jumul ko iwu; man wubibedo ku masendi ceng’ apar. Dong’ ibed mandha cil i tho, man abimio iri jamkermiwic.

¹¹Ng’atu ma ithe nuti, dong’ ewinj lembe ma Tipo yero ni kanisa. Ng’atu m’uloyo ebinwang’u remo mi tho mir arionde ngo.

¹²Man ni malaika mi kanisa ma ni i Pergamo kieu kumae: Ng’atu m’ubedo ku palamularu ma lake bith kun ku kun uwacu gin maeni:

¹³Ang’eyo ka m’ibedo i ie, en e ka ma komker pa Jok ni ie; man imaku nyinga ki, man ikwero yioyic para ngo, cil i ceng’ pa Antipa ma jamulembe para, ng’atu mandha para, ma junego i kindwu, ka ma Jok bedo i ie.

¹⁴Endre nyalembe moko ni i ia i kumi, kum jumoko ni i beng’i ma gimaku lemponji pa Balam, m’uponjo Balak ya ubol gin ma redho jo i wang’ nyithindho pa Israel, ya gicam gin ma julamu ni ayi gin m’acwia, man’nitimo tarwang’ bende.

¹⁵E kumeno jumoko ni i beng’i bende m’umaku lemponji mi Junikolai kumeca.

¹⁶Ka kumeno dong’ ilok cwinyi: tek kumeno ngo abino i beng’i pio, man abitimo ali i kumgi ku palamularu m’i dhoga.

¹⁷Ng’atu ma ithe nuti, dong’ ewinj gin ma Tipo yero ni kanisa. Ni ng’atu m’uloyo, abimio ire kum mana m’akana, man abimio ire kidi ma tar, man wi kidine nying’ ma nyen m’ukieure, ma ng’atu moko mbe m’ung’eye ndhu ng’atu m’ujole.

¹⁸Man ni malaika mi kanisa ma ni i Thuatera kieu kumae: Wod Mungu, ma nying wang’e va lebmac, tiende de calu mola m’urieny, uwacu gin maeni kumae:

¹⁹Ang’eyo tic peri, ku mer peri man yioyic ku timotim man twiocwiny, man nia tic peri ma cen usagu ma kwong’a.

²⁰Endre lembe moko ni i ia i kumi, kum iweko dhaku ma Yezebel, m’elwongre gire jabila ma dhaku; man eponjo ewingo jumiru para de ya gitim tarwang’, man gicam gin ma julamu ni ayi gin m’acwia.

²¹Man amio ire nindo ya elok cwinye; man eyenyo ngo ya elok cwinye kum tarwang’ pare.

²²Nen, aboie i kavuto, ku ju ma gigieri gikugi i masendi ma dit, tek giloko cwinygi ngo kum tic migi.

²³Man abinego nyithindho pare ku tho; man kanisa ceke gibing’eyo nia an a ng’atu ma sayu i ic kud adunde: man abimio iwu kubeng’wu kubeng’wu calku tic mu.

²⁴Ento ayero iwu, ni dongwu m’udong’ i Thuatera, ma fodi wumbe ku ponji maeni, ma wung’eyo gin ma thuth pa Jok ungo, calu giwacu; abolo ter mange ngo i wiwu.

²⁵Ento maeno ma wubedo ko, wumak ki cil m’abino.

²⁶Man ng’atu m’uloyo, ku ng’atu m’ukuro tic para de cil i kajikne, abimie ng’ol wi thek:

²⁷man ebibimogi ku dul mi nyunyu, calu agulu pa jacwiagulu ng’eny nziki nziki; calu an bende ajolo ba Vwa;

²⁸man abimie cero mi rupiny.

²⁹Ng’atu ma ithe nuti, dong’ ewinj gin ma Tipo yero ni kanisa.